16-5-2012 (農曆四月廿六)
今日喺屋企食埋飯，他他條條成六點幾先落到主場，開好竿啱啱太陽落山，娟入碼頭底揾個靚位釣金古，一連落咗三四十口餌，都係比泥鯭咗，天都黑齊架喇，Ｄ泥鯭都仲未收口嘅！呢個時候師傅偉又到咗，佢就開兩枝竿添喎！泥鯭收埋口，大家三枝竿郁都未郁過。
21:15我枝竿有動靜喇，食咗兩三吓，跟住震震吓咁輕輕向下拉，係金古喇，我快速往上一抽，中咗！一中就係咁攪，好快就收咗佢上黎，解鈎落生籠；跟手再落餌，諗住Ｄ金古開口，點都有多一兩咀掛，可適一路釣到22:00都冇魚訊，咁我地就唯有執野走人，留力第日再釣過。
好努力咁不停換餌，都係得一條，真係疏口到不得了。
半斤十両都好過冇。
13-5-2012 (農曆四月廿三)
今晚都係主打金古，不過早到咗，Ｄ泥鯭未收口，好彩我早有準備，帶定盒千年蝦仁，釣吓沉底，攝吓時間。
天色開始暗落黎，我就即刻收起枝沉底竿，再開番枝竿釣金古，全晚只得一吓清楚嘅魚訊，一抽就中，上黎係磅頭金古，跟住一路釣到十一點都毫無動靜，又打破唔到一條到尾嘅宿命，都係執野鬆人去宵夜好過喇！
須然一條就少咗Ｄ，好彩都有磅頭。
用13年嘅老陳皮蒸，好食到頂呱呱。
夾埋又夠餐餸喇。
8-5-2012 (農曆四月十八)
呢輪釣鱸釣到悶，今次走去買半磅麵包(＄4.5又貴咗五毛)，落主場釣吓金古，睇有冇運行先至得。
18:30落到去，開好竿，縮入橋底，揾個比較大嘅窿(大約四吋乘十五吋)落餌；當泥鯭一收口，就即中一條手板大嘅金古，好小心咁由條(喇)收佢上黎，即入冰箱，點知一路釣到慢流先再中多條，跟住轉埋流都冇魚訊，只有早Ｄ執野走人，聽日再黎釣過。
釣成晚先至有兩條。
劏好放入冰箱先。
9-5-2012 (農曆四月十九)
今晚嘅魚訊仲少過上一晚，只係喺入黑前泥鯭收口果吓，先至有條中吓，跟住全晚得Ｄ零星魚訊，毫無金古就餌，我睇釣金古都未開季，下次都係玩番鱸魚好過。
2-5-2012 (農曆四月十二)
去咗幾日旅行，尋晚先至番黎，抖足精神，今晚又去主場過吓引先！
買好餌，19:00落到去，開好竿就坐定定等運到，釣咗一陣，師傅偉又黎到，佢一落餌就先拔頭籌，中條斤頭花鱸，我都不甘示弱，即刻起番條冇咁失威，跟住落黎就水靜河飛，連流都停埋。
10:00都係唔好磨爛蓆喇，齊齊執野走人去宵夜好過。
都仲有Ｄ鱸釣吓。
磅頭加斤頭花鱸一孖。
26-4-2012 (農曆四月初六) 大東南風
今晚我嘅釣友師傅偉有飯局，咁我就單拖落主場；去街市執廿隻生蝦，落到去都未夠18:30。
啱啱起流，出面又大風，咁我就喺躉頭擺陣，落餌冇奈釣鱸枝竿比魚拉咗一吓，我即刻攞埋撈箕過去，一執起枝竿條魚以經中咗，順勢攪幾吓，唔係大野，好快就撈箕上水喇，係斤幾嘅小鱸，解勾落埋生扣，一腳踢，勾隻生蝦再釣過。
20:40見Ｄ流慢咗Ｄ，咁我就放番枝沉底竿搏吓符碌先；坐低唔夠三分鐘，釣沉底果枝竿個鉸〝烈烈〞響咗一吓，我坐喺則邊，好快就拎起枝竿，說時遲那時快，條魚拖咗兩吓就發力搶餌喇，我就狠狠咁往上一抽，中咗！慣性動作連攪七八吓，嘩!!有Ｄ斤両喎~條魚想標番落底，我就頂到行，一路頂一路往上提竿，發覺條魚冇乜力果吓，又快速收佢十吓八吓，仲要將條魚帶離樁柱位，一出咗黎條魚見光就發哂茅，開尾向外面衝，喺呢個位置我就定當喇，唔再夾硬頂，咁就放番幾呎繩佢走吓，當佢一慢落黎果吓，我就左頂左收，右頂又收，幾招就將條魚拉到上水面，嗯!!紅鮋黎喎，都有兩三斤，速落撈箕上水，落埋生扣，即刻落餌睇仲有冇先！
一路釣到21:30，Ｄ風好似越吹越勁咁，海面都起哂湧，既然都以經有收穫喇，咁見好就收，執齊架生同魚獲，早Ｄ去宵夜喇喂！
番到屋企又向大人耀武揚威一番。
而花鱸係每次嘅釣胆黎架！
又準備劏魚~紅鮋兩斤十三X1
花鱸斤幾X1
24-4-2012 (農曆四月初四)
今日臨去釣魚果時，烏天黑地，好似想落雨咁，不過未落出，唔理三七廿一喇，有理冇理，執埋架生，落渣華道街市攞蝦，跟住就直跴主場。
一到主場，流水剛起，即刻喺躉頭開竿，19:10先中一條四斤花鱸，過咗冇奈再中條斤零嘅；呢個時候，師傅偉又到咗，佢開好竿就行過黎同我吹水，佢話依家咁行流，唔方有魚開口喇，話口未完，佢枝竿就響鉸喇，佢三步夾埋兩步過番去執起技竿，一抽就中，上黎係唔夠半斤嘅花鱸，解勾揼番落海，等養大Ｄ先再釣番佢。
又過咗一陣，我就悶到行行企企，望過去師傅偉度，見佢喺度搏緊命，嗯!!中大野喎~咁我就攞埋撈箕過去幫拖，行到過去見佢停哂手嘅，但係見枝竿仲係彎哂喎，哈哈!!條魚包咗樁，佢就鬆吓收吓，條魚此終都唔肯番出黎，我就梗係比Ｄ鼓勵性嘅說話佢喇~比Ｄ耐性，條魚一日唔走，實會比你拉番出黎嘅，講完我就行番去自已果邊；大約過咗十幾分鐘，見佢企番起身頂魚喎！卒知比佢拉番出黎，我做魚僮，撈箕上水又係四斤花鱸，落好生扣攪掂哂，又回復番平靜。
一路釣到轉埋流，幾枝竿都冇再郁過，22:15執野走人，早Ｄ去宵夜好過喇。
番到屋企兩隻貓咪咪咁叫，嘈醒咗大人，咁就順便同我影幾幅相先喇。
兩條都差唔多大喎！
呢條就細咗ＤＤ。
又有排劏喇。
23-4-2012 (農曆四月初三)
今日心大心細，去唔去釣魚呢！卒支師傅偉來電，問今晚制唔制，比佢一問，我嘅答案當然係制喇；一手攞起Ｄ釣魚架生，跟住去街市攞埋蝦就直跴主場喇。
19:10落到去，流水都幾急吓，咁我就喺躉頭開竿，過咗冇奈師傅偉都到咗，佢就例牌喺橋面釣鱸，擺好個陣就喺度吹水，特然我沉底枝竿響鉸，我即刻執起枝竿，等佢再食深Ｄ果吓就抽竿，中咗！我就快速攪咗五六吓，嗯！有Ｄ力喎，唔似牛屎，咁我就唯有頂幾秒先喇，跟住再攪幾野，又頂一陣，條魚想向樁柱衝，我就邊頂邊拉，追返幾手，一見條魚出番黎就唔客氣喇，又使出絕招「無敵風火輪」，一路將條魚攪上水面，唔怪得片得咁犀利喇，原來係斤幾重嘅牙點，師傅偉己經落咗撈箕一野就上水喇，將條魚落好生扣就繼續。
一路釣到21:20，師傅偉連起兩條鱸，我見橋面咁好魚，速速轉陣上埋橋面搏殺，搬咗上去冇幾奈又比我中多條鱸喎，呢次即入冰箱，因為時間都差唔多喇，見好就收，有魚留番聽日釣，執埋Ｄ架生就去宵夜囉！
番到屋企，三公主啱啱去完台灣番黎，咁就揾佢同我影將相。
今晚釣沉底中獎，牙點斤幾。
大人話:「係囉，釣多Ｄ呢Ｄ魚吖嘛」！
佢以為釣魚可以簡黎釣喎，真係比佢笑鬼屎。
又牙點又花鱸今晚都算大豐收。
日日有咁好魚就正喇~ 牙點斤幾X1
花鱸斤幾X3
21-4-2012 (農曆四月初一)
登埋前晚中果兩條爛鬼鱸魚(大人話)先。
