28-3-2014 (農曆二月廿八)
聽天文台講，過一兩日會有雷暴，所以今晚老虎都要釣番轉；落街市執廿隻蝦，飛車落主場，時間啱啱好，開始行流，照舊開三枝竿，開頭Ｄ流好慢吓，我就坐喺打沉底果枝竿嘅位置果度，希望沉底中番條好野，點知都係白坐，19:30釣鱸枝竿響咗一吓，即刻埋位執起枝竿，好明顯條魚擔住隻蝦，但係佢又唔再郁喎，咁我就輕輕拉幾吓辦蝦跳，咁樣一郁，條魚就搶餌喇，睇住竿頭一鋤落去就抽竿，中咗！好順咁收到上黎，睇落唔夠兩斤，成條飛佢上黎，落好生扣，換餌繼續。
鱸魚開口，即刻坐番喺釣鱸嘅位度，金精火眼望到實，果然不出所料，落餌唔夠十分鐘，竿頭又傳來魚訊，呢次動作大好多喇，第二吓以經發力，一抽又中！今次條魚位置喺樁邊，條魚線Hi住條樁柱，即刻唔敢收佢，頂咗兩三秒就放線，條魚一走番出黎就快速收線，都係好順咁上到水面，呢條大Ｄ，撈箕上水，落埋生扣，換過花咗嘅帶腳，落餌繼續。
又過咗成粒鐘，竿頭再有魚訊，呢次一拉就響鉸，一執起枝竿以經感到沉重嘅拉力，想話拑實個鉸頂佢，點知條友仔已經開尾，我唔想炸竿，唯有鬆線比佢走吓，咁樣一鬆，條魚段段有，嘗試過拑鉸，幾乎手指公都燒埋，睇住就黎清杯，好彩呢個時候條魚開始冇乜力，頂番起佢即攪七八吓，再頂再攪，卒之比我收到佢上水面，條魚都有四五斤，即落撈箕，唔知係我冇氣吖益或Ｄ流急，撈咗兩吓都撈唔到，又比佢標番落去八九呎，即刻放低撈箕，再同佢搏命，今次再收條鱸上黎就即刻反肚投降，順利撈箕上水，擺低條魚抖吓氣先，抖順條氣將佢落埋生扣，換餌繼續；釣釣吓回心一諗，早兩晚都有魚中，今晚又釣三條，仲唔係細添，如果再釣多條大野，屋企雪柜個冰格夠唔夠擺呢，唔係喇，都係執埋Ｄ架生，收工去宵夜好過喇！
起碼有番四五斤先至稱得上係鱸吖嘛。
又可以向大人耀武揚威喇。
今年Ｄ花鱸零舍肥美嘅，劏好哂，放入冰柜，啱啱好爆棚。
27-3-2014 (農曆二月廿七)
噚晚釣得咁過引，今晚就是必再去搏一搏；買好餌18:00就落到主場，開好竿坐定定等運到，過咗冇奈，枝竿特然比魚狂拉咗兩吓，連鉸都响埋，一執起枝竿就再冇動靜，收上黎隻虾冇咗，鈎過隻落去唔夠十秒，條魚又想黎偷蝦，呢次仲狼屎，一野就鋤落去，好彩當時我有準備，一抽就連攪四五吓，條魚冇得反抗，一頂一收，兩三吓就收佢上黎，兩斤花鱸撈箕上水，換餌繼續，又過咗兩個鐘，其間比隻妖攪攪震，咬咗兩隻蝦，第三隻蝦放落去冇奈，又有野黎食餌，呢次明顯唔係妖，我一執起枝竿，條魚剛好發力搶餌，順勢一抽，中咗！想話攪，但係好強嘅扯力另到我要就佢幾呎，再頂番起佢，今次就輪到我扯佢喇！一路頂一路攪，半吋都唔比佢，好快上到水面，想話攞撈箕，點知條魚見光就標番落去，又要費一番功夫先至上番水面，今次佢冇力喇，反肚投降，撈箕上水，呢條鱸大Ｄ，起碼三斤，解鈎落生扣，再落餌繼續。
一路釣到22:15都冇魚訊，算數！又過足手引，時間啱啱好，執野走人去宵夜喇。
乘勝追擊，又中花鱸兩條。
好彩個海仲有兩條花鱸釣吓。
26-3-2014 (農曆二月廿六)
乖孫洋洋番咗屋企，百無了賴，趁天氣回暖，落街市執十零廿隻蝦，落主場踎吓都好。
18:15落到去啱啱行緊流，照舊開三枝竿，兩枝半水釣鱸，一枝沉底搏符碌；一路釣到19:10三枝竿郁都未郁過，諗住收隻蝦上黎睇吓駛唔駛換過隻生猛Ｄ嘅，點知一收即有魚搶餌，拉咗兩吓，到第三吓我即抽，中咗！快攪幾吓，都有Ｄ力水，就就再攪，中途有輕微反抗，上到水面見都有兩斤，安全起見，撈箕上水，解鈎落生扣，換餌繼續；一落餌唔夠十呎，條魚線輕哂，睇住佢打横走，我即刻收緊Ｄ線，當堂冇哂反應，條友仔唔通放口，等多一陣，特然一吓重重嘅力，拉到枝竿都彎哂，我嘅反應就係一抽就攪，攪咗兩吓條魚又發力，我比番幾呎佢走吓，順勢一頂，呢次順好多喇，一路收到上水面，條鱸見光就發茅，成條飛出水面想洗鰓，我即刻提起枝竿，拉番直條魚線，條鱸見洗鰓失敗，想開尾往下衝，我點會比佢咁做吖，帶一帶佢就頂到行，跟住拖佢埋黎，即落捞箕上水；大戰結速，呢條大過正話果條，睇落超過三斤，解鈎落生扣，换餌繼續。
連起兩條，氣都扯埋，坐低飲番啖水，到21:30再中多條斤零重嘅鱸仔，而沉底果枝竿，連蟹都冇黎食過，唔係喇！見好就收，有魚留番聽日釣，執埋Ｄ架生同魚獲，走人去宵夜喇喂～
彈無虛發，連中三元。
今晚都算係豐收架喇，幾奈未中過三條魚
呀！
21-3-2014 (農曆二月廿一）
冇釣幾日魚，手都痕埋，今晚唔理佢大唔大風，一於要釣餐飽嘅。
去街市執十零隻虾就直跴主場，去到Ｄ流好靚，開好竿坐定定等運到；18:45見條魚線斜哂嘅，仲以為有魚拉，用手收番上黎，原來鈎到膠袋，解咗再放番隻虾落去，放咗唔夠十呎，條魚線噓哂嘅，唔通隻蝦攬樁，用手拉咗四五呎，嗯!!有料到，原來條魚接餌，經我一收，條魚就想發力，我順勢一抽，中咗，唔用竿喇，索性用手扯，我釣手繩麻麻地咋，所以好小心咁就住佢上，好彩冇燒手，三兩個回合就扯到佢上水面，即落撈箕兩斤花鱸上水，解鈎落生扣，換餌繼續。
一路釣到21:00，心諗咁早中魚，唔通又係一條到尾～都未講完枝竿頭微微比魚拉咗一吓，有理冇理都執起枝竿先，又係見到條魚線斜哂，以為又係鈎垃圾，我準備收繩嘅時候，條魚線特然改變方向，呢Ｄ又係鱸 B 嘅所為喇，跟手慢攪咗幾吓，有反應喇，輕輕力咁拉落去，一抽就中，好容易收到上黎，條鱸真係唔夠一斤，成條就咁飛佢上黎，生扣都費事落，即入冰箱。
又釣到22:45，三枝竿再冇郁過，今晚可以有兩條魚釣到算好彩喇，都係執埋Ｄ架生，鬆人去宵夜好過。
哈哈～好彩有兩條鱸仔釣吓，好奈未起過孖
喇！
鱸仔兩斤同十両。
17-3-2014 (農曆二月十七)
旅行番黎幾日都未得閒過，今晚趁有Ｄ空檔，嗱嗱聲執埋架生，落街市買十零隻虾就直跴主場。
落到去Ｄ流仲行緊，咁就慢慢開好三枝竿，照例兩枝半水釣鱸，一枝沉底搏符碌；由18:30釣到20:45釣鱸枝竿先至比野輕輕拉咗幾吓，執起枝竿再拉一兩吓就停咗，收番上黎隻虾仲喺度，不過就瓜咗，再鈎過隻生猛Ｄ嘅虾落去，又係咁拉吓拉吓，收上黎又屎埋，唔份氣再落餌，呢次就大力Ｄ喇，條魚線仲打横走添，呢Ｄ梗係鱸仔喇，我即刻輕輕收兩三吓，見緊手就一抽！中咗～因為果度地勢險峻，左有櫏楸架，後有樁柱，為一可以做嘅就係首先拉條魚出黎先，一頂就順勢攪咗八九野，見帶番順佢出黎就繼續收，上到水面，條魚見光就狂標幾吓，喺安全情況下就鬆番幾手比佢喇，再兩個回合就輕鬆撈箕上水，條鱸仔得斤零重，落好生扣就繼續釣。
一路釣到轉埋流，到22:30幾枝竿都冇郁過，有一條魚交吓差就算數，費事磨爛蓆，慢慢執埋Ｄ架生番屋企喇。
旅行番黎即刻有條鱸仔釣吓唔駛龜。
斤零重用黎清蒸至啱。
21-2-2014 (農曆正月廿二) 大東風
今日須然大風咗Ｄ，不過冇落雨，見咁得
閒，咁就去主場吹吓風都好；買埋虾18:00
以經落到去，照舊開三枝竿，當我開到第三
枝果時，落餌唔夠十呎，就見條魚線係咁打
斜走，咁好彩！一落餌就有魚接～即刻收番
多餘嘅線先，竿頭開始比佢拉到彎哂，嗯!!
都有Ｄ力水喎，但係果度嘅位置有幾條樁，
條魚又飛咗埋最窄位，首先我要拉番佢出黎
先，頂咗幾秒，即收幾吓，條魚比我拉番出
黎，不過又比佢標過隔離樁，咁我又反方向
頂，呢次條魚發力喇，我就鬆番幾呎佢走
吓，一慢落黎，机不可失，即刻駛出「乾坤
大羅移」嘅步法，向反方向行幾步，一拉就
順勢攪咗六七吓，呢次順好多喇，再駛出
「左右野馬分鬃」，條魚即時冇哂方向，上
到水面反肚投降，幣～撈箕又唔喺身边，見
條鱸都係兩斤幾啫，而佢又比我玩殘咗，咁
我就費時攪咁多野，用手慢慢小心收咗佢上
黎，心諗今次冇C喇，咁早中魚，今次仲唔
大豐收！嗱嗱聲將條魚落好生扣，即刻鈎過
隻虾落去繼續，點知一路釣多四個鐘，三枝
竿郁都未郁過，Ｄ大東風就吹到個人都幾乎
企唔隱，唔係喇！有魚留番下次釣，倒虾執
埋架生走人好過。
大人話每次有一條都唔錯吖。
我就話如果多幾條就更好呢。
又中花鱸兩斤幾，準備劏魚。
20-2-2014 (農曆正月廿一)
今日咁好天，梗係要去釣番轉喇，買好虾就直跴主場；落到去都未夠六點，東北風唔係好勁，流水剛起，照舊開番三枝竿，兩枝半水釣鱸，一枝沉底搏符碌。
唔知點解咁好天氣，流水又靚，釣咗三個鐘，幾枝竿郁都未郁過，唔通個海真係冇魚！以前釣魚都話有老友「師傅偉」喺度就可以傾吓計吖，依家得我一條冷，岳來岳去，坐又唔係，企又唔係，都幾悶吓架。
飲咗杯熱水，行開去睇吓風景先，行到擺最前果枝竿嘅位置，特然見枝竿比魚拉咗兩吓，我即刻停步，心諗！幣加伙～撈箕唔喺身邊添！冇法喇，中咗魚先算；一執起枝竿，條魚以經發力，一抽就中，嘩！好強嘅拉力，條魚有番咁上吓，頂咗一陣，快手追番六七吓，頂吓收吓就上到水面，睇落條鱸都有四斤，冇撈箕點上呢？咁等我玩謝佢先，玩咗一輪，見佢反肚投降，即刻把握呢個時机，一路將佢拖咗成三十呎，去到擺放撈箕嘅位置，好彩其間冇乜反抗，捞箕上水，抹一把汗，解鈎落好生扣，抖順條氣就落餌繼續。
一路到22:30，呢個時候風停咗，暖番好多，水流都好靚，咁跟住釣多陣就執野走人喇！
番到屋企，嘈醒咗大人，佢就同我影相喇。
鱸魚有番咁上吓先過引。
今季Ｄ花鱸特別肥美。
