夜戰南丫煤橋，龜氣沖天！

29-7-2009  (農曆六月初八)

時間：18:00--24:00

今日約咗高橋雪也去南丫煤橋玩番轉。今次我冇揸車去，而係坐佢架車到鴨脷洲，落船過南丫。今次連埋我共五人，一去到我就緊係上大樁，因為闊落Ｄ，高橋上五樁，其餘三人各上一樁。開頭仲係落緊流，Ｄ流好靚，我開咗三枝筏仔沉底，一枝半水，一枝磯竿打浮波全游動。過咗冇奈，有枝沉底響鉸，我就快手執起枝筏仔準備，見佢發力拉線，我緊係向上一抽，點知條友仔己經包樁，三號碳主線(擦)一聲 就應聲而斷~~#再挷過鈎，上好餌又落過。 

係咁又過咗幾粒鐘，四五枝竿形然都冇郁過，22:30開始起流，仲係飛机流添，更加冇魚訊，冇辦法喇！又唔走得，為有繼續磨。

卒知磨到23:30Ｄ流水先開始慢，但係約左艇家24:00到來接我地，點解今次咁早收檔呢？因為其他人聽日要番工囉，所以唔想走都要執野鬆人，架大頭艇車番鴨脷洲都成點鐘喇，最後知到成班人全部打龜。後來過香港仔宵夜，兩點先至番到屋企。

你睇係米有Ｄ龜氣喺度吖~~#

冷冷清清，唔夠做~~＊

三更半夜先開口

26-7-2009  (農曆六月初五)

星期日喺屋企食咗晚飯，睇緊電視，師

傅偉來電話主場有烏頭埋，果時都九點

幾，都好喎！即刻立架生飛車到主場，

真係有成基魚喎，不過睇落Ｄ烏頭唔大

條，師傅偉已經釣左一條上黎，都係磅

頭，我開好竿，跟手落餌，但係Ｄ魚收

哂口，見到魚但釣唔到，真慘！十一點

幾師傅偉話走先，我就繼續磨爛蓆，點

知佢一走Ｄ衰魚就開口喇，等我連起五

條，有兩口爆咀，須然唔大條，都算過

咗手引，嘩！成點鐘嗱，都係執野走人

，番屋企喇喂。拜拜！

Ｄ烏頭條條都係磅頭，唔知點解咁細條。

呢輪都係大老烏

17-7-2009  (農曆閏五月廿五) 一號風球  晚黃

連龜幾次(包括前日南丫通頂)，今日唔順氣，一於落主場釣晚黃。

五點幾到街市買咗虾同半磅方包，就直奔主場。到步見有幾個釣友己經釣緊，原來佢地喺度釣泥鯭，唔理佢地咁多，娟入橋底即刻開竿，佈好個陣就坐定定用虾肉釣吓魚仔，點知個海原全冇生物嘅績像，幾枝竿郁都冇郁吓。

又到七點幾八點，一於轉陣上橋面，開多兩枝竿釣老烏，到九點幾，同釣友傾緊計，見枝烏頭竿頭彎左一吓，知有老烏食咗餌，立即收上尼再裝新餌，一放落去就見有兩三條老烏埋黎搶食，竿頭震左幾野，我就輕輕一抽，咁就中咗，我即刻用力頂竿，因為釣幾呎水，所以一頂條老烏嘅魚頭已經離水，我唔敢放鬆，如果比佢鍾番落去開尾就好難攪，太大碌，又近樁邊，好在老友呀海哥同我落撈箕，一野就上水，拿拿聲解鈎，再落餌，點知Ｄ衰野見老大比人捉咗，成班友仔拿拿霖走哂。釣多成粒鐘，見攞咗個彩，又冇乜動靜，算數！都係收竿走人，番屋企吔飯！拜拜！

釣成晚，都係得條大海烏四斤幾。

請問有冇人知呢條係咩魚？

13-7-2009  (農曆閏五月廿一)

上個禮拜，釣友黑仔喺主場釣到條斤頭嘅魚，其間問我係咩魚，我話你玩我呀，一睇就知係斑啦！跟住佢話唔係玩你，條斑冇牙架！即係唔係斑喇。我伸隻手指落佢個口度，感覺條友仔Ｄ牙係圓滑嘅，真係抓哂頭，點解斑斑Ｄ牙係咁嘅...........

小弟釣梳學淺，所以今日特登攞出黎，比大家研究吓，睇吓各路英雄，可唔可以教我認識呢條係乜野魚，謝謝！

今年中第一條石蚌

10-7-2009  (農曆閏五月十八) 生流

大熱天時又冇特別事做，忍唔住又去釣番陣魚先。

三點落到主場己見「黑仔，流哥」，兩人係度釣緊，睇落佢地重未有收獲，望吓個錶，就快轉流，嗱嗱聲Set好架生，坐定定等運到。

四點左右，Ｄ流慢咗，沉底枝筏仔有魚訊，我立即攞起枝竿，說時遲那時快，條友仔已經發癲咁出力往樁位標去，我即刻往上一提，快攪六七野，已經脫離危險地帶，到佢再發力，我知唔係大野，就比幾手佢玩吓囉！跟住到我玩喇！一左一右玩到條友仔謊失失，冇哂方向感，唔使兩個回合，己經上到水面，但見黃金閃閃，石蚌是也，成條飛上水，影相，落生扣。

四點九開始起流，特然另一枝沉底筏仔快速出線，我立即扲實個鉸，幣喇！比條友仔包咗樁添，即刻唔敢用力收，只有放線，佢又走幾呎喎！諗住放鬆吓佢，等條魚游番出黎，如事者五六次，到最後佢一發力開尾，枝竿輕哂~~斷主線收場~~殘念^^好谷氣底下，執野走人，番屋企吔飯，拜拜！

今年嘅第一條石蚌，番屋企磅過(斤五両)。

今日真係熱，仲要成34度，好彩中到魚又涼番哂。

食過番尋味，險些打龜！

6-7-2009 (農曆閠五月十四)

前日烏頭大豐收，今日又約師傅偉復桌。

晚上八點，$3.5買咗半磅方包。落到主場，偉哥又剛到，一齊開好竿，近釣遠投都出齊，左釣釣，右釣釣都係冇魚咬，時間過得好快，又十點幾，師傅偉聽日要做，所以走先，我繼續磨爛蓆，佢啱啱走，我枝竿頭就有魚訊，拉咗幾吓我就往上一提，咁就中咗，收幾野知唔係大，斤幾魚，費事洗撈箕，成條飛佢上黎。拿拿聲裝好餌再落過，又黎食喎，但好精口，比前次食得更輕，震震吓，我等佢食咗成半分鐘，忍唔住往上輕輕一抽，又中，但好快條絲就輕曬，爆咀囉！上黎睇吓，得塊口唇皮，算把喇師兄，都係執野走人好過，留力日後再戰！拜拜！

釣咗成晚，剩係得烏先生斤半一大條。

烏先生重臨維港

4-7-2009  (農曆閏五月十二)    晚水  

今日下午約咗師傅偉去釣晚水，七點左右到主場，己經見佢喺度釣緊，我就照例兩沉一半水，釣咗一陣，偉哥轉釣組釣烏頭，我就不以為意，繼續我嘅沉底捉怪獸夢。點知特然間聽到拍拍聲，原來偉哥以經中咗烏頭，此時我都唔執輸喇，收起幾枝竿，拿拿聲轉烏頭釣組，師傅偉已經連起四條囉！到我一掟落去已有魚搶食，竿頭微微震咗幾野，我就往上一帶，咁就中我今季第一條老烏喇，睇落都幾粗大，要用撈箕上水，嘩！成三斤喎！此時師傅偉又中，佢條重攞命，足有四斤，又梗係撈箕上水喇！跟住就你一條我一條，真係過足手引。

定咗流，個海又歸於平靜，天色又好似想落大雨咁喎，都係執魚走人為妙，我諗住攞三四條走，點不知偉哥叫我攞走哂佢，為有出九牛二虎之力，將八九條大烏頭抬哂番屋企囉。

左手果條四斤五，右手果條三斤十二！

季初海烏條條都咁好力，咁肥美！

蹬仔都未坐熱就去釣魚

2-7-2009 (農曆閠五月初十) 西南風  屎流水

番左黎兩三日，抖順條氣，拿起架生，又落主場過吓引先。

一見番個海，個人即刻生猛哂，成個月冇釣過魚，所以特別開心。同朋友傾咗一陣就開竿，照列兩枝沉底，一枝生虾半水。等咗一陣，見冇乜動靜，就順手拉三五呎線比半水枝筏仔，點知一郁條友仔就標埋黎搶餌，個橫鉸仔登時發出狂喜嘅吱吱聲，我立即提起枝筏仔，感到條線己比條友仔拖過樁，唔敢同佢斗力，就放佢幾手，一見佢放鬆咗，我就睇準机會，帶番佢出黎，再使出無敵車輪手，於廿多呎上到見魚，嘩！條花鱸起碼過五斤(番屋企過磅，有六斤五)，佢望望我又開尾衝番落去，我只好就就佢囉，如事者兩三個回合，佢就冇氣反肚，我就用撈箕將佢上水，影好相(自拍)，落埋生扣，又回復平靜。釣到六七點，天又開始黑，收拾好架生，番屋企，整條魚尾清蒸都好喎！拜拜！

奈冇釣魚，中魚特別開心嘅！

肥美百花鱸，六斤五！

大人話條魚尾用黎清蒸喎！