大花鱸重臨香江

26-2-2010  (農曆正月十三)  生流  和暖

噚晚師傅偉中咗條兩斤花鱸。 

今日再約我番桌，所以早Ｄ食飯，到18:00就落去玩吓。

落到去佢都係啱啱到，大家開好竿，就坐定定吹水，我見自己枝竿微微點咗幾吓頭，就快步埋去準備，偉哥就八八掛掛行埋尼睇，點知佢自己枝竿直情響鉸，咁佢就梗係飛撲埋去攞起佢自己枝竿喇，我望過去見佢枝竿一彎到腰，嘩大嘢！而我枝竿又冇咗魚訊，咁就放低番佢，嗱嗱聲去攞定撈箕做魚童啦。埋到去見佢喺度頂緊，已上水面，睇落都有五六野，點知條友仔一見撈箕就發力開尾，師傅梗係就一就佢喇，首先條魚係向外標出去，偉哥放咗兩手繩比佢，當佢再頂一野速速挍七八吓，條魚就極速飛番埋尼，標入隔離枝樁，我就大叫//過樁喇，師傅就行前幾步就番個位，再繼續同條魚搏閗，玩咗成四五分鐘，卒知上到水面喇，我用撈箕同佢上黎，影相落生扣一腳踢！

師傅偉抖順條氣影番張威水相。 

我又攞尼影吓相，旺一旺佢先。 

過咗冇幾奈，我幾吓手勢，就再拾多條細少少嘅，到23:00見再冇魚訊，就執埋Ｄ架生，走人去宵夜喇。  

 番到屋企同兩條花鱸影相做記錄。 

百花鱸×2 (六斤十一) 80Cm                   

                (四斤十四) 68Cm

年尾收爐，釣幾條魚擇吓倉

10，11-2-2010  (農曆十二月廿七，廿八)生流

一連兩晚都有釣魚，年晚收爐，釣番幾條魚擇吓倉。10號釣雙鱸，11號中石蚌，跟住落黎，休息番幾日先有得過引囉！

喺呢度要多謝各方BLOG友，一年來對小弟嘅支持，仲認識咗好多BLOG友。

祝大家新年進步！

如意吉祥！

大吉大利！

心想事成！

恭喜大家都發財！

年年有魚

長釣長有

坐喺車裹面都釣到魚

5-2-2010(農曆十二月廿二)大東風微雨生流

今日三公主喺屋企食飯，諗住唔去釣魚，點知師傅偉打電話來，約我今晚釣番轉，好喇！應承咗佢。咁就嗱嗱聲煮好飯，仲食咗兩碗添，19:00就去買餌出發喇！

落到去，師傅偉己經到咗喺度釣緊，我見以經起緊流，就開好一枝重架生，放落前晚斷魚個位果度，另一枝放順流沉底，再開多枝半水釣鱸。

過咗大半個鐘，20:00個天開始落雨，加埋Ｄ大東風，都幾凍吓，我地就走上車度，開小小窗，睇往幾枝竿，耳仔聽住鉸響。首先師傅偉枝竿響鉸，佢立即落車，跟手起條斤半小鱸，我同佢落好生扣，再跳番上車避風雨。

喺車上冇野做，就剩係吹水，又過咗大半個鐘，21:30我眼尾望到放順流沉底果枝筏仔，枝竿頭好似鐘咗幾吓，有料到，即刻落車，拿起枝竿，但佢食得好精，師傅偉都落咗車，佢見冇勿動靜就繼續同我吹水，但係我就感覺到有魚訊，我冇出聲，繼續耐心等佢拉竿，我都聽唔到師傅偉講咗Ｄ。乜野喇，特然枝竿比條魚狂拉，我緊係抽竿喇，跟住好順咁收佢上水面，黑牛一條，用撈箕上水，影埋相，落生扣，之後，我地又上番車度，繼續吹水。

出埋Ｄ古怪招數先釣到佢 。

牛屎立：咁都比你釣到，真係唔顺氣呀！

又過咗大半個鐘，22:30Ｄ雨同風都冇停過，流水又越流越急，唔係喇，都係閃好過。咁我地就執好架生，清理埋釣場，收好魚獲，23:15走人，去美美宵夜囉！

番到屋企，大人都瞓咗覺，咁就自己較好時間制，影番幅沙龍先！ 

花鱸斤半，牛屎立兩斤唔夠，兩條魚都好肥美喎！

好野釣唔到，釣埋Ｄ粗野

2-2-2010  (農曆十二月十九)  生流  東北風

今日打電話比師傅偉，問佢去唔去釣魚，佢話過幾日先喇，依輪龜氣全身，等佢去拜吓天后先喎！到咗19:30咁我就一條冷，落街市執廿蚊蝦，就飛車落主場喇。

落到去己經八點，嗱嗱聲擺番枝筏仔落前晚走魚個位度，另外再開多枝筏仔半水釣鱸。等咗我粒幾鐘，我都唔敢行開，卒知見竿頭微微咁鐘咗幾吓，我就立即攞起枝竿，跟住佢再黎番咬，竿頭就狂拉落去，我就好快速咁往上一抽，中呀！我心諗你仲唔屎，狂攪咗七八野，嘩！反抗力好強，大野黎喎，起碼三斤，跟住就頂咗幾秒，再想收繩，點知條友仔再開尾衝，我就一就佢，又再收七八野，如是者三四個回合，最后一埋樁〝噢〞輕哂，我又比條友仔 KO 咗@＊＃＃

須然好激氣，但釣魚嘅野，係咁架喇，收拾好心情，飲啖水再釣過；卒之釣到23:15先中番條斤頭小鱸，撈箕都懶洗，成條飛佢上岸，即解鈎入冰箱，好彩唔使龜，見Ｄ流又開始轉急，都係執野走人，揸車落東大街宵夜喇喂！

好彩中番條斤頭小鱸，唔洗龜。仲有隻三點蟹比大人食。

三番四次響鉸

29-1-2010(農曆十二月十五)星期五 生流 東風

下午師傅偉來電問我，星期日去唔去澳頭釣番轉，我話好想去，不過先前約咗Ｄ舊同事食飯，所以唔去得，不如今晚釣番轉先好唔好，佢就一口答應喇。

19:10落到主場，師傅偉已經喺度釣緊，我就嗱嗱聲開竿，開好檔灘冇奈，個鉸響咗一吓，我就攞起枝竿，條魚試咗幾吓餌就一野拉落去，我就一揪，點知條魚放口，中佢唔到，再鈎隻蝦落去睇過點，之後再冇反應咧！

一路到21:30我同偉哥喺度吹緊水，特然聽到鉸響，但唔知邊枝響，再來多兩三次師傅偉先話...你釣鱸枝竿響呀，我一眼望過去，已見竿頭往下彎，我一個箭步標埋去攞起枝竿，條鱸己經發力，嘩！好好力水喎！大野！經一輪搏殺，鱸鱸乖乖入撈箕上水，影好相，落好生扣，繼續釣。

22:15又喺度傾緊計，呢次個鉸長響喇，心諗幣傢伙，一眼望過去，以見清杯飛竿，好在有失手繩，我即刻喺海度揪番枝竿上尼，好快咁收番十野八野繩先，條友仔起碼有兩斤，經兩三回合，因條魚走得太遠，卒知過樁斷繩收場。

23:25我地都準備收工，收咗一枝竿，再去收第二枝時，見佢條繩好似比流水冲到斜晒咁，但個鉸又響喎！不過響得好輕微，我不以為意，就徐手攞起枝竿，諗住收繩走人，點知一收繩就感到有野墜實，我就以為鈎地球，用力一拉，嗯！有力嘅，咁我就快快手手收佢上黎，上到一半已知係魚喇，一路好順，唔使用力，唔知點解呢條牛屎立咁乖喎，上到水都唔係點郁，咁就影埋相，順手放落冰箱，再收埋其他架生，同今日隻大龜(師傅偉)，去食宵夜喇，拜拜！

今季中嘅第一條花鱸，過咗磅係五斤多Ｄ。 

尼條牛屎立就得三斤唔夠。 

牛屎立40cm.

花鱸67cm.

今次到我中大黑牛喇

18-1-2010  (農曆十二月初四)  東風  生流

今日又約咗師傅偉落主場，我喺19:00落到去，因為起緊流好急吓，所以咪埋喺個慢流位釣；19:30佢都到咗，佢就喺橋釣，兩個人等運到；吹緊水之祭，聽到鉸響，因為落咗兩枝竿打沉底，所以順手執起一枝，但個鉸又響喎，原來係另外一枝竿至真，再執起另一枝竿時，條魚已經飛埋樁，我都好小心咁就佢，到最後都係斷繩收場#＊@

到時21:30Ｄ流慢咗，我就搬Ｄ野轉位喇，放咗一枝落去，正在放緊第二枝，特然睇到先前果枝筏仔竿頭，狂拉咗一吓，立即放低Ｄ野，九秒九飛撲埋去，攞起枝筏仔，已經感到中咗大物，一抽一帶，先脫離危險地帶，攪咗八九野，條友仔想發圍，好强嘅拉力，我唔放繩比佢，只係用竿就一就，再往上頂，順勢就收繩，唔使一分鐘，就收到喺水面，出現嘅又係三斤幾嘅大黑牛，尼次師傅偉同我撈魚喇，撈箕上水，立即影相，跟住落兩個生扣，再落餌繼續釣。

之後又中一條花鱸，可借玩爆咀。望吓個錶，又到23:00，有魚交差，就執埋Ｄ架生，清理好釣場，落筲箕灣東大街食宵夜囉！

尼次輪到我中大黑牛啦。

魚童偉同我影嘅(你地千昕唔好話比師傅偉知，我喺度叫師傅做魚童呀)！

番到屋企嘈醒咗大人，佢就同我影張人魚合照。

昇盤嘅比例梗係唔少得，過磅係三斤四両，46CM，輕過大前日果條四両！

主場第一擊，師傅偉中大黑牛！

15-1-2010  (農曆十二月初一)  生流  微寒

晏畫師傅偉來電，問今晚落唔落主場，我都好奈冇去過喇，咁就約咗佢晚上七點釣番轉。

落到去，擺好個陣，都係兩枝筏仔打沉底，一枝半水釣鱸，呢個時候師傅偉都黎到，大家都開好竿等運到，點知遲黎先上岸，佢枝筏仔響鉸，三兩吓手勢條魚就比佢拉上水面，嘩！好大餅嘅『牛屎立』呀，我梗係做魚童喇，撈箕同佢上水，經上次走魚嘅教訓，見咁大條，就落兩個生扣，包冇衰。

繼續釣，尼次輪到我個鉸響喇，我將枝筏仔一帶，見佢發力就順勢一抽，感覺到重就有Ｄ重量，但係冇勿力水，心諗梗係『泥婆』，上到水面，果然冇咕錯，須然唔係『泥婆』，但係都係佢個老公『花追』，今次要師傅做魚童喇，撈箕上水，解鈎即入冰箱。

釣多一陣師傅偉又響鉸囉！不過呢次斷繩收場。望吓個錶，又十一點幾嗱，時間過得真快，咁就拾埋架生，清理好釣場，放好魚穫，一齊去食宵夜囉喂！

師傅即係師傅，幾吓手腳，就將條三斤半牛牛上水。

等我都攞黎威吓先。 

食完宵夜，番到屋企都點幾鐘囉。

影吓我釣嘅花追，都有斤幾重(大人最鐘意食)。 

即時放血。 

Ｄ花紋真係好靚！

劏好魚，洗埋Ｄ架生都兩三點啦。