夜戰南丫，吹大西北，仲要落埋雨，好彩有回報！

15-12-2009  (星期二)  農曆十月廿九  大生流  大西北風仲落雨

早上(其實都十二點幾囉)食過早餐，見得閒就攞Ｄ釣具出黎整理吓，點知唔掂尤自可，一掂條釣魚蟲就〝共共〞吓，嗱嗱聲飛電揾釣友<高橋>去南丫釣番轉，佢話：「癲人臺」報告今晚會轉吹大西北，仲話會落雨添。我話：咁你去唔去吖！佢爬緊啖飯都吐番出黎，連聲去呀！去呀！咁就約定五點半喺鴨脷洲落艇出發。

四點半接咗高橋，入香港仔買埋魚餌，過洪勝碼頭泊好車，買定糧水(鹵水鵝米)五點半就落艇向南丫出發喇。呢次因為驚大風大湧，所以約咗X金架艇，佢架艇大Ｄ定Ｄ。落咗艇一路都風平浪靜，我話「癲人臺」都冇時準嘅，咁嘅風浪仲話大西北添/////

六點幾到咗目的地煤橋，高橋上番六樁，我就梗係上番大樁喇！開好竿見冇乜流，就諗住開餐喇，點知半水枝竿發出滴滴~滴滴嘅出線聲，我立即放低碗野，提起枝竿，但條魚仲食緊餌喎，跟住仲帶住魚餌往外游出，我梗係唔比佢咁做，輕力帶一帶佢，一緊口就順勢收佢埋黎，埋到黎見係斤頭鱸魚，諗住一野就飛佢上岸，點知出事喇~~爆咀收場##

第一條魚走咗，通常全程打龜，七點半個天開始落雨，好勁嘅西北風，Ｄ浪湧都打上黎，好彩我企咗喺背風位，Ｄ風同雨都吹唔到我，話口未完，又有魚訊，不過上黎係最煩嘅泥婆，跟住又係泥婆，Ｄ流又開始起，唔得啦要轉位喇，食埋碗鵝米，跟住轉咗去食風位，嘩！真係幾大風喎.........

真心嘅釣魚人，係有回報嘅！到咗八點幾，我頂住風雨，落餌唔夠一分鐘，就中咗條六両火點，精神為之一震，唔夠三分鐘，我放隔離枝竿又起條斤頭花鱸，又收到高橋來電，話中咗對象魚「馬友」，我立時信心大增。

如是者又過咗幾刻鐘，望吓個錶，九點半左右，風同雨繼續無情地往我身上打，但唔會減退我嘅信心，特然見枝筏竿竿頭微微點咗幾吓，又有料到喇，打起精神，手持筏劍，十足站立喺風雨中嘅戰士，我輕輕將筏劍一帶，下邊條友仔就發難喇，嘩！爆發力係好強橫，我立即往上一揮，快速攪咗八九吓，頂咗一陣，再使出【左右野馬分鬃】，條友仔回氣再爆，我就比幾呎線佢走吓，見佢速度慢番，就使出師傅偉教落嘅獨門絕招【無敵風火輪】，左頂左收，右頂右收，唔使一分鐘就見條兩斤幾嘅細鱗到水面喇，呢次唔敢輕敵，用撈箕上水，落埋生扣，即刻再落餌釣。

十點幾，Ｄ雨停咗我都唔知，見筏仔竿頭又郁喇，跟手再起多條兩斤細鱗。Ｄ流開始轉急，之後個多鐘都冇魚訊，都係見好就收，執埋Ｄ架生，清理好釣場，休息咗一陣，到零晨一點，就同高橋上番黎接我地架艇，回程時風浪都好大，呢次又比癲民臺叻番次，番到鴨脷洲，攞咗車就過香港仔宵夜，送埋高橋番北角，番到屋企都三點幾喇！

呢次釣得咁幸苦，但有咁嘅收穫，又過足引，都算係一個好好嘅釣程囉！拜拜~~

真係要著件紅色衫先有運行，好似香港足球隊咁就係喇！

幾乎爆扣，值得開心。

當晚個人魚穫(細鱗×2、花鱸×1、火點×1)，
仲有三條泥婆揼鬼番落海＃＊

見高橋得條馬友仔，我就比咗條細鱗佢攞！

釣幾條魚仔比你地笑吓先

2-12-2009  (農曆十月十六)  大生流

果日趁大人去咗街未返，就鼠咗去釣魚，因為第二日仲要參加美食之旅去奥威斯玩兩日，佢實唔比我去釣魚喇，但釣魚蟲咬好難頂，番黎比佢鬧先算！

19:30落到主場，釣友黑仔喺度釣緊，問佢有冇景，佢話Hi都未Hi過，跟住榮哥同戴哥都加入戰圈，我就揾過靚位開好竿等運到。

真係等到21:00枝竿都未郁過，橫惦冇魚咬，我就開多枝竿，掟出去睇有冇劃仔玩吓，點知有隻簾魚艇埋黎，我為有收線喇。比佢攪咗半個鐘，卒知等到佢收網，我以為可以輪到我玩吓喇卦！點知第二架簾魚艇又埋黎，真係有冇咁多魚簾呀！我見佢地嘅收穫都係麻麻，冇勿魚穫。22:15終於第二架簾魚艇走埋，我就掟番出去睇有冇漏網之魚喇。

第一口餌掟出去，好快有反應，上黎嘅係劃仔，再落去，拖咗口餌一吓，嗯！唔覺係劃嘅食法喎！好精口，我就輕輕再拖吓舊餌，佢就發狂喇，一野就比我抽中，有Ｄ力喎，咁我就玩咗一陣，上黎原來係喺我嘅釣點好少有嘅黑沙，精神為之一振，跟住都係劃仔，又係劃仔。23:30又開始靜晒，都係拾埋Ｄ架生鬆人。

食埋宵夜，番到屋企劏埋魚，清潔好魚具，仲要冲凉，跟住執好幾小時後就出發嘅野，卒之攪到夠鐘，大人都瞓醒覺，我就煲杯奶茶飲吓，食過早餐，換好衫，就同大人出發去奥威斯喇！

都有十幾條劃仔比我過吓引！

仲有條磅頭黑沙獎勵吓添。

跟住第日就辛苦囉！要想知勿野事，請看下回分解！

旅行前一晚都要釣番轉

20-11-2009  (農曆十月初四)  生流

今日執好哂聽日去旅行嘅野，無所事事，都係要落主場止吓痕先至得，拿拿聲攞埋Ｄ架生，買好魚餌，就向主場進發喇！

19:15落到去，己經見到師傅偉喺度釣緊，同佢傾咗幾句就喺樁頭開竿，擺好個架步，就同Ｄ老友吹吓水，好快又到咗21:00，依然未有魚訊，Ｄ風吹埋黎都有Ｄ凍，過咗一陣，枝竿頭彎咗一吓，嗯！有料到，立即攞起枝筏仔，感覺到係有魚食餌，特然比佢拉咗一野，感到係大野黎，但係又唔係中喎~等咗一陣，又冇勿動靜，就收番上黎睇吓，噢！隻蝦比佢搶咗，連隨喺同一位置，再落過餌，唔到一分鐘條友仔又黎偷野食喇，竿頭又係輕輕一吓一吓咁彎，特然見條魚絲走向左面，我就向反方向輕輕一帶，佢就向番右面走番過黎，但呢次嘅速度比較快，我順勢提高之竿，條魚卒之知道賴野喇！想發力過石，我有準備，點會比佢得程，一揪竿跟住連攪七八吓，己經離開危險地帶，佢再向下衝，我就比兩三呎線佢囉，跟住輪到我發力喇，一頂幾收，唔使一分鐘就將條友仔拖上水面，只見漆黑嘅海中，銀光一閃，兩斤幾嘅大黑牛就好乖咁入咗撈箕喇！上咗水，嗱嗱聲叫老友呀海同我地影相，跟住落埋生扣。

再釣多一陣，偉哥話好凍，又冇魚訊，22:15拾埋架生，清理好釣場，一齊揸車去宵夜喇喂！

睇吓幾大餅牛屎，中咗魚個人即刻唔覺凍。

番到屋企，三公主未瞓，就同我地影番張合照先！

肥美大黑牛兩斤六。

天寒地凍中細鱗

13-11-2009  (農曆九月廿七)  東北風  生流

今日食咗晚飯，成七點幾先到主場，都幾大風吓，好彩著咗件比較厚嘅風褸，所以唔覺凍，開好竿，坐定定等運到，須然有流，但係唔算急，諗住飲啖水，沉底枝竿頭特然一彎，又彈番起，唔似蟹喎！係有魚試餌我除即攞起枝竿，收緊多餘嘅絲，過咗成十秒，竿頭又傳來魚訊，呢次食得好密，感到一吓強而有力嘅拉竿，我就往上一揪，連攪七八野，覺得佢有Ｄ力水喎！咁就慢慢頂一陣，將條友仔帶離危險地帶先，跟住一頂一收，半分鐘就上水面，啊！又係細鱗，落撈箕上水，費事落生扣，直接入冰箱。

再釣咗個零鐘，都冇動靜，剩係喂蟹，Ｄ流又開始轉急，都係拾埋Ｄ架生，早Ｄ去潤記食宵夜好過喇！拜拜！

等叔叔抱抱。

佢有夜視眼架。

呢次我知尼條係叫大眼海鰱喇！

11-11-2009  (農曆九月廿五)  大東風

今日一早起身，同架老爺車去驗車，買保險，又去運輸處攞埋行車証，攪咗大半日，見晚上得閒，就落主場玩番轉！

19:20落到主場，嘩好大風喎，心諗今次多數都係龜啦。開好晒竿坐定定等運到，點知全程落流都冇魚訊，剩得Ｄ蟹喺度偷食。停咗流我就轉個位，又過咗幾刻鐘，釣半水果枝竿有幾吓輕微嘅魚訊，我就拎起之竿準備，佢好快就有反應，一吓強而有力嘅魚訊，我就往上一提，中呀！但感覺唔係咁重，條友仔飛快出海，初初我重以為係小鱸魚，同佢玩番兩轉先，但好快佢就冇勿力，咁我就收佢埋黎一睇，咦！唔係鱸魚喎，係大眼海鰱喎，一野就飛佢上岸，費事洗撈箕，影好相，放入冰箱，繼續釣。

23:30都好！有一咀過吓引，見再冇魚訊，就執埋架生，清理好釣場走人，去食埋宵夜就番屋企喇！

條海鰱斤零重，但冇勿力水。

同佢影番張合照先得。

昇盤比例照都唔少得。

清蒸大海鰱，須然多骨，肉質較淋，但勝在有魚嘅鮮香味，一個字~~正！！

中完牛屎再中馬屎

9-11-2009  (農曆九月廿三)  慢流

今日諗住喺屋企抖吓，點知中午時高橋雪也來電，想今晚去南丫玩轉，我立即就比佢挑起條釣魚根，一口就答應咗佢。

呢次我揸車接埋佢，17:30己經入到香港仔，買好魚餌，再過鴨脷洲泊好車見時間尚早，就喺附近食埋飯，大家傾吓釣魚計，19:15到咗約定艇家時間，就行開去碼頭上艇，向南丫島進發。

20:10到咗目的地煤橋，我簡咗上大樁，點解我鐘意上大樁釣呢？因為果度地方夠大，舒服Ｄ，高橋就鐘意上六樁。

上到去開好竿，照例兩枝筏仔沉底，一枝半水釣鱸。過咗差唔多兩個鐘，都係Ｄ零星小魚偷食，咁我就轉一轉位睇過點，見口渴就飲啖水先，呢頭放番低枝水，果頭就響鉸，呢次唔係一枝響，係兩枝一齊響，我一手攞起枝筏仔，另一枝就用腳踏實個鉸唔比佢出繩，手中枝竿就已成弓形，條魚已開始發力，我往上一提，跟住攪咗六七吓，條魚已受控制，再望吓腳下果枝筏仔，巳經比條魚拉到幾乎炸竿，為有將隻腳鬆一鬆佢，點知係咁出繩，我見佢慢番落黎，又踏番實佢喇，跟住嗱嗱聲顧番手中枝筏仔，將條魚狂收上水面，見都係斤頭牛屎，撈箕都費事用，成條飛佢上黎，都唔得閒攪佢喇，又攞起用腳踏實果枝竿，頂咗幾野，已經知佢包咗樁，唔敢太用力，但係我唔用力，條魚就發力想衝斷條繩，我只好放幾米繩比佢啦，希望條魚游番出黎，見佢停咗我又收番幾手，如是者來回四五次，跟住見佢冇晒動靜，我咕已經走魚喇，咁就放低枝竿，快手快腳，將之前上水嘅牛屎落生扣，攪惦晒再攞起枝竿，吓！條魚仲喺度喎；卒知攪咗半粒鐘，我宣報投降放棄喇！收緊條繩用手大力一拉，咁就結束咗一場大戰！(算佢好彩)

收拾好心情，再釣過，呢次輪到釣半水果枝竿郁啦。開頭以為有鱸食餌，但係點解食得咁細力嘅？我就輕輕一帶，中呀！條魚飛得好快，但感覺好輕身，兩三個回合，已經見魚，原來係一條磅頭嘅馬友，都好！係我第一次中嘅魚種，又係將佢飛上岸，呢次唔落生扣啦，而係放入冰箱。

00:40開始執埋Ｄ架生，清理好釣場，遠遠望到來接我地架艇嘅大光燈，佢好快埋到黎，我就攞埋Ｄ戰利品(魚)，過六樁接埋高橋，上艇踏上回程。01:45埋到鴨脷洲攞車，再落香港仔食宵夜，送埋高橋番屋企，自己番到屋企都成兩三點喇。

好奈冇中過嘅牛屎。

呢條牛屎都算靚仔喇！有Ｄ勁樣衰。

條馬友係我第一次釣到嘅魚種

全晚嘅魚穫:牛屎斤頭×1，馬友磅頭×1，芝麻仔幾両×2，石九×3。

先中牛廣再中大紅鮋

27-10-2009  (農曆九月初十)  慢流   東北風

今日約埋師傅偉到主場搏吓，好早食咗晚飯，就到街市拾廿蚊大虾仔，飛車落到主場，19:30我先到埗，師傳偉跟住到，大家開好竿，講吓笑，傾吓計，佢話希望今日有鱸魚玩吓。

20:00特然發覺釣半水果枝竿頭彎咗幾吓，我心諗唔通真係有鱸，即刻囉起枝竿，呢頭攞起枝竿，果頭己經響鉸出緊線喇，首先我拑實個鉸，條魚就發力向下衝，成枝竿即時彎哂，我頂一陣，佢就再向外海衝出，佢屎喇，冇樁冇柱有排玩，一收一放三四次，己經收到埋黎，嗯！唔係鱸喎，係牛廣黎喎，咁我就用撈箕上水，影埋相，即落生扣，再鈎隻蝦落去睇仲有冇先，因為牛廣係群体魚黎加嘛。

21:05師傅偉中咗條好似曹白嘅魚，落埋生扣；21:45我有之沉底筏仔微微響咗吓鉸，我就快手將枝筏竿揸上手，竿頭再點咗幾野，再黎一野，枝筏竿就一彎到腰，因為中魚嘅位置險要，條友仔又往樁位衝去，我成個人企起身，將枝竿往上頂，老虎都唔放，條線拉到裂裂聲，卒之條魚調頭出番尼，我嗱嗱聲收咗十幾吓，佢又發力向外衝，呢次可以比線佢走吓啦，一放一收，兩三個回合，見魚影喇，只見火紅嘅一條紅鮋，在水中爭扎，師傅偉同我用撈箕上水，條魚都有兩斤幾喎！又再影相，落埋生扣。

22:30大家再冇魚訊，只有Ｄ蟹喺度化餌。北風吹埋黎都有Ｄ凍凍地，好喇！今日到此為止，大家收好架生，清理好釣場，囉埋Ｄ戰利品，揸車番屋企喇。拜拜！！

好奈冇釣過嘅(牛廣)(大魚仔)(領航燈)(走排)(JET)唔知邊個啱？

再中條大紅鮋，開心到難以形容。

條牛廣斤七両，釣魚男話佢叫做領航燈。

條紅鮋靚到吖，紅卜卜過喎！

今晚嘅收穫唔錯。

有冇人知最頂果條叫勿野魚，有人話叫(哽死貓)喎！據卜友釣魚男話，呢條叫大眼海鰱或者大青鱗！

再同佢影幅單魚相先。