5-3-2013 (農曆正月廿四)
今日六點就落到主場，同Ｄ老友傾咗陣就捐入橋底開竿，先開枝竿釣鱸，落餌放低想話開埋枝沉底，望一望枝竿以經比魚扯住出緊繩，仲係打橫走，直向樁柱間冲過去，我就即刻放低Ｄ野，執起枝竿就抽，攪咗五六吓，條魚掉頭走番出黎，想向另一邊樁柱標入去，咁我唯有頂佢一陣，跟手再收，呢次就好順咁收到上水面，見條魚雖然唔係好大，頭威頭勢，不容有失，即落撈箕上水，上埋生扣，落餌繼續，心諗咁早中魚，會唔會多幾條釣吓呢！跟手開埋先前開咗一半果枝釣沉底嘅竿。
過咗一陣，師傅偉又黎到，佢就喺橋面釣，又係縮喺架車入面做睡夢羅漢；一路釣到轉埋流，幾枝竿郁都未郁過，沉底果枝剩係喺度喂蟹，原來成個海得一條魚，唔使龜算好彩，都係時候叫醒師傅偉走人好過喇！
一早中魚，以為會釣多幾條掛，點知都係一條到尾。
呢條花鱸好肥美，有兩斤。
4-3-2013 (農曆正月廿三)
貓貓好番，心情靚靚，拎起架生，釣魚去也！
落到主場仲係落緊流，捐入橋底釣吓先；釣到轉埋流一咀都未咬過，上番橋面，第一口餌就有魚食喇，點知條衰魚打橫走，埋咗樁，斷繩收場，第二口餌落去唔夠一分鐘，枝竿頭拉咗兩吓，即刻冇哂動靜，收上黎冇咗隻蝦，勾過隻蝦落去，呢次等咗成個鐘先至有魚拉竿，一拉就又比佢偷咗隻蝦，呢Ｄ所為肯定係鱸仔喇，再落餌，呢次我唔放低枝竿，條魚果然好快又黎想偷餌食，先拉咗兩吓，我就抽起少少枝竿，當佢大力拉果吓，我唔抽竿，反而鬆比佢，停咗兩三秒我又再慢慢收繩，跟住條友仔就發力想話搶餌，呢次就好狠勁咁一抽，中咗喇！知到係細野，即刻係咁收係咁收，好快收到上水面，見係斤頭小鱸，撈箕都費事落，成條飛佢上黎，解勾即入冰箱。
再釣多個零鐘，Ｄ流轉急，再冇魚訊喇，都係走人番屋企好過。
細條到又要比隻手指尾佢 。
得條斤頭小鱸 。
27-2-2013 (農曆正月十八)
前言：屋企隻貓BeBe病咗，唔食野又三四日都冇便便，同佢睇獸醫，先照X光，仲要抽血化驗，獸醫話佢腎衰竭，又打消炎針，又打皮下水，要留醫一晚吊鹽水，見隻貓貓好似唔舍得我地走咁，大人就痛哭，我就安慰佢，話留一晚對隻貓好Ｄ，咁就將隻貓留低。
第二日去獸醫度探佢，見隻貓吊緊鹽水，隻貓見到我地，即刻咪咪咁叫，我同大人肉都赤埋，見留喺度都冇乜起色，缺定帶佢番屋企，咁就攞埋藥，找埋數就抱番隻貓走人。
番到屋企先同佢放便便，開頭都係放得兩三粒好似石仔咁硬嘅便便，隔咗兩三個鐘佢就疴咗一大堆出黎，最緊要嘅問題解決咗，我同大人成晚冇瞓，案時喂水喂藥，開Ｄ對腎有益嘅罐頭同乾糧佢食。
兩三日後隻貓有番Ｄ精神喇，仲食好多野添，不過都仲要繼續食藥同喂水，希望佢快Ｄ好番喇。
依家佢成日都要瞓架。
胃口好好添，最緊要仲係有便便。
成隻落哂形，大人同我都肉赤C！
隻貓開始好轉，咁我就有番Ｄ心机去釣魚喇！今日去街市執廿零隻蝦，落到主場剛起流，開好竿師傅偉又到，佢一落餌就有魚中，兩斤花鱸一上水即比奉場客打劫，我就要等到慢流先有魚食餌，一吓就成枝竿比佢拉到彎哂，我順勢一抽，連攪六七吓，感到Hi住樁，即刻放番幾呎低走，頂起再收，兩三個回合就見魚喇，師傅偉同我撈魚，啱啱撈上黎佢自已枝竿又響鉸，呢次就冇咁好彩喇，比條魚過樁Hi斷；佢再落餌即中條斤頭小鱸，而我就沉底中多條石崇，咁就結速咗今晚嘅大戰，兩人執埋Ｄ架生，走人去宵夜喇！
番到屋企，大人未瞓，仲話：「起碼有咁大先稱得上係鱸吖嘛」！
連中兩條花鱸 。
沉底中石崇 。
石崇留比二公主食至啱 喇。
准備劏魚。
20-2-2013 (農曆正月十一)
今晚又係釣得條兩斤都唔夠嘅鱸仔，之前Ｄ野費事講喇，話說釣咗呢條鱸上黎，我即刻喺個褲袋度攞塊包魚布出黎，點知連揪鎖匙都拉埋出黎，咁一拉揪鎖匙就飛咗落海，車匙同屋企匙都喺埋度添架，點算呢！呀!!打電話比我個三公主乖女先，好彩佢住得近，佢都有我車匙同屋企匙架！打咗比佢唔夠半個鐘，佢就黎到，我一早執好晒Ｄ架生，跟住開番車門放好Ｄ野，先送乖女番佢屋企，然後自己先番屋企。
釣得條咁嘅爛鬼鱸魚！
一陣先炮制你。
19-2-2013 (農曆正月初十)
呢排我嘅釣友師傅偉都唔得閒，咁我唯有單打獨鬥喇；今日晏晝天氣都唔錯，六點幾落到主場開好竿，Ｄ風同霧水就黎喇，早知係咁天氣就情願釣少日；卒之要磨到成十一點幾先有魚食餌，中番條兩斤唔夠嘅鱸仔，都算好彩喇！唔使龜，將條魚直入冰箱，速速執野走人去宵夜好過喇！
今次又要比隻手指尾佢 。
18-2-2013 (農曆正月初八)
過咗人日，又開始去做碼頭呀伯喇！今日嘅天氣冇得頂，又暖又冇乜風，喺街市執沙呀蚊蝦就直跴主場；落到去見仲落緊流，慢慢開好竿就同Ｄ老友吹吓水。
釣咗四五個鐘，連流都轉埋，三枝竿郁都未郁過；新正頭第一擊，冇理由吉箱而回，咁就同自己講，釣唔到魚唔准走，呢次破斧沉舟嘅想頭，終於喺幾分鐘後實現喇，竿頭嘅鈴聲響咗幾吓，我即刻執起枝竿，見條魚線向左快速打橫走，埋咗樁添，咁我就慢慢收繩，想將佢拖番出黎，點知條友仔又好快咁標過右面樁柱，因為Hi住樁我就唔敢用力，當我想頂番佢出黎之際，條魚就發力一衝！噢~輕哂＊＃≒@唔係雅，蛇年第一條魚就走咗！開頭以為斷線，收番上黎睇隻勾仲喺度喎，魚線絲毫無選，只係冇咗隻蝦，呢條魚都算食得精囉。
嗱嗱聲勾過隻蝦落去，今次當隻蝦落到唔夠十呎，條魚就埋黎搶餌，竿頭比佢一拉就彎哂，咁我就順勢一抽！又輕哂~收番上黎隻蝦仲喺度，只係比條魚咬C咗!!有冇攪錯....依家Ｄ鱸真係進化咗？食得咁鬼精嘅~
又再勾過隻全場最生猛嘅蝦落去，過咗唔夠一分鐘，竿頭點咗幾吓，跟住就重重咁拉落去，一抽竿就感到結結實實咁中咗，快攪五六吓，條魚想發圍，頂佢幾秒，再放兩三呎佢走吓，再頂！今次一頂就唔同佢客氣喇，使出終極一招「無敵風火輪」，好快咁將條魚升上水面，到咗水面條魚都有幾次爭扎，我左手提竿，右手飛個撈箕落去，好順利就將條魚攞咗上黎，大戰結速！
目的以達，將條魚即入冰箱，執埋Ｄ架生去宵夜，番到屋企都三點幾囉。
頭威頭勢中番條開年魚 。
呢條花鱸都幾肥吓架！
中條兩斤半花鱸黎開年 。
2-2-2013 (農曆十二月廿二)
今日週未冇野做，晏晝天氣都仲幾暖吓，到黃昏攞起Ｄ架生，落街市執廿零隻蝦，飛車落主場趕釣轉流。
一到主場見仲落緊流，嗱嗱聲開好竿，過咗一陣流水開始慢咗Ｄ，枝釣鱸竿就有返應喇，竿頭拉咗幾吓，我以經執起枝竿準備，當條魚大力搶餌果吓就順勢一抽，中咗!!快攪咗幾吓，感覺有Ｄ斤両，一頂再攪，條魚向外標出，啱哂我心水喇，連攪十幾吓就見魚，真係幾大條吓，起碼五六斤，一手頂魚，一手落撈箕，點知條魚一見個撈箕就發茅，狂衝番落去，我梗係拑實個鉸唔比佢開尾喇，咁就出事喇，條魚發力一標，竿頭即刻輕哂，爆咀走魚~＊＃#@
屎屎氣勾過隻蝦落去繼續；通常中第一條魚比佢走咗，跟住就實聽龜架喇，見連Ｄ流都轉埋，個心就打定輸數；又過咗個幾鐘，Ｄ大東風越吹越勁，吹到竿頭擺擺吓，成日好似魚食餌咁，睇睇吓枝竿頭好明顯向下一彎，仲拉到響鉸添，一手執起枝竿條魚就發力喇，我都費事抽竿，一開始就狂收五六吓，頂一陣就好順咁直收到上水面，撈箕上水，條花鱸都有兩三斤，都好!!走條大、中番條細，唔使今晚瞓唔著喇。
時間過得真快，望吓個錶又十點幾嗱，Ｄ大東風吹到頭都甩，唔同佢癲，有魚留番聽晚釣，跟住執埋Ｄ架生，走人去宵夜好過喇。
又嘈醒咗大人(有魚大大聲，冇魚靜靜雞)，話比佢聽走咗條大捉番條細 ，佢就話：「次次走果條魚梗係大嘅，都唔知係唔係」。我就////////
晚晚有條鱸釣吓都幾過引吖。
須然條花鱸三斤唔夠，不過唔使瞓唔著都喺番度喇。
