釣番條魚黎做冬

21-12-2011  (農曆十一月廿七)

晏晝打電話比師傅偉，想話約佢今晚落主場釣魚，點知佢話有約唔黎得，咁為有又單人匹馬去釣喇！
喺屋企雪柜攞咗盒千年蝦仁，再落魚餌店買咗9錢蝦(14蚊)七隻，19:00落到主場，見以經行緊落流，咁就慢慢開好三枝竿，除咗釣鱸魚用生蝦外，其餘兩枝竿都係用千年蝦仁做餌；攪掂哂就坐定定等運到。
等咗半個鐘度，枝小磯竿比野重重咁拉咗一吓，我都未黎得切揸起枝竿，以經第二吓拉落去喇，成枝竿頭飲哂水，我一執起枝竿就往上一抽，跟手攪咗三四吓，嘩!!個磅頂即時〝叮叮〞咁響！再往上一頂又攪咗四五吓，條魚先發力往下冲，嗯~牛屎黎喎！頂咗一陣，磅頂又停咗，即刻食住個勢，一路攪冇停過，條魚左片右片，我亦都就番住佢，唔使一分鐘，條魚以經升水，真係牛屎立喎，梗係撈箕上水喇，跟住解勾落生籠一腳踢。
又唔知過咗幾奈，見半水釣鱸隻蝦CC吓唔夠生，咁我就換過隻生猛Ｄ嘅蝦落去，一落去冇幾奈，就見竿頭輕輕拉咗幾吓，跟住見條線順住流打斜哂，我心諗小鱸魚又黎偷食喇，一攞起枝竿，輕輕收緊Ｄ線，條魚就搶餌喇，我跟手將枝竿一抽，中咗，都有少少力喎，知道唔係大野，梗係玩吓佢先喇，一收一放四五回合，上到水條魚都反肚冇哂力，見係斤頭小鱸，撈箕都費事落，一野就掟佢上黎，解勾落埋生籠。
望吓個錶，咁快又十點嗱，既然聽日做冬以經有魚，咁就執埋Ｄ架生，收好魚穫落冰箱，早Ｄ番屋企囉！

番到屋企大人未瞓，佢就同我影相喇；中咗對象魚就零舍開心嘅！

我同大人講:「兩斤牛屎立」。

聽日用黎做冬食就至正喇。

攞埋條鱸仔黎影，點知條鱸好生猛，唔小心比佢吉咗一野添，好彩少少啫，冇乜事。

大人話咁樣影番張好得意喎！

準備劏魚喇，牛屎兩斤，條鱸仔都有斤頭喎！