白果魚神(釣魚當番工): 大鱸番黎喇

2011年12月14日星期三

大鱸番黎喇

14-12-2011 (農曆十一月二十)
噚晚因為Ｄ蝦大隻過頭，有兩口鱸爆咀，今日專登去魚餌店買Ｄ蝦仔，去做Ｄ花鱸世界~
買好哂餌就直跴主場，落到去流水仲係好急，只好喺躉頭釣吓，一路都冇料到，21:00見Ｄ流水慢咗Ｄ，即搬出去橋外搏殺；今次都係開三枝竿，沉底、半水、小磯千年虾仁搏大霧。啱啱落好哂餌，釣半水枝竿以經響鉸，我一拎起枝竿以經知係大野，成枝竿一彎到腰，我就順勢一抽，快攪七八吓，條魚毫無反抗餘地，好順咁比我收到上水面，見都有三斤梗係用撈箕喇，點知條魚趁我攞撈箕果一刻，特然發力想標番落去，呢個特如其來嘅動作，就比條魚標番成七八呎，我即刻拎番實個鉸，唔好再比佢出線先，跟住用力再頂，大家僵持咗四五秒，我就吸啖氣，發力收繩，再將條魚拉番上水面，一撈箕就收佢入去，人魚大戰又就咁結速。
將條鱸落好生扣，再勾過隻蝦繼續釣，過咗半個鐘度，Ｄ流水開始行快咗，今次輪到枝小磯竿有魚訊喇，竿頭比條魚輕輕拉咗幾吓，跟住一吓大力向下彎，我喺同一時間就用力一抽，結結實實咁中咗，跟住一路好順咁收上黎，途中只有輕微嘅反抗，上到水面見係條斤頭石蚌，又係撈箕上水，呢次就直入冰箱喇，因為時間啱啱好，執埋Ｄ架生同魚穫番屋企喇！

今季中第一條大花鱸三斤，搏鬧都叫醒大人同我影相。