雪柜冇魚點得架

30-7-2011  (農曆六月三十)

晏晝打開個雪柜，發覺一條魚都冇，想話喺屋企煮餐飯食吓都唔得，咁就激發起我去釣魚嘅决心喇！19:00落到主場，Ｄ流仲係行得好勁，所以用重少少嘅鉛，開好竿，坐定定，落餌睇Ｄ泥鯭收口未先，開頭幾口餌都比泥鯭化咗，19:30泥鯭收晒口喇，開始有金鼓嘅魚訊，食得好精，但係食咗一陣又停口，忍唔住收上黎睇，噢!!比佢偷食咗添，再落餌又係一樣嘅結果！唔好懶，即刻改變釣組，用番輕Ｄ嘅鉛，鈎亦都改為細1號，但係放番落去，連魚訊都冇埋。

又過咗個幾鐘，一路都好沉悶，到21:15因為開始轉流，我就决定轉位搏，落餌唔夠兩分鐘，見竿頭輕輕郁咗幾吓，嗯!!黎料囉喎！
我即刻執起枝竿，此時魚訊比較明顯喇，特然一吓好重嘅拉力，下意適另到我將竿往上一提，中呀!!速速攪咗三四吓，佢就發力想衝番落去，此時磅頂發出震耳嘅叮叮聲，佢一停落黎，我又追返四五手，一兩個回合就見魚喇，好大餅嘅金鼓喺水裹面高速打轉，我就再將竿提高Ｄ，條魚一到水面就唔郁，喺度辦屎，呢個時候，我就順手落撈箕，一野就入袋，跟住解鈎落生籠一腳踢。

再落餌釣多陣，又係一樣冇乜料到，目的以達，見好就收，喺21:45就執埋Ｄ架生走人喇！

咁早番到屋企，大人未瞓，咁就梗係叫佢同我影番張人魚合照先喇！

睇落須然好大餅，過磅都係得斤半咋！

呢條金鼓嘅体形四四方方咁嘅，好得意。

金鼓真係收哂口

呢幾日都係屎流屎水，Ｄ海水變咗架啡，有

一兩條魚釣到都笑到見牙唔見眼，次次都係

(享受過程)。

25-7-2011  (農曆六月廿五)

金鼓搭條大石九

26-7-2011  (農曆六月廿六)

今晚好彩中番條磅頭金鼓，再加條〝Ａ〞

貨，夠我兩公婆一餐。

話時話!!呢幾晚都係一樣，每當Ｄ泥鯭一收口

(大約係七點零鐘度喇)，金鼓就出黎咬餌，當

釣到一兩條嘅時侯，過程都係喺十幾廿分鐘

，跟住就收晒口，再釣咗三個幾鐘，一口魚

訊都冇，所以都係夠食就算，早Ｄ番屋企吔

飯好過喇。

磅頭金鼓加條〝Ａ〞貨。

大人今次整咗我最鐘意食嘅鴨腿湯飯，等我

釣完魚番黎食，佢話天氣悶熱，食湯飯開胃

Ｄ喎！咁我劏好魚，跟住就開餐喇。

大金鼓食餌動作好狠勁

金鼓用果皮蒸食厭咗，就學人試吓油鹽水冬菜煮黎食，但係味道嘛嘛地嘖，下次都係用番果皮蒸揾陣Ｄ！

21-7-2011  (農曆六月廿一)

(前言):對上一晚釣到11點幾，特然有一吓強烈嘅魚訊，成枝筏仔拉到飲水，磅頂又冇鬆喎，為有就一就佢就屎頂喇，開頭都頂得順，頂咗幾吓，條魚再開尾發力一沖，噢!!輕晒~收番上黎睇，原來斷鈎，(自從釣金鼓以來，我都係用1號鉤嘅)，咩魚黎呢，咁沖法又唔似我釣開果Ｄ金鼓喎，諗黎諗去攪到成晚都瞓唔著！

今晚卒知有答案喇!!今晚我換咗粗骨嘅長柄2號鉤，磅頂鬆少少.....
初時黃昏Ｄ泥鯭未收口，釣咗幾條，到7點幾泥鯭就收口喇，我就好留心睇住竿頭有冇魚訊，落餌唔夠十秒，又係一吓動作就將枝筏仔拉到飲水，呢次我有準備，一見咁情形，即刻抽竿，連攪幾野，果然條魚就發力沖，同上一晚情形一模一樣，好彩我個磅頂以經較鬆咗，佢一沖個磅頂就發出剌耳嘅叮叮聲，如事者經三四回合，大約一分鐘倒就上到水面喇，一睇!!吓~原來係條大金鼓，點解食法同抗打能力，都同釣開較細嘅唔一樣嘅！咁又學多一樣野喇，原來大金鼓唔止識片水，仲會發力向下沖嘅！

須然一條到尾，但係都好開心，又增加咗釣金鼓嘅經驗喇！

過咗磅係斤十二，離目標又行前一步喇！

今晚瞓得著喇~哈哈!!

 

22-7-2011  (農曆六月廿二)

今晚睇吓再用粗骨2號鈎黎釣金鼓!!原來都得嘅，磅頭至幾両嘅魚，一樣中咀，真係好過一號，唔使成日入晒扣，要換鈎咁嘛煩！

呢Ｄ晒士就最好味咧。

買鯇魚就會〝搭咀〞，釣金鼓就梗搭泥鯭嘅！

金鼓熱已經接近尾聲

釣咗成個月金鼓，開始有Ｄ悶，尤其是呢水

魚開始梳口喇，都要轉吓牌頭，釣吓烏頭先

至得，有釣友中咗兩條烏頭喇，都幾大條，

有三斤幾重！等我講埋呢兩次嘅釣況先。

12-7-2011  (農曆六月十二)  屎流

天未黑釣一條，入黑再中四條，五條都係手

板大！釣咗三個幾鐘，一收口就走人，費事

磨爛蓆。

第日蒸咗黎食，原來Ｄ魚肝咁鬼正喎，仲滑

過鵝肝，食到嗒嗒聲！

15-7-2011  (農曆六月十五)  生流

今日太陽啱啱落山18:30，泥鯭一收口就中第

一條，以為陸續有來，點知連釣友四個人，

你眼望我眼，成兩個鐘，枝竿郁都未郁過！

21:00有個釣友「 UNCLE 」低唔住頸，上番

橋面釣烏頭，虾!!又比佢中兩碌喎，我地梗係

唔執輸，嗱嗱聲上番去橋面，轉烏頭釣組，

往海裹發炮。釣咗半個鐘度，開始行流，點

知開始落雨，仲行雷閃電，為安全計，各人

就收竿，走番入橋底繼續釣金鼓。此時開始

仲橫風橫雨，好似打到黎咁，一路雨勢不停

咁落，又冇魚訊，想走又唔走得，望吓個

錶，已經係00:30，為有繼續釣囉！我就轉咗

個位，一落餌就有魚埋黎食喇，食咗一陣就

見竿頭震震吓咁往下彎，我立即抽竿，連收

幾野，條魚開始逃命喇，係咁喺度高速打

轉，我見個水影條魚都幾大，咁就要就一就

佢，跟手兩三吓就上水喇，都有磅頭，黑嘛

嘛費事解鉤，剪繩直入冰箱，挷鉤再落，又

有魚食餌，一抽就中，攪咗幾吓爆咀！01:30

見雨勢開始減弱，各人就執野走人，去宵夜

喇。

悶咗成晚，好彩臨尾中番條磅頭魚。

原來金鼓要食屎流

呢幾晚我都有試吓釣烏頭，不過揾極都揾唔

到，我諗要過埋呢個農曆六月，Ｄ烏頭先會

浦頭，為有繼續玩住金鼓先喇。

7-7-2011(農曆六月初七)

釣釣吓金鼓，我見近水面兩三呎，有幾條好

似金鼓嘅魚喺度玩緊，我就鈎粒麵包落去睇

佢食唔食，哈!!點知一放落去佢就即刻食喇，

第一口餌唔中，第二口餌就即中，攪都唔使

攪，一野就彈上黎，嗯!!銀色嘅，再睇真Ｄ原

來係大眼倉，佢都低屎囉，喺度辨金鼓，仲

比我釣埋上黎添，跟住其他幾條都算唔夠義

氣喇，即刻就鳥獸散。

Ｄ金鼓好疏口，中得兩條同一條Ａ貨。

8-7-2011(農曆初八)

都係冇乜驚喜，釣到恰眼瞓！

 

10-7-2011(農曆六月初十)

早咗落去釣金鼓，見Ｄ泥鯭仲未收口，費事

餵佢，咁就鈎粒虾仁打沉底捱時間，點知一

落就有魚接餌，開頭都幾好力水，就咗佢兩

三野，好快就上到水喇，原來係條拜神西

槽，解鈎落埋生籠，時間啱啱好，嗱嗱聲換

過釣組，轉釣金鼓，今晚屎流都唔錯，有多

幾條玩吓。

唔通Ｄ金鼓真係食屎流!!

後記:金古要開口, 就乜流都開，呢幾晚

24,25,26/7又係屎流，Ｄ金鼓唔開口，魚訊近

乎零，只釣到一兩條咋。

全晚得兩口

唔知係水流關係，益或金鼓開始切退，呢兩晚都好疏口，係轉流果吓先有一兩口食埋尼，食得好精口，完全唔同早幾晚，一放餌落去就搶。

3-7-2011  (農曆六月初三)  大生流

噚晚呢三條係19:00至20:00起緊流中嘅，之後磨多兩個幾鐘，轉埋落流都冇魚訊，唔通Ｄ金鼓要屎流先至搶口！

4-7-2011  (農曆六月初四)  大生流

今晚仲疏口，釣到恰眼瞓，剛起大流中條手板魚，磨到轉落流先至中番口大嘅，全晚係得兩咀，好彩全中。

霖尾中番條斤頭，即刻精神晒！

番到屋企就梗係整番幅開心照喇。

尼幾條泥鯭唔好彩，我喺未入黑嘅時候誤中副車。

有卜友問小弟釣金鼓Ｄ麵包餌點樣鈎，其實好簡單架炸，咁就以我呢十幾次嘅皮毛經驗，同大家分享吓。

呢度大家都睇到唔使講喇！

先將麵包撕開小片，從頂部向下摺一半。

用厚果部份上鈎。

跟住將尾果部份搭上鈎尖，將麵包輕輕按壓(千昕唔好太實)把鈎尖收藏好，咁就完成喇，係米好簡單呢！

呀爭Ｄ唔記得話比各位知，麵包最好買軟滑Ｄ嘅，因為等Ｄ魚食餌果陣時冇咁容易散。