牛牛終於番尼探我喇

29-4-2009  (農曆四月初五)    東風   生流

今日冇約，又去釣魚喇！去到主場五點幾，正在落流，開好竿等運到，等咗十零分鐘見冇乜動靜，就去攞罐野飲吓！行咗兩三步，眼尾見枝竿頭跳咗幾吓，就即刻行番轉頭，執起枝筏仔准備，果然有料到，一吓強而有力嘅感覺，我唔理三七廿一就往上抽，中呀！條友仔只有一次反抗嘅能力，咁就比我一路收佢上水面，落撈箕上水，係兩斤幾花鱸，落好生扣，先有時間嘆番罐野，再繼續等運到。

又過咗半粒鐘，呢次輪到沉底枝筏仔有野拉喇，做好准備動作，竿頭噔噔兩野就往下拉，我笑哂咀，因為佢走嘅位置比較寬闊，冇樁冇柱，你仲唔史，收咗幾嘢，有Ｄ力喎！我就放一手繩比佢走吓，點知條友仔精過鬼，一見我放繩佢就往樁標埋去，我又點會比佢咁做吖，用力將佢個頭帶番出黎，一左一右，跟住收繩，嘩！机乎玩出血，唔係啦，都係上咗水先咋，幾吓手勢就將條斤半黑立入撈箕上水，跟住影相，落生扣。

又過咗半粒鐘，Ｄ流開始急，天又開始黑齊，今日己經有收獲啦，都係執野早Ｄ走，番屋企吔飯。拜拜！

成個月未中過嘅黑牛

你睇條牛屎立Ｄ旗扯得幾行。

天黑喇收埋魚走人。

番到屋企，叫大人同我地影相留念。

准備劏魚喇老友記。