呢Ｄ先至係鱸魚吖嘛

19-12-2011  (農曆十一月廿五)   東北風  
今日食咗晚飯，心思思又拎起Ｄ釣魚架生，落街市諗住買Ｄ蝦，點知檔檔都冇生蝦，咁為有兜番去魚餌店，買一両沙蝦玩吓喇。
19:30落到主場，見仲係落緊流，咁就慢慢開好竿，順便釣吓魚仔捱時間，哈!!又比我中番條油班仔喎！
20:10Ｄ流水開始冇咁緊，咁我就搬出去橋外搏殺！一枝沉底搏符碌、一枝半水釣鱸、一枝勾粒千年蝦肉釣魚仔；開好哂就坐定定等運到~坐低冇奈，見到釣半水枝竿比野拉咗兩吓，我即刻就執起枝竿，呢個時侯，條魚已經發力搶餌喇，咁我就順勢往上一抽，中呀!!仲係大野添喎，一連攪咗五六吓，條魚就想標入樁，我為有頂佢一陣喇，頂咗三四秒又攪咗六七吓，見魚喇！仲好大條添，喺呢個緊張時刻，啱啱有架『正苦』船經過，Ｄ浪大到好似海嘯咁，一個浪打埋黎，將條魚冲咗入樁，仲想開尾洗鰓添，咁我就為有放一放繩，等條繩冇咁行，唔會比Ｄ樁柱蚝宿Hi斷，跟住再將條魚帶番出黎，吸一啖氣，搏命收繩，攪咗十幾吓條魚就升水喇，好彩有釣友同我落撈箕，條魚上咗黎我都冇哂氣喇，抖番順條氣就影相落埋生扣。

呢Ｄ先至係鱸魚吖嘛。

有魚中，天氣再凍Ｄ都冇所謂喇！

整理好Hi花咗Ｄ繩，就再落餌繼續釣；之後再中多條小鱸，呢次就話都冇咁易就上水喇，跟住就直入冰箱，睇睇個錶又十點幾嗱，目標以達，執埋Ｄ架生同魚穫，早Ｄ番屋企喇！

番到屋企，大人未瞓，同我影幅大細花鱸合照。

仲有條油班仔添，啱哂大人食。

須然今晚都幾凍吓，又大風，但係收穫都唔錯喎！

大花鱸過磅五斤三両 73 Cm。
細花鱸斤頭。
油班仔十両。

 

大鱸番黎喇

14-12-2011  (農曆十一月二十)
噚晚因為Ｄ蝦大隻過頭，有兩口鱸爆咀，今日專登去魚餌店買Ｄ蝦仔，去做Ｄ花鱸世界~
買好哂餌就直跴主場，落到去流水仲係好急，只好喺躉頭釣吓，一路都冇料到，21:00見Ｄ流水慢咗Ｄ，即搬出去橋外搏殺；今次都係開三枝竿，沉底、半水、小磯千年虾仁搏大霧。啱啱落好哂餌，釣半水枝竿以經響鉸，我一拎起枝竿以經知係大野，成枝竿一彎到腰，我就順勢一抽，快攪七八吓，條魚毫無反抗餘地，好順咁比我收到上水面，見都有三斤梗係用撈箕喇，點知條魚趁我攞撈箕果一刻，特然發力想標番落去，呢個特如其來嘅動作，就比條魚標番成七八呎，我即刻拎番實個鉸，唔好再比佢出線先，跟住用力再頂，大家僵持咗四五秒，我就吸啖氣，發力收繩，再將條魚拉番上水面，一撈箕就收佢入去，人魚大戰又就咁結速。
將條鱸落好生扣，再勾過隻蝦繼續釣，過咗半個鐘度，Ｄ流水開始行快咗，今次輪到枝小磯竿有魚訊喇，竿頭比條魚輕輕拉咗幾吓，跟住一吓大力向下彎，我喺同一時間就用力一抽，結結實實咁中咗，跟住一路好順咁收上黎，途中只有輕微嘅反抗，上到水面見係條斤頭石蚌，又係撈箕上水，呢次就直入冰箱喇，因為時間啱啱好，執埋Ｄ架生同魚穫番屋企喇！

今季中第一條大花鱸三斤，搏鬧都叫醒大人同我影相。

花鱸加埋石蚌，唔開心就假喇！

晚晚有呢Ｄ魚釣到就正喇。

登埋之前兩晚嘅魚穫同大家分享吓~~
12-12-2011  
呢兩條友仔又黎簾魚喎，唔怪之得Ｄ劃仔唔見哂喇！

12-12-2011(農曆十一月十八)

冇劃仔唔緊要，好彩執番條磅頭細鱗啫。

13-12-2011(農曆十一月十九)

啱啱夠煲湯比大人飲。

月全蝕怪獸出現

10-12-2011  (農曆十一月十六)
三公主話番黎食飯，咁就拎條紅鮋出黎清蒸，大人去買邊鹵水鵝番黎，加碟油菜，煲個排骨老火湯，三餸一湯，咁又一餐。
本來諗住我同大人兩個食，起肉炒球，炆頭腩，後尾三公主話番黎食飯，佢鐘意清蒸，所以就將條魚清蒸。

食飽飯就執埋Ｄ釣魚架生，落主場捉怪獸，因為今晚月全蝕，我諗實有怪獸出現嘅。
17:50落到主場，見到釣友「章哥」喺晏晝釣咗條『花尾躉』，足足有成十斤，未天黑怪獸以經出現喇。

我都拎條『花尾躉』黎旺一旺佢先至得！

真係足十斤以上喎。

影完相，襯仲有個零鐘轉流，就慢慢開好三枝竿，一枝半水釣鱸(今日買到生蝦)，一枝打沉底釣怪獸，再開多枝小磯用虾肉釣魚仔。

今晚個月光幾圓幾大呀~

19:30開始Ｄ流慢咗，枝小磯竿有魚食餌喇，竿頭點咗幾吓就拉落去，我就順勢一抽，仲以為係劃仔，收咗幾吓，嗯 !! 有少少力喎，一路收上黎係條十両細鱗，解勾落生籠，再落餌繼續。

20:00流水以經停咗，我就更加留意沉底枝竿喇！見咁奈都冇郁過，收上黎再換隻蝦落去睇吓點，放落去都唔夠半分鐘，諗住飲啖水，點知沉底枝竿頭比野拉咗幾吓，我就即刻放低枝水，拎起枝竿，輕輕收番Ｄ多餘嘅繩，呢個時候，魚訊越黎越強喇，當佢一吓大力搶餌嘅時候，我就發力一抽，中呀！好強嘅反拉力~頂咗幾秒，就快速收咗七八吓，條友仔好精，想標番入我腳底嘅樁柱位，我梗係唔比佢咁做喇，即刻使出『左右野馬分鬃』，一左一右將佢嘅方向迷糊，帶番佢出黎大海，今次唔理三七廿一，再使出『無敵風火輪』，一路搏命狂收，唔使一分鐘就將條魚收到上到水面喇，嘩!!兩斤青班喎，更加小心落撈箕上水，人魚大戰結速。

好彩都有條怪獸捉到，唔使咁失威，捧場客即刻同我影幅威水相先。

呢個時候，個月光開始蝕喇。

一邊釣魚，一邊欣賞月全蝕嘅過程。

睇完月全蝕，Ｄ流水又轉急，咁我就收起釣沉底果枝竿，轉過位，半水釣鱸枝竿繼續，有個捧場客話想食劃仔喎，咁我就專心釣咗Ｄ劃仔比佢；到咗23:30，Ｄ北風又好似吹大咗喎！收番釣鱸隻蝦上黎睇吓，佢仲生猛過我，今晚都係到此為止喇，執好架生，收埋Ｄ魚獲，走人去消夜好過喇。

番到屋企，大人瞓咗，唔敢大聲，細細聲影埋幾幅相，跟住劏魚、洗埋釣魚架生，沖涼瞓覺喇。

我都話月全蝕實有怪獸架喇。

今晚真係玩得好開心。

青班×1(兩斤)
細鱗×1(十両)

9-12-2011  (農曆十一月十五)

都有幾條劃仔釣吓。

兩之公打邊爐

6-12-2011  (星期二）
凍咗幾日，又釣到魚，大人就提議今日打邊爐，我梗係話好喇，即刻喺冰格攞條牛屎立出黎解凍，大人就去買齊Ｄ火煱料，好快攪惦哂就立即開餐喇！

即興火煱，簡簡單單又一餐。

食飽飽又去釣魚囉！

話口未完又中牛屎立

6-12-2011  (農曆十一月十二)

喺屋企用條牛屎立打完邊爐，19:00落去主場睇有冇運行先。
19:30到咗主場，已經開始行緊落流，嗱嗱聲開好竿，一枝打沉底，一枝釣半水，再開枝磯竿仔釣吓劃；頭兩枝竿一路都冇魚訊，剩係枝磯竿仔有Ｄ劃釣吓，一路釣到23:10，諗住今晚都係龜架喇，準備執野走人，點知收緊野嘅時候，枝小磯竿頭比魚拉咗一吓，有料到~我就即刻執起枝竿，竿頭再重重咁向下彎，想走吖嗱......我好快速就往上一抽，結結實實咁中咗，順勢攪咗幾吓，有Ｄ力喎，頂咗幾秒，我又攪幾吓，如事者三四個回合，以經將條魚升水喇，只見漆黑嘅海中，一道銀光發亮，哈哈!!又係牛屎立，跟手落撈箕上水，解勾直入冰箱，執埋其餘Ｄ架生，直接番屋企囉！(今晚仲好飽，所以唔使去宵夜)

再中大黑牛。

牛屎立好玩又好食。

兩斤牛屎立加埋Ｄ劃仔都唔錯。

今季第一條花鱸

4-12-2011  (農曆十一月初十)
噚晚中咗對象魚(牛屎)，今日再落主場，睇有冇另一對象魚(花鱸)先。
今日係星期日，梗係有多Ｄ釣友喺度架喇，咁我就早Ｄ落去趁吓高興至得；喺街市執廿皮生蝦，17:30就到咗主場，先同Ｄ釣友打個招呼，趁未落流，就喺橋躉開竿，今次除咗沉底搏大野同埋小磯釣小魚外，仲開多枝竿，勾隻生虾落去半水釣鱸；冬天個天好快黑，19:00就黑齊，尼個時候己經轉咗落流，咁又要搬Ｄ架生出橋外睇有冇劃仔釣吓，釣鱸果枝竿就求其擺喺我望到嘅位置，攪掂哂就坐定定喺度釣劃仔，過咗冇幾奈，特然聽到好奈未聽過嘅響鉸聲，望吓釣鱸枝竿喺度不停出線，我就使出「乾坤大羅移」嘅身法，標埋去執起枝竿，拑實個鉸，唔好比佢再出線，跟手一抽，再狂攪六七吓，嗯!!感覺好輕，冇力嘅~知道唔係大野，咁就輕輕鬆鬆咁收條魚番黎，釣友師傅偉仲問我使唔使撈箕，咁細條鱸，我一野就將佢掟上黎，費事落生扣，放入生籠算數。
又唔知過咗幾奈，師傅偉斷咗口大野，佢話係鱸黎個喎！23:30見目標以達，執埋Ｄ架生走人去宵夜喇！拜拜

鱸魚都番埋黎喇，不過就細咗ＤＤ

得條斤頭花鱸，好彩仲有Ｄ劃仔蹬吓場。

唔記得話埋呢隻三點蟹頂晒角，大人食到答答聲。

我老友牛屎番黎喇

3-12-2011  (農曆十一月初九)

因為天氣特然凍咗，兩日冇釣魚，今日卒之忍唔住，落街市執廿蚊蝦，飛車落主場搏一搏。
18:15到去見仲未轉流，就踎係躉頭釣樁邊，諗住開枝磯竿仔，勾粒千年蝦仁落去釣吓魚仔，粒餌一路漂入橋底，流流吓感覺竿頭點咗幾吓，好似Ｄ坑簾又黎化餌，下意息我就輕輕拖一拖佢，點知一拖條魚就發力搶餌，呢吓黎得好特然，我嘅第一反應就係抽竿，一抽再連攪兩三吓，好重手喎，唔通係泥婆！頂一頂再攪幾吓，有Ｄ反應喇，條魚係咁向下蹤頭，哈哈!!係牛屎喇，呢幾次都想釣嘅對象魚終於比我釣到喇；因為果度水淺，得果廿幾呎水深，所以再收幾吓以經見魚喇，銀光一閃，果然係兩斤牛屎立，我好開心，小心落撈箕上水，落埋生籠，繼續釣。
19:30見開始轉流，釣友師傅偉又黎到，執埋Ｄ架生，齊齊出外邊搏殺，呢轉真係得Ｄ魚仔喇，全程流水以為冇驚喜，點知臨尾23:00比師傅偉中番條兩斤幾嘅紅鮋，攞番個尾彩，梗係我做魚童喇，撈箕上水即落冰箱，大家執埋Ｄ架生同魚穫去宵夜囉！拜拜~

中到對象魚『大黑牛』兩斤梗係開心喇。

我嘅老友「牛屎」番黎喇。

仲有師傅偉送埋條「紅鮋」比我添。

紅鮋兩斤幾真係正。

紅黑都有，今晚瞓得著囉！

收穫豐富，準備劏魚。