師傅出馬，【KO】七斤半大鱸。

26-4-2010  (農曆三月十三)  生流  微風細雨

今日唔知點解，好似好有信心釣到魚咁喎！18:30落到主場，師傅仲未到，我就開好竿，打雀咁眼，看住Ｄ竿，此時師傅偉又到咗，佢就開兩枝竿釣鱸，傾傾吓計，佢有枝筏仔響鉸，我就即刻跳開，睇師傅表演，佢一抽即中，仲話尼條鱸好大條，開頭見佢攪得好順，我就準備撈魚，點知條鱸見光就發力開尾往下衝，只見師傅不慌不忙，好鬼瀟灑咁鬆幾手比佢，帶順即攪七八吓，條魚再衝，佢又再比，如是者五六轉，經過成三四分鐘嘅人魚角力，勝方梗係師傅偉喇，我當然係做魚童撈魚上水，影相落生扣一腳踢。

條鱸上到水面冇晒力，仲反肚添。

我都攞黎沖喜吓。

過咗一陣尼次到我鉸響喇，我一埋去就抽竿，唔理三七廿一就先攪七八吓，嘩！以經見魚，又係大野，我就冇咁好彩喇，佢一開尾就打橫衝，我頂都頂唔住，又驚住炸竿，所以比幾尺佢走吓，點知就出事喇!!又包樁......，我想拉佢出黎，但比佢一發力就斷埋，噢！有冇攪錯，餐餐都係咁嘅，唔好嬲!!!收番上黎挷鈎再釣過。

又過咗半個鐘，師傅偉都斷咗條，我話:而家Ｄ鱸咁鬼難釣嘅！師傅話:Ｄ海水暖番，所以Ｄ魚活動力強咗，唔似得冬天咁順灘架喇！啊~~原來係咁。

21:30流水又轉急，仲落雨添，我睇Ｄ魚都唔開口架喇，都係唔磨爛蓆囉，執埋架生，一齊去宵夜好過。

番屋企過磅，條花鱸足七斤半。

花鱸七斤半78Cm。

重有隻石蟹孝敬吓大人，都成六七両架。

斷魚斷到服晒，求其寫番次

23-4-2010  (農曆四月初十)  生流  溫暖

我都好奈冇寫過卜喇，事關自從去完旅行番尼，都釣過十幾次魚，但係每次唔係打龜就斷魚，大大話話都斷咗十口八口，都唔知係米喺越南拜天后，以為會保佑我釣多幾條魚，誰不知天后娘娘大發遲悲，放生晒Ｄ魚，攪到我尼輪冇哂引。

講番今日嘎，又同師傅偉去釣番轉，18：30落到主場，開第一枝竿釣鱸，我都未曾開埋第二枝竿，已經響鉸囉，我都未攞得切枝竿，條魚好快就發力喇，到我攞起之後，佢再一沖，噢!!!!又輕哂，收番上黎睇吓，冇咗個鈎，又比佢洗鰓走咗，真係嬲到手都震埋，口中念念有詞~@＊＃~，跟住沉底嘅就中埋Ｄ泥婆坑簾，冇幾奈，師傅偉又斷一條，我地都係『同是天崖倫落人』囉。喺極度冇引底下，22:00執埋架生，去宵夜好過喇。拜拜！！ 

釣埋尼Ｄ野，真係失禮屎人。

要去主場醫番好失眠症

19-3-2010  (農曆二月初四)  生流  微寒

前晚走咗條沉底怪獸，兩晚都瞓唔著，要醫番好走魚失眠症，最好嘅方法就係去釣魚喇(借口黎嘅)！

今晚就單人匹馬到主場，落兩枝竿主打沉底，不過都放枝釣鱸嘅竿等運到。

我金睛火眼望住枝打沉底嘅筏仔，到咗19:30沉底枝竿開始有反應喇，條魚試咗三四吓餌就搶餌喇，我一手就將枝筏仔往上一抽，跟住一手都唔放，一頂一收，好容易就上水，係斤半左右牛屎，見咁細，一手就掟佢上岸，費事洗撈箕，落好生扣就繼續釣。

中咗條牛屎之後，一路都冇魚訊，又到咗21:00，旣然目的已達，都係唔磨爛蓆喇，於是執好架生，清理埋釣場，去宵夜好過囉！

斤半良型牛屎立，今晚應該好好瞓囉。

呢種哂士，要尼清蒸一流。

鱸魚橫行南丫島

17-3-2010  (農曆二月初二)  生流  和暖

今日高橋雪也約我今晚去南丫煤橋玩番轉，咁就執齊架生，落北角接埋佢，直去鴨脷洲洪勝碼頭，泊好架老爺車，於20:15上預約咗嘅艇，就直住目的地，點知經过榕樹灣，水警又查牌，左咗成六七分鐘。

唔知係米Ｄ水警專查女船家呢，坐佢兩次兩次都查牌，其他男船家一次都未試過喎！

21:10到咗釣點，就叫艇家車我地埋大樁，上到去嗱嗱聲開竿，高橋依然玩佢嘅磯釣，又計尼樣又計果樣，我就冇你咁好氣，開兩枝筏仔沉底，一枝半水。落咗餌半個鐘度，沉底枝竿郁咗幾吓，我就即刻攞起枝竿，輕輕收緊些少，此時魚訊越來越強烈喇，當佢一搶餌果吓，我就住上一抽，中呀！亦都感覺到係大野，我就快速攪咗五六吓，佢就開始發力喇，左標右標，攪咗幾野，又局住比番幾呎佢，如是者戰閗咗兩分幾鐘，條魚都係上到半水，跟住比佢一野向下衝，噢！輕晒....##收上尼睇，條魚絲冇花過，個鈎重喺度，咁積係爆咀囉！我抖番順條氣，落餌再釣。

22:05Ｄ鱸開口喇，我首先連中兩條小鱸，跟住陸續再中多幾條，有大有細，共七條，尼次爆扣喇。再睇高橋嘅釣况，佢都有四條。

呢次爆扣喇！

幾乎揪唔起。

到咗03:00艇家來接我地番鴨脷洲，高橋聽日要上班，所以唔去食宵夜喇，咁就送佢番北角先，自己番到屋企都四點喇，劏埋魚，洗埋架生又天光囉！

好彩聽BLOG友報料，帶個24L嘅大冰箱去載魚。

大中細碼都有。

極地先至可以破龜

16-3-2010  (農曆二月初一)  生流  大東風微凍今日本來唔打算釣魚，因為聽日出南丫釣晚水，但係釣魚蟲〝共共〞吓！都係去釣番幾粒鐘先。

買好餌，先打個電話比師傅偉，佢話喺度做緊占，我問佢釣唔釣魚，佢話你去我就去囉，咁我就叫佢唔使買餌，直接尼就得喇。

落到釣場都成19:20，仲係起緊流，開好竿，擺喺Ｄ流冇咁急嘅位，又喺度等運到，20:10師傅偉先至尼到，佢梗係將Ｄ竿，擺番喺上次中魚果個釣位度喇。

又過咗十幾分鐘，我見冇勿動靜，就將枝竿，轉去好奈冇人落竿嘅位度〝爬額水〞(兩年前試過喺尼個釣點，比條魚拉咗枝竿落海)，所以今次見冇勿好位，就試吓尼度喇。

搬好Ｄ野，就落餌喇，尼頭放低枝竿，果頭就見竿頭點咗一吓，嗯！唔係咁快尼料係嘛，我都未來得反應，個攪以經響喇，我連除攞起竿，條魚已經搶餌，我立即將竿住上一揮，連攪七八吓，條友仔已被我制服，好順咁一路上水面，因為第一條魚，所以冇同佢玩；哈哈！今次師傅偉做魚僮喇，撈箕上水，落埋生扣，鈎隻蝦，又繼續釣過。

我地磨到22:10，見轉流都冇魚訊，風又大咗，都係執野走人，去宵夜好過囉！

條花鱸魚唔係好大，兩斤零三斤倒喇，師傅偉話，尼個〝晒士〞最好食喎！

擺個Q版甫士比唯一睇吓，係米咁呀!!

好....準備劏魚。

成晚做魚僮

13-3-2010  (農曆正月廿八)  生流

今日星期六，晏晝同大人去灣仔教協買旅遊保險(全年)，番到屋企成五點鐘，速速攞埋釣魚架生，再落街市買廿零隻虾，跟住打電話比師傅偉問佢到咗未，佢話剛由香港仔出緊黎，咁我就叫佢唔使買蝦喇，直接黎就得啦。

落到釣場六點半，師傅偉剛到，我地開好竿，又坐定定吹水，一路到成九點幾先比佢中條小鱸先，我同佢撈魚，又過咗半個鐘，都係佢枝竿響鉸，尼次佢要同條魚搏鬥成分幾兩分鐘，又係我做魚僮。

到十點半，我枝善良之竿郁都未郁過，再磨落去都係龜架喇，都係執野鬆人，一齋去潤記食碗豬膶粥好過喇！

師傅偉怕劏魚比埋我

搏大霧又比我搏到

1-3-2010  (農曆正月十六)  大生流

今日嘅天氣暖暖地，又冇咁潮濕，都係要去主場釣番轉先至得。

18:30落到去開好竿，Ｄ霧水又殺到尼，望出個海度，連Ｄ船都睇唔到，只聽到船嘅鳴笛之聲不絕！

一路都冇魚訊，只係比蟹化咗三隻虾，到21:30開始轉流喇，通常Ｄ魚喺轉流時就會開口架。果然不出所料，有枝竿個鉸響咗一吓，嗯！有料到，立即攞起枝竿，點知尼頭攞起枝竿，果頭條魚就發力搶餌，成枝竿一彎到腰，嘩！大野，快速往上一頂，跟手攪咗七八野，但條友仔未被制服，開尾想走，好，就比幾呎繩佢走吓，我一回氣，佢史喇，比我用力住上一帶，使出終極一擊，【無敵風火輪】，連攪十幾野，條魚就上到水面喇，等佢飲幾啖水先，跟住梗係撈箕上水，落埋生扣。

22:00見Ｄ流水好急，我睇Ｄ魚都唔會開口架喇，都係執埋Ｄ架生，清理好釣場，落東大街宵夜好過喇！拜拜！

又係得一條大花鱸。

花鱸重五斤半，長72cm。