話口未完又中牛屎立

6-12-2011  (農曆十一月十二)

喺屋企用條牛屎立打完邊爐，19:00落去主場睇有冇運行先。
19:30到咗主場，已經開始行緊落流，嗱嗱聲開好竿，一枝打沉底，一枝釣半水，再開枝磯竿仔釣吓劃；頭兩枝竿一路都冇魚訊，剩係枝磯竿仔有Ｄ劃釣吓，一路釣到23:10，諗住今晚都係龜架喇，準備執野走人，點知收緊野嘅時候，枝小磯竿頭比魚拉咗一吓，有料到~我就即刻執起枝竿，竿頭再重重咁向下彎，想走吖嗱......我好快速就往上一抽，結結實實咁中咗，順勢攪咗幾吓，有Ｄ力喎，頂咗幾秒，我又攪幾吓，如事者三四個回合，以經將條魚升水喇，只見漆黑嘅海中，一道銀光發亮，哈哈!!又係牛屎立，跟手落撈箕上水，解勾直入冰箱，執埋其餘Ｄ架生，直接番屋企囉！(今晚仲好飽，所以唔使去宵夜)

再中大黑牛。

牛屎立好玩又好食。

兩斤牛屎立加埋Ｄ劃仔都唔錯。

今季第一條花鱸

4-12-2011  (農曆十一月初十)
噚晚中咗對象魚(牛屎)，今日再落主場，睇有冇另一對象魚(花鱸)先。
今日係星期日，梗係有多Ｄ釣友喺度架喇，咁我就早Ｄ落去趁吓高興至得；喺街市執廿皮生蝦，17:30就到咗主場，先同Ｄ釣友打個招呼，趁未落流，就喺橋躉開竿，今次除咗沉底搏大野同埋小磯釣小魚外，仲開多枝竿，勾隻生虾落去半水釣鱸；冬天個天好快黑，19:00就黑齊，尼個時候己經轉咗落流，咁又要搬Ｄ架生出橋外睇有冇劃仔釣吓，釣鱸果枝竿就求其擺喺我望到嘅位置，攪掂哂就坐定定喺度釣劃仔，過咗冇幾奈，特然聽到好奈未聽過嘅響鉸聲，望吓釣鱸枝竿喺度不停出線，我就使出「乾坤大羅移」嘅身法，標埋去執起枝竿，拑實個鉸，唔好比佢再出線，跟手一抽，再狂攪六七吓，嗯!!感覺好輕，冇力嘅~知道唔係大野，咁就輕輕鬆鬆咁收條魚番黎，釣友師傅偉仲問我使唔使撈箕，咁細條鱸，我一野就將佢掟上黎，費事落生扣，放入生籠算數。
又唔知過咗幾奈，師傅偉斷咗口大野，佢話係鱸黎個喎！23:30見目標以達，執埋Ｄ架生走人去宵夜喇！拜拜

鱸魚都番埋黎喇，不過就細咗ＤＤ

得條斤頭花鱸，好彩仲有Ｄ劃仔蹬吓場。

唔記得話埋呢隻三點蟹頂晒角，大人食到答答聲。

我老友牛屎番黎喇

3-12-2011  (農曆十一月初九)

因為天氣特然凍咗，兩日冇釣魚，今日卒之忍唔住，落街市執廿蚊蝦，飛車落主場搏一搏。
18:15到去見仲未轉流，就踎係躉頭釣樁邊，諗住開枝磯竿仔，勾粒千年蝦仁落去釣吓魚仔，粒餌一路漂入橋底，流流吓感覺竿頭點咗幾吓，好似Ｄ坑簾又黎化餌，下意息我就輕輕拖一拖佢，點知一拖條魚就發力搶餌，呢吓黎得好特然，我嘅第一反應就係抽竿，一抽再連攪兩三吓，好重手喎，唔通係泥婆！頂一頂再攪幾吓，有Ｄ反應喇，條魚係咁向下蹤頭，哈哈!!係牛屎喇，呢幾次都想釣嘅對象魚終於比我釣到喇；因為果度水淺，得果廿幾呎水深，所以再收幾吓以經見魚喇，銀光一閃，果然係兩斤牛屎立，我好開心，小心落撈箕上水，落埋生籠，繼續釣。
19:30見開始轉流，釣友師傅偉又黎到，執埋Ｄ架生，齊齊出外邊搏殺，呢轉真係得Ｄ魚仔喇，全程流水以為冇驚喜，點知臨尾23:00比師傅偉中番條兩斤幾嘅紅鮋，攞番個尾彩，梗係我做魚童喇，撈箕上水即落冰箱，大家執埋Ｄ架生同魚穫去宵夜囉！拜拜~

中到對象魚『大黑牛』兩斤梗係開心喇。

我嘅老友「牛屎」番黎喇。

仲有師傅偉送埋條「紅鮋」比我添。

紅鮋兩斤幾真係正。

紅黑都有，今晚瞓得著囉！

收穫豐富，準備劏魚。

 

力拼三斤細鱗，再大Ｄ都未驚過。

28-11-2011  (農曆十一月初四)
幾日冇去釣魚，今日天色咁正，Ｄ釣魚蟲又喺度共共吓喇！咁今晚就早Ｄ食飯，擸埋架生，落街市執廿蚊生蝦，直跴落主場，睇今晚有冇鱸釣至得。19:30 落到去以經見大佬全呀、惠康呀、佢地喺度釣緊，仲起咗兩條磅頭石蚌添，見咁好魚我都嗱嗱聲開竿喇先開枝生蝦半水釣鱸，再開枝筏仔打沉底搏符碌！一路都好急流，釣咗個幾鐘都剩係得Ｄ蟹喺度化餌，卒知Ｄ流慢番，咁就即刻轉出Ｄ搏殺喇。
21:15 又釣咗半粒鐘，沉底落第二口餌，釣半

水果隻蝦仲生猛過我；喺我好冇引嘅時侯，

特然沉底枝筏仔竿頭點咗幾吓，黎料喇~即刻

拎起枝竿，輕輕收緊番Ｄ虛線，再將枝竿慢

慢提高，此時條魚食餌嘅感覺就更加强烈

喇，當佢食到一吓搶餌嘅大動作，我就使勁

往上一抽，人魚角力就立即展開喇！

嘩!!好強嘅反拉力呀！咁我就用力頂到行，一

吋都唔比佢，跟手出力攪咗五六野，條魚又

發力，我就再頂，呢個時候心知如果唔頂，

比條魚開到尾標入樁內，肯定包樁斷繩，所

以呢次我就一寸都唔讓步，有本事就炸我竿

喇！頂咗大約四五秒，我又再收咗五六吓，

特然覺得輕咗，原來條魚改變咗逃生嘅方

向，唔向下冲，反方向直標上水；我知佢想

快過我收線嘅速度，咁就有空間可以冲番落

黎開尾，我又點會比佢咁做吖，我就加快收

線嘅速度，當佢再想冲番落去時，我就乜都

唔做只有力頂，佢郁都冇得郁，三四秒過

後，條魚開始冇力喇，我就把握呢個時机，

吸啖氣，使出終極一擊〝無敵風火輪〞，一

路收到上水面，此時我都冇哂氣喇，好彩有

釣友同我撈魚，上黎係三斤嘅細鱗，好開

心！抖順條氣再落埋生扣(兩個扣)，整理番好

Ｄ魚線，落餌繼續。

過咗一陣又轉埋流，我就收番Ｄ重架生，再開枝小磯竿，釣魚仔過吓引喇！不過一路都係Ｄ坑簾、油叻係度化餌；呢個時候Ｄ東風又吹大咗喇，都係執野走人嘅時候囉!!拜拜~

番到屋企，嘈醒咗大人，叫佢同我影相，今次仲唔比我釣番條大野！

三斤幾大細鱗頂呱呱。

成個昇盤咁大。

細鱗三斤四50Cm，又係今季嘅記錄！

 

細鱗獨領風騷

25-11-2011  (農曆十一月初一)   大東風

今日19:00落到主場，見仲行緊流，就喺樁頭位博吓符碌；自從個碼頭要維修，搭哂架，平時Ｄ得食位都冇哂，所以要等慢流果吓，先出外面博番一個半個鐘！今晚同樣喺樁頭位一口似樣Ｄ嘅魚訊都冇，一路到20:00，見Ｄ流慢咗，我就嗱嗱霖搬野出對海嘅位釣吓！
一枝筏仔打沉底博大野，一枝小磯勾粒鼻屎釣魚仔，落餌唔夠五分鐘，筏仔枝竿頭震咗幾吓，我就即刻攞起枝竿，慢慢收緊Ｄ虛線，食餌嘅感覺越黎越強烈喇，當條魚發力搶餌果一野，我就向上抽竿，結結實實咁中咗，一收一帶，好順咁就收條魚上黎，見係斤頭細鱗，撈箕都費事落，成條飛佢上岸，解勾落生籠，跟住第一時間再勾餌掟落海，一到底就有魚接餌，一抽又中，上黎又係磅頭細鳞，再落餌就只有坑簾仔化餌，跟住就起埋流添，咁我就收起枝筏仔，行過去頂風位，只用枝小磯竿掟出去釣吓劃仔喇！
嘩!!Ｄ風真係好勁，人都吹得郁，好彩著夠衫，同佢搏番兩粒鐘喇；一路都好疏口，咁都係再釣多六七條劃仔！望吓個錶，執野走人都係呢個時候喇，收埋Ｄ架生同魚穫，跟住去宵夜喇喂~

釣番兩條細鱗壓吓冰箱先！

細鱗兩條，斤頭同磅頭，仲有Ｄ劃仔添。

之前幾晚嘅釣穫~
11-11-20(農曆十月廿五)

大東風得幾條劃仔

11-11-21(農曆十月廿六)

有番Ｄ劃釣吓

11-11-22(農曆十月廿七)

揾番餐餸

11-11-23(農曆十月廿八)

煲番啖湯飲吓先！

知己知彼，百戰百勝！

16-11-2011  (農曆十月廿一) 

今日晏晝，有個釣友來電，話主場有好多劃仔釣到，叫 我快Ｄ落去，咁我就一食埋飯，即刻喺雪柜攞盒千年蝦 仁，立埋架生就飛車到主場。
 18:45 一到步就開枝磯竿仔，上好餌就放落去，跟住想開埋枝筏仔，呢頭裝緊鉸，果頭成枝磯竿仔就彎哂，好 彩我將技竿放咗喺冰箱嘅魚竿架上面，我就即刻攞起枝竿，發覺唔係細野，好大嘅拉力，我順勢一頂，發覺條 繩Hi住樁，跟住條魚一標~噢!!輕晒....#＃＊≠≒X想釣魚仔啫，點知有條大嘅埋黎食一粒〝鼻屎蝦仁〞，真係詁佢唔到！收拾好心情，挷鈎再釣過。
又話好多劃仔，點知一條都冇，坑簾毛蟲就大把；見Ｄ流慢咗，就轉位釣出Ｄ，呢次就搬好哂Ｄ架生先至落餌喇，跟住就牛咁眼恰到佢實一實！過咗幾分鐘，呢次就係枝筏仔郁喇，開頭好似坑簾咁食法，跟住就好似蟹咁拖住慢慢郁，咁我就輕輕將線收緊些少，感覺有魚咬住舊餌，我慢慢一拖，條魚就搶餌，順勢往上一頂！戰鬥就立即展開喇~ 
經過之前幾次比佢KO，有咗經驗，今次就順好多喇！ 我一頂條魚就拉到行，先黎係大家喺度角力，薑持咗大約四五秒，見條魚開始冇乜力，我就快速收線，當我攪咗七八吓嘅時候，又開始輕咗Ｄ喎！我知道鬥智嘅時候 又到喇，條魚一定係想快速升水，快過我收線嘅速度， 然後轉身開尾冲；我已經掌握到佢嘅招數喇，點會比佢 使出黎吖!!咁我收線嘅速度相應提高，當佢發力冲嘅時候，我就乜都唔做，停落黎又再用力頂，大家又薑持咗四五秒，今次唔同佢玩喇，吸一口氣，使出終極一招， 〝無敵風火輪〞，係咁收，好快就將條魚收到上水面， 見條細鱗都有兩斤喎，梗係撈箕上水，落好生扣，攪惦哂再落餌。
過咗一陣，轉埋留，一條劃仔都冇，再釣多條小鱗同白果，仲釣多隻大人話成日都冇釣到嘅大石蟹添，起碼成十兩重架。望吓個錶，又係時間鬆人去宵夜喇。

中番條兩斤幾嘅細鱗。

細鱗、白果、石蟹。

即刻煮熟留番聽日比大人食。

13-11-2011  (農曆十月十八)

剩係釣劃都幾好。

14-11-2011  (農曆十月十九) 
好彩有番條十両丁仔撑場。

好彩有佢蹬場

11-11-2011  (農曆十月十六)
今日置咗Ｄ新架生，落主場揾Ｄ劃仔開齋！
韓國小磯竿、日本攪(大馬製造)、三號碳線。

19:15落到主場，即刻用枝新竿試吓好唔好釣，又覺得唔錯喎！同飛咗落海果枝冇大分別，仲長咗兩呎添(11呎)。
20:00見Ｄ流慢咗，我就打醒12分精神，金精火眼恰實打沉底果枝筏仔，唔使幾分鐘，果然有料到，竿頭好似比坑簾食緊咁樣震震吓，好細力，我就執起枝竿先，輕輕帶起舊餌(爛鬼蝦仁)，就感覺到有野擔住，我再慢慢收繩，佢就拉咗兩野，當佢發力搶餌嘅一刻，我就後發先至，一抽就即攪四五野，枝竿頂到行，再繼續收繩，一Ｄ都唔比机會條魚發圍，係咁直收上到水面，成條掟佢上岸，又係斤頭細鱗，安置好佢之後再落餌，今次就真係比坑簾化餌喇，果陣Ｄ流又行番，咁我就收起枝筏仔，用枝新小磯竿釣劃仔，釣咗十幾條之後，Ｄ坑簾又黎喇，咁我唯有執埋Ｄ架生鬆人去宵夜好過喇。

番到屋企又係自拍

都係細鱗至老友，幾乎餐餐都整條我嘆吓。

夾埋求其又當三斤。

真係希望長年都有得釣就正囉！