下午主場打龜晚上再戰南丫煤橋中大花鱸七斤洗龜氣

24-4-2009 (農曆三月廿九)生流  星期五

今日因為三點轉流，諗住下午落主場博吓，點知釣咗兩個鐘，流又急，一口都未咬過。

特然高橋雪也來電，相約晚上八點，殺入南丫煤橋。都好喎！都好奈未去過，就嗱嗱霖收野去食個飯。

入到香港仔，泊好架老爺車(金Ｘ停車場夜泊都係40大元一晚)，攞埋架生到隧道口會合上艇，經過四十分鐘船程到咗煤橋，我同兩個釣友埋大樁，雪也一條友埋五樁，上到樁即刻開好枝釣鱸竿先，鈎隻大眼仔落去打十五呎水深，等運到！

跟住開埋兩枝沉底筏仔釣水底怪物，第一條起條絲立，心諗呢次過引喇，點知跟住黎嘅係坑濂六條、泥婆兩條、骨鱔一條，冇哂引。

跟住幾個鐘都係冇動靜，得Ｄ石九仔玩吓，到凌晨兩點開始轉流，發覺枝鱸竿有動靜喎！就飛身埋去准備博殺，點知條鱸食得好精，竿頭嗒咗幾野，跟住停咗，小心收隻虾上黎睇下，虾就比佢咬死咗，唔開口喎！我就立即換過隻極之生猛嘅虾乸落去睇吓點，唔夠一分鐘隻虾開始跳，我就攞起枝竿准備，一吓好強嘅魚訊，我知中咗喇！往上一抽，條魚就發狂往外標，佢死梗喇！我就都冇就佢即刻用筏釣第一式(無敵快速摩打手，師傅偉教嘅)！抽佢上水面，條鱸想開尾，邊有咁易，你咕上次炸咗果枝乜乜王子流竿牙，呢次我用番以前枝好嘢，一頂就將條友仔個頭拉出水面，等佢飲幾啖水先，再用(左右迷暈大法)，條鱸立即軟哂，釣友幫我撈魚上水，跟住影相落生扣，都算攞過尾彩。過咗一陣艇到接我地番香港仔，上岸食個叫做早餐，之後開開心心攞車番屋企，番到屋企劏魚、洗架生都天光囉！

呢次仲唔威呢骨。

你睇條七斤鱸魚幾肥美。

二公主出嫁喇

18-4-2009  (農曆三月廿三)星期六

今日我同大人六點就起床，準備所有野，各方長老齊集到我家，等新郎哥Summer黎我家接新娘。十點準時黎到，六仙女姊妹出動玩新郎，跟住我將二公主交比新郎哥，長輩飲茶，跟住出門。

下午四時，我同大人到旺角朗豪坊酒店七樓宴會廳，準備婚宴。賓客陸續到場，六時舉行註冊婚禮，我做証婚人簽名，九時入席，Ｄ餸菜都好正，招呼冇得彈，過程洋溢喜慶氣氛，我同大人都好開心，到十一點幾送客，十二點幾完成準備咗幾個月嘅婚禮，懷著愉快心情開車反屋企。
Summer同二公主Fiona向我地酙茶後收禮物。

如果想睇更多相片，請移玉步，到我的主頁相簿(二公主出嫁特揖)，就可以將所有相送曬比你地啦！哈哈！

師傅偉大發神威再中大紅鮋

14-4-2009   (農曆三月十九日)    生流

幾日冇釣魚，手痕痕又執架生去主場搏殺。落到去剛好開始轉流，肥仔戴係度釣緊魚仔，我就開竿搏大野，擺好個陣，坐低冇奈半水枝竿有魚咬，而且食得好狼死，我等佢拉竿時就抽竿，唔比佢發圍，好順咁攪咗十吓八吓，見魚啦，好大條鱸起碼五六野，肥仔戴幫我做魚童，但條魚一見撈箕就發惡開尾標番落去，我就放比佢四五呎繩，點知佢係馬拉松選手，段段有，我局住再放多手，一收一放四五次，我開始冇氣手軟，好彩佢都上水反肚，魚童戴就一撈入箕上水，唔該哂佢，跟住落生扣養住，再落餌繼續搏殺。天黑七點幾八點上番橋面，師傅偉剛到，佢話要落橋底釣鱸，一落去冇幾奈就比佢中條五斤花鱸。跟住上好餌再落去，一陣又見佢行番上番，嘩！手中撈箕載住一條三斤多嘅紅鮋，真係師傅即係師傅！呢次我同佢做魚童啦！嗱嗱聲剪鈎影相，跟住入冰箱，唔比Ｄ捧場客見到，執埋架生，收好Ｄ魚就同佢一齊走人啦喂！

師傅偉同三斤幾嘅紅鮋。

我都借條紅鮋黎威威。

拎左番屋企再同埋條六斤花鱸合照。

一身大汗都要影咗先。

又准備劏魚啦。

大人要食石狗仔

11-4--2009    (農曆三月十六)   大生流   日水

今日起身求其食咗個早餐，無所事事，大人話要飲石狗湯喎！咁我就喺雪柜攞Ｄ千年雪蝦做蝦仁，餌都唔使買，就落去主場踎吓。

去到見黑仔已經喺度釣緊，趁佢未行流，就開兩枝竿，一枝虾仁沉底搏大霧，另一枝就釣樁口石狗。

開始行流Ｄ石狗就開口，一連釣左十幾條，Ｄ流又開始轉急，沉底條魚線比流吹到飛起，都係早走為着，釣咗兩個零鐘，過咗手引就算喇，跟住執野番屋企煲海鮮湯囉！

石狗公用黎煲湯至正

呢次輪到我一開竿就中三斤青班啦！哈哈！

8-4-2009   (農曆三月十三)   東至東北風  生流

今日起身，大人買咗個栗米肉粒飯比我，食飽飽開电腦睇吓流水，14點起流，即刻立架生飛車落主場，到咗主場己經見黑仔同流哥係度釣緊，佢地己經中咗兩條鱸仔，我就嗱嗱聲開竿，第一枝開沉底，落好竿跟住再想開第二枝鱸竿，點知沉底果枝竿己經響鉸，我就飛埋去攞起枝竿成作戰狀態，一吓條魚就將竿頭拉成７字，心諗大野，我更加小心，立即向上一抽，用9秒9嘅速度收幾手線，條友仔想向左面發力過石，我就將佢順勢抽起轉右，佢即刻冇晒方向感，我就睇準呢個時機，使出筏釣嘅絕技(無敵風火輪)一頂幾收，唔使半分鐘，己將佢扯上水面，跟住落撈箕上水，嘩！成三斤，落生扣養住，再開埋開咗一半果枝鱸竿，跟住師傅偉又到。過咗一段時間，中多條泥婆，水流十分急，就懷著愉快嘅心情，同佢地講拜！拜！

招積得我吖，天氣特別好。

真開心，青班三斤。

抱住班班影幅沙龍先。

起肉炒球，頭、腩、尾清蒸。

中親花鱸，多數一双一對

6-4-2009   (農曆三月十一)  大東風  晚水 

今日得閒冇特別野，約埋師傅偉，又落主場走番轉，落到去大佬存同呀海己經係到釣緊，我就拿拿冧開竿，冇幾奈就中魚，三斤花鱸，跟住偉哥到，一落竿又中四斤半花鱸，跟住靜哂，沉底果兩枝竿有一枝頭嗒嗒，順手扯上黎，又係泥婆，收埋佢落冰箱，過左一陣，見冇乜動靜，成十點幾鐘，風又大，又開始落幾滴雨，都係執野走人嘅時候啦！

拎住兩條花鱸影幅相先。

又有餐餸啦。

第一次中嘅大花追

3-4-2009   (農曆三月初八)   大東風

朝早起床，大人出咗街，自己整早餐，攞Ｄ麵粉、雞蛋、做班戟，加杯奶茶，飽哂！

冇咩做，又走落去主場，睇有冇運行。落到去五點幾，同Ｄ友仔吹咗一陣水就開竿，到六點二十分，沉底果枝筏仔好似比蟹拉一樣，但好大力，禾就想唔比佢拉埋石，就順手一抽，點知呢一抽立即有反應，竿頭向下彎，禾就向上頂，一路收都冇乜力，只覺有舊野聚住咁，就黎上到水，佢重鈎住條樁添，睇下係乜傢伙，原來係一條花斑斑嘅花追，攪左成個字先拉番條友仔出黎，跟住上水，叫人影好相就放入冰箱。跟住再釣隻紅花蟹，今日真係唔知釣咩魚！都係執埋Ｄ野走人好過。

我嘅早餐：班戟～加糖漿、牛油。

加埋杯特大奶茶添.......正～

花追Ｄ花紋圖案幾靚。

同隻紅花蟹一齊影番幅相先。

又話要影張單蟹相喎。

花追嘅大頭似唔似史前恐龍呀。