細細地釣住先

26-10-2015  (農曆九月十四)
今日晏晝過尖沙咀開完茶會，嗱嗱聲番屋企執埋Ｄ釣魚架生，喺街市買Ｄ蝦就去釣魚喇。
18:30落到去開好竿，今次開兩枝筏仔釣沉底，一路釣到落流都未有魚咬過，谷鬼氣收起兩枝筏仔，換枝小磯竿諗住釣Ｄ魚仔過引吓，落餌一路順流放線，舊餌到底就有魚咬，一抽中咗，收上黎係劃仔，再落餌又有魚訊，一抽，嘩！好重手喎，成枝竿彎哂，唔好話攪，連頂都頂佢唔起，呢Ｄ扯法唔駛問梗係細鱗喇！頂咗一陣綫杯就出綫喇，咧咧聲出咗一陣，頂番起就即刻追番幾手，攪佢唔郁又頂，又出綫，頂起再攪，如事者四五個回合，條魚開始軟喇，跟住我就頂吓收吓，收到上水面，真係細鱗，睇落有三斤重，唔怪之得咁好力喇，撈箕上水，跟手落埋生扣，落餌繼續；再釣多兩條劃就以經十點幾喇，Ｄ東風越吹越勁，都係執野走人，去宵夜好過喇！

呢條細鱗夠大喇掛。

細鱗三斤仲有幾條劃釣吓。