21-2-2014 (農曆正月廿二) 大東風
今日須然大風咗Ｄ，不過冇落雨，見咁得
閒，咁就去主場吹吓風都好；買埋虾18:00
以經落到去，照舊開三枝竿，當我開到第三
枝果時，落餌唔夠十呎，就見條魚線係咁打
斜走，咁好彩！一落餌就有魚接～即刻收番
多餘嘅線先，竿頭開始比佢拉到彎哂，嗯!!
都有Ｄ力水喎，但係果度嘅位置有幾條樁，
條魚又飛咗埋最窄位，首先我要拉番佢出黎
先，頂咗幾秒，即收幾吓，條魚比我拉番出
黎，不過又比佢標過隔離樁，咁我又反方向
頂，呢次條魚發力喇，我就鬆番幾呎佢走
吓，一慢落黎，机不可失，即刻駛出「乾坤
大羅移」嘅步法，向反方向行幾步，一拉就
順勢攪咗六七吓，呢次順好多喇，再駛出
「左右野馬分鬃」，條魚即時冇哂方向，上
到水面反肚投降，幣～撈箕又唔喺身边，見
條鱸都係兩斤幾啫，而佢又比我玩殘咗，咁
我就費時攪咁多野，用手慢慢小心收咗佢上
黎，心諗今次冇C喇，咁早中魚，今次仲唔
大豐收！嗱嗱聲將條魚落好生扣，即刻鈎過
隻虾落去繼續，點知一路釣多四個鐘，三枝
竿郁都未郁過，Ｄ大東風就吹到個人都幾乎
企唔隱，唔係喇！有魚留番下次釣，倒虾執
埋架生走人好過。
大人話每次有一條都唔錯吖。
我就話如果多幾條就更好呢。
又中花鱸兩斤幾，準備劏魚。
20-2-2014 (農曆正月廿一)
今日咁好天，梗係要去釣番轉喇，買好虾就直跴主場；落到去都未夠六點，東北風唔係好勁，流水剛起，照舊開番三枝竿，兩枝半水釣鱸，一枝沉底搏符碌。
唔知點解咁好天氣，流水又靚，釣咗三個鐘，幾枝竿郁都未郁過，唔通個海真係冇魚！以前釣魚都話有老友「師傅偉」喺度就可以傾吓計吖，依家得我一條冷，岳來岳去，坐又唔係，企又唔係，都幾悶吓架。
飲咗杯熱水，行開去睇吓風景先，行到擺最前果枝竿嘅位置，特然見枝竿比魚拉咗兩吓，我即刻停步，心諗！幣加伙～撈箕唔喺身邊添！冇法喇，中咗魚先算；一執起枝竿，條魚以經發力，一抽就中，嘩！好強嘅拉力，條魚有番咁上吓，頂咗一陣，快手追番六七吓，頂吓收吓就上到水面，睇落條鱸都有四斤，冇撈箕點上呢？咁等我玩謝佢先，玩咗一輪，見佢反肚投降，即刻把握呢個時机，一路將佢拖咗成三十呎，去到擺放撈箕嘅位置，好彩其間冇乜反抗，捞箕上水，抹一把汗，解鈎落好生扣，抖順條氣就落餌繼續。
一路到22:30，呢個時候風停咗，暖番好多，水流都好靚，咁跟住釣多陣就執野走人喇！
番到屋企，嘈醒咗大人，佢就同我影相喇。
鱸魚有番咁上吓先過引。
今季Ｄ花鱸特別肥美。
18-2-2014 (農曆正月十九)
今日晏畫天氣回暖，氣溫超過二十度，仲出埋太陽，應該係釣魚嘅好日子；喺屋企同隻貓玩咗一陣，到五點幾就執埋釣魚架生，去街市買十零廿隻虾就直跴主場。
落到去見流水以起，咁就剩係開兩枝竿齋釣鱸；一入黑Ｄ北風就增強咗，仲明顯凍咗好多添，心諗今晚多數都係享受過程喇；過咗個幾鐘，Ｄ流仲行到澎澎聲添，我就用手收隻虾上黎，睇駛唔駛換過隻虾落去，拉上黎隻虾仲生猛過我，跟手掉番落去，咁樣郁一郁枝竿就有反應喇，竿頭比魚拉咗兩吓，跟住就成枝竿拉到彎哂，我一執起枝竿就順勢一抽，中咗！連攪幾野佢先發圍，頂咗幾秒就知唔係大野，都唔駛乜點就佢，一路順住收繩，好快就收到上水面，揾陣Ｄ，兩斤小鱸都用撈箕上水，解鈎落埋生扣，即刻落餌繼續。
一路又釣咗兩個鐘，Ｄ北風越吹越勁，其間只有隻大墨偷咗兩隻蝦食，其餘時間，兩枝竿郁都未郁過，唔係喇！有條魚交差就算喇，都係執野走人去宵夜好過，費事冷親又比大人哦喇！
都係得條兩斤鱸仔。
吹住大北風，有條鱸仔釣吓算係咁囉！
12-2-2014 (農曆正月十三)
過咗年呢十幾日都係凍到飛起，所以冇去釣魚，今日卒之忍唔住，凍就凍喇；執起架生，飛車落渣華道街市買蝦，跟住直跴主場。
落到去見仲有Ｄ流尾，嗱嗱聲開三枝竿，兩枝半水釣鱸，一枝沉底搏符碌；過咗個幾鐘，釣半水其中一枝竿比魚拉咗一吓，嗯～黎料囉喎！即刻執起枝竿，第二吓以經拉到枝竿彎哂，我順勢一抽，跟手攪咗幾吓，條魚想發力標埋樁，再頂一陣，見佢冇乜力，條魚大極有限，咁我就輕輕鬆鬆咁頂吓收吓，好容易就收到上水面，頭威頭勢，小心落撈箕，兩斤小鱸順利上水，解鈎落生扣，即落餌繼續。
一路到轉埋流，越夜越凍，手指都開始凍到麻木，唔係喇，都係見好就收，有魚留番下次釣，執埋架生去宵夜喇。
中番條開年鱸。
開年攞番個頭彩。
16-1-2014 (農曆十二月十六)
噚晚咁早中魚，今晚食過番尋味，落到去開好竿，坐定定等中魚，點知今晚由18:00，一路釣到轉埋流，三枝竿郁都未郁過，心諗成十點啦，今晚都係龜架喇～算吧喇，執野走人。
先收沉底枝竿，跟住倒哂Ｄ蝦落海喂魚，收埋蹬仔，整吓呢樣整吓果樣，望一望釣鱸枝竿，嗯!!彎哂嘅，即刻放低Ｄ野，飛撲埋去執起枝竿，噢～條魚包咗樁，好彩仲有拉力，即係表示條魚仲喺度，扯得兩扯唔郁添，唔通爆咗咀？我改為用手收線，用陰力慢慢拉，又拉得郁少少喎，不過感覺條魚線HI住條樁，烈烈聲想断想断咁，拉咗五六吓特然一鬆，即刻快手收幾野，可能正話條魚Ｄ氣力用哂，到我收佢上黎就好順，原全冇反抗，只係上到水面先有幾吓爭扎，嘩!!成五斤喎，即落撈箕上水，解鈎直入冰箱。
你話咯，成晚三四個鐘，寸步不離，金睛火眼望到實幾枝竿，冇條魚埋黎食餌嘅，你一行開咗，冇乜為意嘅時候，佢就埋黎偷食，我諗Ｄ魚真係見到我地架；霖尾中番條唔使龜，跟住收埋其他野，走人去宵夜喇！
霖尾中番條五斤唔使龜。
今次呢條大過噚晚果條。
劏咗先記得未影相。
15-1-2014 (農曆十二月十五)
幾日冇釣魚，明知今日風猛都要去切番轉；買好蝦，18:00就到主場，到開竿果陣先發覺出黎充忙過頭，冇攞魚竿添，不過唔使驚，冇帶用開果兩枝竿啫，車上面仲有幾枝士啤竿喺度。
今次只係開兩枝竿，都係半水釣鱸，大約七點度，其中一枝竿比魚拉咗一吓，咁我就即刻執起枝竿，說時遲那時快，條魚以經發力狂拉，我就順勢一抽，即中！快手攪幾野，感覺條魚順住咁游上黎，見机不可失，加快收線嘅速度，上到接近水面，條魚先至想轉頭開尾，我梗係頂頂佢先喇，頂咗幾秒就頂佢唔順，為有放番Ｄ線就吓佢，唔係炸竿都有份呀！就咗一張就輪到我發圍喇，一手帶順佢個頭向番水面，一手就連攪十吓八吓，終於見魚囉，睇落都有三斤，條魚作最後爭扎，飛出水面洗鰓，我即刻拉緊條魚線，再將枝竿一左一右擺動，條魚即時冇哂方向，反肚投降，今次梗係撈箕上水喇，跟住解鈎落生扣一腳踢，再落餌繼續。
20:30轉埋流，再釣咗兩粒鐘都冇料到，只係比墨魚偷食咗四隻蝦，下次帶埋墨魚假餌黎做佢世界至得；呢個時候Ｄ北風又勁咗，都係執野走人去宵夜好過喇！
一早中都係得一條。
呢條鱸都有三斤幾。
好肥美嘅花鱸。
9-1-2014 (農曆十二月初九)
噚晚爆咀走魚，條氣唔順，今日一於落主場捉番佢；18:00落到去照例開好三枝竿，一落餌即刻就有魚接，拉咗兩野，我就比鬆Ｄ佢，等佢再大力扯嘅時候就狠狠往上一抽，即中！攪七八吓，頂一頂再攪，好順咁上到水面，係兩斤小鱸；今次唔敢偷懒喇，即落撈箕上水，落好生扣放落水養住先。
心諗～冇屎喇，唔通有成基鱸埋咗黎，速速落餌繼續，點知一路磨到成十點幾，三枝竿都未郁過，北風又越吹越勁，都係執野走人去宵夜好過喇！
噚晚比佢走甩今晚捉番佢。
又係得一條兩斤鱸仔。
聽日用冬菜碎蒸。
