釣開魚一發不可收拾，今日又去泊邊踎吓先得；一去到又係開三枝竿，一枝小磯竿，兩枝筏仔，都係打沉底。
18:30Ｄ落流開始慢，筏仔即時傳來魚訊，一抽即中，中途有些微反抗，好快比我收到上水面，原來係斤幾嘅黃腳，，撈箕上水，即落生籠，落餌繼續；唔夠五分鐘，又係呢枝竿有料到，睇住佢輕輕拉咗幾吓，我執起枝竿往上輕輕一帶，條魚就搶餌，一抽又中，今次Ｄ力度好猛，所謂中魚頭三手，所以快速攪咗六七吓，條魚知賴野，發力開尾，嗯！仲唔係對像魚（細鱗）～見佢發哂狂，焗住放兩三呎佢走吓，跟手連頂帶攪，一Ｄ都唔放鬆，幾個回合就上到水面，唔怪得咁好力喇，條細鱗足有兩三斤重，撈箕上水，入生籠落餌繼續。
又過咗一陣，枝磯竿仔特然成枝彎哂，執起枝竿想話收繩，點知一吓都攪唔郁，頂咗一陣，勉強攪咗幾吓，條魚再衝我就唯有再頂，今次冇咁好彩喇，頂咗一陣就斷線，即刻輕哂，斷主線我諗係Hi到石邊，收上黎再挷番個釣組落餌繼續；唔夠兩三分鐘，另外一枝筏仔響鉸，九秒九飛撲埋去執起枝竿，遲咗喇，條魚以經過石，再標又輕哂！連斷兩口，唯有屎屎氣再挷過鈎睇仲有冇運行至得。
又過咗十幾分鐘，又見筏仔輕輕彎咗幾吓，哼！又係細鱗喇，執起枝竿條魚繼續食餌，今次唔等條魚搶餌喇，見較為食得深果吓就抽，又中！即攪五六吓，帶離底石就頂陣先，鬆一鬆再收，又攪咗七八吓，再頂一陣就快速收線，將條魚帶到水面，又係兩三斤嘅細鱗，，撈箕上水，落埋生籠，落餌後要抖抖氣至得喇；啱啱飲完啖水又響攪，唔係嘛，想抖吓都唔得，呢頭執起枝竿，果頭條魚就想發力，我連頂帶攪，一吋都唔比佢，一帶順就係咁收，好快上到水面，我就索哂氣，又係差唔多晒士嘅細鱗，撈箕上水，生籠都費事落，直入冰箱，唔釣喇，再中就斷氣都似，兩個鐘內同五條火車頭搏斗，手都軟喇，都係執埋Ｄ架生，有魚留番下次釣，鬆人去宵夜好過喇！
番到屋企，大人未瞓，梗係向佢揚威耀武一番，再叫佢同我影番幾幅相先喇！
細鱗條條都兩三斤。
黃腳斤幾重。
兩個鐘嘅魚獲。
沒有留言:
張貼留言