先中牛廣再中大紅鮋

27-10-2009  (農曆九月初十)  慢流   東北風

今日約埋師傅偉到主場搏吓，好早食咗晚飯，就到街市拾廿蚊大虾仔，飛車落到主場，19:30我先到埗，師傳偉跟住到，大家開好竿，講吓笑，傾吓計，佢話希望今日有鱸魚玩吓。

20:00特然發覺釣半水果枝竿頭彎咗幾吓，我心諗唔通真係有鱸，即刻囉起枝竿，呢頭攞起枝竿，果頭己經響鉸出緊線喇，首先我拑實個鉸，條魚就發力向下衝，成枝竿即時彎哂，我頂一陣，佢就再向外海衝出，佢屎喇，冇樁冇柱有排玩，一收一放三四次，己經收到埋黎，嗯！唔係鱸喎，係牛廣黎喎，咁我就用撈箕上水，影埋相，即落生扣，再鈎隻蝦落去睇仲有冇先，因為牛廣係群体魚黎加嘛。

21:05師傅偉中咗條好似曹白嘅魚，落埋生扣；21:45我有之沉底筏仔微微響咗吓鉸，我就快手將枝筏竿揸上手，竿頭再點咗幾野，再黎一野，枝筏竿就一彎到腰，因為中魚嘅位置險要，條友仔又往樁位衝去，我成個人企起身，將枝竿往上頂，老虎都唔放，條線拉到裂裂聲，卒之條魚調頭出番尼，我嗱嗱聲收咗十幾吓，佢又發力向外衝，呢次可以比線佢走吓啦，一放一收，兩三個回合，見魚影喇，只見火紅嘅一條紅鮋，在水中爭扎，師傅偉同我用撈箕上水，條魚都有兩斤幾喎！又再影相，落埋生扣。

22:30大家再冇魚訊，只有Ｄ蟹喺度化餌。北風吹埋黎都有Ｄ凍凍地，好喇！今日到此為止，大家收好架生，清理好釣場，囉埋Ｄ戰利品，揸車番屋企喇。拜拜！！

好奈冇釣過嘅(牛廣)(大魚仔)(領航燈)(走排)(JET)唔知邊個啱？

再中條大紅鮋，開心到難以形容。

條牛廣斤七両，釣魚男話佢叫做領航燈。

條紅鮋靚到吖，紅卜卜過喎！

今晚嘅收穫唔錯。

有冇人知最頂果條叫勿野魚，有人話叫(哽死貓)喎！據卜友釣魚男話，呢條叫大眼海鰱或者大青鱗！

再同佢影幅單魚相先。

再戰流浮山蠔排

25-10-2009   (農曆九日初八)  慢流

吸取咗上次流浮山蠔排打龜嘅教訓，今次再去果度玩過，睇有冇進步先。

早上10:00約咗師傅偉，食埋早餐就向目的地進發喇，今次係揸我架老爺車入去，11:45到咗流浮山，見根本先生同良美小姐未到，我地就喺附近嘅士多，坐低飲杯嘢，順便等埋佢地，果間士多仲有Ｄ釣魚用品賣添，我見今日都幾猛太陽，所以買咗件釣魚衫＄150都幾低買，跟往佢地都入到尼，咁就馬上叫艇出排啦。

出到去，跟本先生再揾個遠少少嘅靚排，上咗排，我地分工合作，嗱嗱聲擺好個架步，就開竿作釣喇。我地呢次嘅釣餌係紅虫同青虫，我就帶咗合虾仁試吓，睇得唔得食。

大約過咗十零廿分鐘，我其中一枝竿有魚訊喇(我開咗三枝竿)，小心將枝竿攞起，條魚食得好精口，只感到竿頭有輕輕嘅魚訊，我好有耐性咁等，經過十幾廿秒，終於見竿頭向下彎喇，我就快速往上提竿，中咗啦，係條手板黃腳，好快就將佢收埋上水，落生籠。跟住良美小姐又中黃腳，師傅偉又中魚，佢話好大條喎，收咗兩野條魚就飛出水面，爛肉梭是也，師傅偉驚條魚標來標去，所以大力一拉，咁就將中魚嘅鈎拉斷，唔使比佢將水中Ｄ魚線攪亂曬，真係高手中嘅高手。

釣咗幾個鐘，大家都係間中有Ｄ立上吓，此時我枝竿響鉸喎，一提竿己見條魚高速潛行，跟住飛上水面，又係爛肉梭，我又學咗師傅偉咁樣，將條魚大力一拉，點知因為我用嘅係三號帶腳，所以拖唔斷，咁我將就玩咗一輪，卒知爆咀放魚，我仲開心過釣佢上黎。此時Ｄ爛肉梭空羣來攻，我地四人不停中佢，通通都拉斷絲或拉爆咀放魚，足足有十幾廿條，後尾心諗，Ｄ魚需然多骨，但都係好鮮甜嘅魚黎架，試吓用黎煲湯，我睇都幾好味掛，所以最後都留番幾條。

到咗19:30大家都有Ｄ收獲，開開心心就拾好架生，清理好釣場，20:00艇家埋尼接我地番埋岸。

埋到岸，根本先生話因上次攪出咗個大笑話，另到我地遲咗番屋企，所以今晚食飯佢請客，盛情難卻，我地就一齊去將軍澳食晚飯，可能開心同肚餓，Ｄ餸菜又美味，所以食咗兩碗飯，飽飽之後就別過跟本先生同良美小姐，揸車送埋師傅偉番屋企，我就懷著愉快嘅心情，回家去也。

最後，要多謝根本先生同良尾小姐，佢地安排咁好玩嘅釣行，仲請埋食飯添，真係要再三多謝！希望下次可以同佢地再玩過。

須然未爆箱，但魚獲都算唔錯喇。

Ｄ爛肉梭卒知用黎煲湯，仲加咗Ｄ蕃茄同豆腐落去添，果然冇錯，真係十分十分之好味嘅海鮮湯呀。

清蒸黃腳立，香煎黑沙＆劃，好味。

呀！唔記得講，我仲釣到兩隻瀨尿蝦喎，蒸咗比大人食，佢話麻麻地啫，冇膏又小肉。

落主場洗龜氣

24-10-2009  (農曆九月初七)  慢流

今日手痕，落主場攞番個彩先，19:30落到去照舊開兩枝竿沉底，一枝竿半水釣鱸，過咗半個鐘左右，釣半水枝竿頭郁咗一野，我就想攞起枝竿，點知特然條魚發力，我竿都未揸定就比佢拉到成枝竿彎哂，噢！立即輕哂，初初以為洗鰓斷線，收上黎睇個鈎重喺度，原來爆咀走魚，為有再鈎過隻虾落去喇！

又過咗半個鐘，沉底枝竿有料到，我就火速揸起枝筏仔，條魚繼續食餌，我就輕輕帶起舊餌，條魚就中招喇，一收一頂，條魚唔大，上到水係斤頭細鱗，師傅偉剛剛尼到，順便同我撈埋上黎，跟住影相落生扣。

用細鱗洗龜氣！

跟住冇幾奈，釣友海哥中咗條三斤牛屎，我就攞咗佢黎影吓相先。

番到屋企再影過。

準備劏魚。

流浮山蠔排打龜之釣行

17-10-2009   農曆八月廿九 星期六 大生流    

今日係週末，好開心，第一次同卜友出釣，一早拎齊架生出發，10:30 會合咗師傅偉，食埋早餐，就向我第一次去嘅流浮山蠔排出發喇，架車行到屯門，忽然右手邊架車有個靚女向我地打招呼，一睇，啊！原來係良美小姐同根本先生，我地回應咗佢，就跟住佢地架車一直入到目的地【流浮山】喇！

停低架車，大家互相自我介紹，但係我感覺到，我地好似認識咗對方好奈咁，一Ｄ都唔生疏，等船出排其間，到旁邊Ｄ士多食野，大家有講有笑，好開心。

好彩今日海水唔係退得好多，上船果陣唔使行落泥灘，但係都要濕腳(不過我地有備而戰，一早換定拖鞋)。

根本先生話:揾個靚排先。

大家嘅心情靚靚。

往西部通道關口嘅行車橋。

上咗排，兩個人一邊，我同師傅偉坐定定等運到。

根本先生同良美小姐喺另一邊。

一路都冇魚訊，手絲都用埋，師傅好似瞓著咗咁樣！

佢地休閒到可以喺度開餐睇風景。

我地五竿齊發都冇料到，你地睇唔睇到有Ｄ龜氣呀！

太陽慢慢落入水平線，日落黃昏嘅醉人景色。

天黑大家都未發市，只有欣賞吓西部通道嘅夜景，到咗20:30深圳世界之窗仲有煙花睇添喎！

21:00約咗艇家黎接我地，須然冇魚釣，但係都算享受咗個過程吖。執好架生，清理好釣場，落艇埋岸。

師傅偉話我黑仔喎！我都好白啫唔算黑吖。

依依不捨都要離開架喇！蚝排..........你好野，我下次一定會番黎嘅。

後記：埋到岸，Ｄ餐廳話收檔囉喎！所以冇得喺果度食，跟住仲有個大笑話添，不便講出，我唔話比你地聽，等你地自己咕吖。跟住我同師傅偉別過根本先生同良美小姐，揸車番北角先至宵夜。

最後多謝根本先生同良美小姐，多得佢地安排呢次嘅釣行，使我呢個週未過得好愉快，希望以後可以再同佢地並肩作戰。