颱風前先至中紅鮋，仲起雙飛添。

14-7-2010  (農曆六月初三)  

今日約咗師傅偉落主場，睇有冇烏頭釣。見時間仲早，我就出發前喺屋企個雪柜度，攞咗盒千年雪虾，搣好Ｄ虾殼，準備用虾仁釣魚仔玩吓！

18:30落到主場，剛剛開始起流，我就剩係開一枝筏仔，鈎粒虾肉放落去，坐定定等運到！

19:15釣咗一陣，特然記得有個師兄曾經教過我，落咗餌，久唔久拉起佢，引吓Ｄ魚埋黎咁話！咁我就試吓喇，我就慢慢提起枝竿，等粒餌離地，又慢慢放番低佢，如是者兩三次，個心諗...得唔得架!!點知話口未完，感到竿頭郁咗幾吓，我就即刻靜止動作，當佢大力一拉果吓我就揪竿，跟住連攪幾野，嘩！好好力水喎，一頂一收，兩三個回合就上水面喇，嗯!!紅鮋黎喎！自已用撈箕撈埋條魚，落埋生扣一腳踢。

呢個時候師傅偉啱啱到，佢就開竿釣烏頭，我就繼續用我嘅虾仁釣沉底。

放餌落去唔夠十分鐘，又用番之前咁嘅動作，果然又有魚訊，當佢用力搶餌果吓，我就揪竿，又中呀！都係好好力水，咁我就知又係紅鮋喇，快手快腳將佢上水，跟住落好生扣，再鈎過餌放落去。

呢次落餌就冇晒動靜喇，一路釣到21:30，轉咗幾次位，都係冇料到，算喇！見好就收，拾埋Ｄ架生就過去睇師傅偉有冇老烏釣先。過到去佢話一口都未食過，可能日子時間仲早，睇要打完呢場颱風先至有得釣囉。

22:00就收埋Ｄ魚穫落冰箱，早Ｄ去宵夜好過喇！

好彩有師傅偉同我影相嘖。

驚影唔到再補多飛先。

番到屋企大人未瞓，佢話同我劏魚喎！佢

邊

識劏吖，最後

米

又係由我操刀！

都幾好，一條斤十兩，另一條斤四。

呢幾條下價野係上個星期二釣嘅！爛鬼星

鱸

(我大人話

）

斤幾。

花頭梅＆石九。

幾次釣况一次寫埋

8-5-2010  (農曆三月廿五)

魚穫:花鱸斤半,青班仔磅頭。

釣况過程沉悶，亳無驚喜，所以儲埋到而家先出卜，比大家黎睇睇，好過冇咁咋!!!!

跟住落尼係28-5-2010  (農曆四月十五)

魚穫仲攪笑:花鱸又係斤鬆Ｄ,泥婆(油追)都係斤鬆Ｄ喎！

沉底中親都係泥婆，Ｄ鱸以經回歸，所以都好疏口，越來越冇心机喇!!!!!!!!!!

捱到咗4-6-2010  (農曆四月廿二)

卒知比我起番條似樣Ｄ嘅魚喇:海紅魚斤六。

今次我出新招喇，攞番枝投竿，加粒二號大波子鉛，出行力掟出海中心，起碼有成百米，沉底等運到，果然喺轉流期間，竿頭郁咗幾吓，一吓重拉我就往上提竿，我知中咗魚，但條魚又冇勿反抗，初時我以為鈎住Ｄ垃圾，攪到上水先有少少力，五號絲唔怕斷，一野掟佢上岸，費事洗撈箕，個心開到不得了，知道原來個海仲有魚嘅！

5-6-2010  (農曆四月廿三)  

魚穫:五六斤手扳黃腳,小魚一斤。

話說中紅魚前一晚，同師傅偉喺主場釣龜，佢約我同Ｄ卜友上澳頭釣番轉好唔好，我梗係應承佢喇！

果日晨咁早我就同師傅偉去到羅湖口岸，會合snoppy同埋佢bf 大衛，就向澳頭進發，到咗澳頭先去買好糧水釣餌，09:00就落船，喺Ｄ浮泡度釣咗陣，12:00左右就去蠔排釣下半場喇，全日都好疏口，共釣得廿零條度黃腳，小魚一斤，所以都懶影魚穫。釣完魚喺澳頭望X樓食埋飯，番到屋都係 11:00。

途中影吓自拍先。

今次艇家係細老表

初頭風平浪靜，陽光普照。

釣完浮泡，再去釣蚝排。

師傅偉忙於挷釣組。

大衛都係揸住枝善良之竿。

隔冇幾遠都見幾艘釣艇，見佢地都係冇乜點起過魚。

冇魚食餌，師傅都屎。

立后喺度係咁喂魚。

釣手細老表都冇晒符。

大衛諗住釣開Ｄ，出力一掟!!點知.........

妖～個橫攪炒咗粉添////#＊

卒知攪咗一輪先至攪番惦，再繼續釣。

偷到幅魚穫相，大家先有得睇咋！

釣到17:00走人，回程時風大湧大，師傅話都有四五級風喎！我居然無事，我諗我巳經習慣咗坐艇唔暈浪喇。哈！哈！

喺依度要多謝大衛同snoppy安排尼次舒息嘅行程，最后仲比埋Ｄ魚我，使我過咗一個開心愉快嘅週末。多謝！多謝！

大花鱸難釣，細花鱸精過鬼。

30-4-2010  (農曆三月十七)  生流  温暖 

經過前晚中魚之後，今晚食過番尋味，再落主場搏殺。睇過癲人台嘅流水表，全晚都係起大流，所以慢慢都未遲，落到去已經19:30，開好竿師傅偉又來到，我就喺橋面，佢就落橋底，佢落咗去唔夠一分鐘，就見佢上番尼，氣喘如牛，完來又比魚KO咗，佢就手震震咁再挷過釣組，再落過去釣，我就依然喺番橋面呆等。

到咗成22:00見我枝竿頭輕輕點咗幾吓，我就即刻攞起枝竿，點知條魚唔拉落去，反而升水打橫飛埋樁，我比佢特如其來嘅動作嚇一跳，慢一慢就包咗樁，仲貼住樁與樁中間嘅一個千鞦架，見環境咁鬼復雜，咁我就緊係唔敢用力拉喇，放慢速度，一拉一放，佢都唔肯出番黎，大家薑持咗三四十秒，我心諗咁樣落去唔多樂觀，就即刻一手持竿，一手拉起個千鞦架，嘩！都幾重架，哈哈！個架一郁，條魚就嚇到標番出尼，離咗樁就易攪啦，佢只係離水面四五呎，見佢唔係好大，我幾吓手勢，就將佢升水，仲要成條飛佢上岸，生扣都費事落，即入冰箱。

又過咗一陣23:00見大家都冇魚訊，都係鬆人嘅時間喇，嗱嗱聲執埋Ｄ架生，清理好釣場，一齊去宵夜喇喂！

尼條就係精過冇尾蛇，斤零重嘅花鱸仔喇。

卒知比我起到喇！

28-4-2010  (農曆三月十五)  生流  暖

今日晏晝同大人過咗尖沙咀開茶會，準備下月四號出發日本北海道四天之旅。攪惦晒都成六點幾，見都仲有時間，嗱嗱聲攞起釣魚架生，就往主場再搏殺。

落到去都七點幾，見仲未轉流，就慢慢開好兩枝竿，一枝沉底博大霧，一枝十幾呎釣鱸。八點師傅偉又到咗，一路都冇魚訊，佢話今日多數都係龜架喇，到十點佢就執野走人，我就繼續磨爛蓆。

佢走咗冇幾奈，大約十點七左右，我都諗住走人，收起枝沉底竿先，點知特然間聽到一吓微弱嘅鉸響聲，我即刻放低手上枝沉底竿，走番過去攞起枝釣鱸竿，一攞起已感覺到有魚拉，仲係大野添呀，我都費事抽竿喇，即刻就快速攪咗六七野，但條魚就發力開尾，我就比番幾呎佢走吓，當我再用力拉嘅時候，見條鱸出現喺隔咗兩枝樁果度，飛出水面想洗鰓，我心寒一寒，屎喇又包樁，仲要包兩枝樁添，焗住立即放攪，比佢鐘番落去，我再用陰力一帶，順勢攪咗八九野，將條魚帶順番出黎，再攪幾野，條鱸比我收上水面喇，跟住用力張佢抽高少少，再一左一右咁帶咗三吓，佢就冇晒方向，反肚投降，我就速落撈箕將佢上水，即落冰箱，順手執埋Ｄ架生走人喇。

叫老友King Kong 仔同我影相。

好奈冇上過魚，所以特別開心。

番到屋企大人又瞓咗，唯有自拍喇。

都係咁樣有形Ｄ。

花鱸五斤四 73Cm

師傅出馬，【KO】七斤半大鱸。

26-4-2010  (農曆三月十三)  生流  微風細雨

今日唔知點解，好似好有信心釣到魚咁喎！18:30落到主場，師傅仲未到，我就開好竿，打雀咁眼，看住Ｄ竿，此時師傅偉又到咗，佢就開兩枝竿釣鱸，傾傾吓計，佢有枝筏仔響鉸，我就即刻跳開，睇師傅表演，佢一抽即中，仲話尼條鱸好大條，開頭見佢攪得好順，我就準備撈魚，點知條鱸見光就發力開尾往下衝，只見師傅不慌不忙，好鬼瀟灑咁鬆幾手比佢，帶順即攪七八吓，條魚再衝，佢又再比，如是者五六轉，經過成三四分鐘嘅人魚角力，勝方梗係師傅偉喇，我當然係做魚童撈魚上水，影相落生扣一腳踢。

條鱸上到水面冇晒力，仲反肚添。

我都攞黎沖喜吓。

過咗一陣尼次到我鉸響喇，我一埋去就抽竿，唔理三七廿一就先攪七八吓，嘩！以經見魚，又係大野，我就冇咁好彩喇，佢一開尾就打橫衝，我頂都頂唔住，又驚住炸竿，所以比幾尺佢走吓，點知就出事喇!!又包樁......，我想拉佢出黎，但比佢一發力就斷埋，噢！有冇攪錯，餐餐都係咁嘅，唔好嬲!!!收番上黎挷鈎再釣過。

又過咗半個鐘，師傅偉都斷咗條，我話:而家Ｄ鱸咁鬼難釣嘅！師傅話:Ｄ海水暖番，所以Ｄ魚活動力強咗，唔似得冬天咁順灘架喇！啊~~原來係咁。

21:30流水又轉急，仲落雨添，我睇Ｄ魚都唔開口架喇，都係唔磨爛蓆囉，執埋架生，一齊去宵夜好過。

番屋企過磅，條花鱸足七斤半。

花鱸七斤半78Cm。

重有隻石蟹孝敬吓大人，都成六七両架。

斷魚斷到服晒，求其寫番次

23-4-2010  (農曆四月初十)  生流  溫暖

我都好奈冇寫過卜喇，事關自從去完旅行番尼，都釣過十幾次魚，但係每次唔係打龜就斷魚，大大話話都斷咗十口八口，都唔知係米喺越南拜天后，以為會保佑我釣多幾條魚，誰不知天后娘娘大發遲悲，放生晒Ｄ魚，攪到我尼輪冇哂引。

講番今日嘎，又同師傅偉去釣番轉，18：30落到主場，開第一枝竿釣鱸，我都未曾開埋第二枝竿，已經響鉸囉，我都未攞得切枝竿，條魚好快就發力喇，到我攞起之後，佢再一沖，噢!!!!又輕哂，收番上黎睇吓，冇咗個鈎，又比佢洗鰓走咗，真係嬲到手都震埋，口中念念有詞~@＊＃~，跟住沉底嘅就中埋Ｄ泥婆坑簾，冇幾奈，師傅偉又斷一條，我地都係『同是天崖倫落人』囉。喺極度冇引底下，22:00執埋架生，去宵夜好過喇。拜拜！！ 

釣埋尼Ｄ野，真係失禮屎人。