29-10-2010 (農曆九月廿二) 暖過噚晚
上次比條鱸走甩，成晚瞓唔著，一於今晚去
捉番佢，於是早Ｄ食飯，跟住去買蝦，七點
幾落到主場，連開兩枝竿都係半水，唔釣沉
底，睇Ｄ鱸魚走得去邊！
過咗成個鐘，Ｄ流水依然都幾急吓，諗住飲
啖水，特然聽到鉸響，黎料喇，我一攞起枝
竿，條魚就發力搶餌，我順勢噤住個鉸往上
一抽，跟手連攪六七吓，再往上一帶，條魚
己經離咗樁柱位向外標出，我就比佢走幾呎
喇，再頂~~一左一右跟住收絲，順一順咁
就收佢埋黎，撈箕上水，條鱸好長喎！瘦咗
Ｄ，冇我上次喺南丫釣果條咁肥，今次又揾
陣Ｄ落兩個生扣。
一路釣到成十點幾都係冇魚訊，又係得一條
，算數！今晚唔磨爛蓆囉，執埋Ｄ架生鬆人
，早Ｄ去宵夜好過。
唔好成日話我個甫士次次都係一樣，今次擺
嘅甫士有形喇掛！
過磅得五斤咋！捉番條鱸，今晚好瞓囉。
準備劏魚。
28-10-2010 (農曆九月廿一) 幾凍吓
今日個個都有約，咁我為有單打獨閗喇！
19:30到咗主場，流水好急，揾番個比較慢
流位開竿，又係兩枝沉底，一枝半水釣鱸。
放落去唔洗五分鐘，釣半水果枝竿已經有魚
咬餌，魚訊越尼越強， 我等佢一野拉落去就
揪竿，中咗！因為附近樁柱多，冇得玩，快
手快腳收佢上黎，見斤零重牛屎立，費事洗
撈箕，一野就掟佢上岸，嘩好險！上咗黎個
鈎即刻甩咗喎，真好彩。
嗱嗱聲將條魚落好生扣，尼次我落兩個扣揾
陣Ｄ，「因為噚晚釣咗條兩斤幾嘅花鱸，生
扣落得唔好，冧走果陣先發覺比條鱸走咗，
攪到成晚瞓唔著」，所以尼次小心Ｄ囉！
我個心諗:「咁早中魚，今晚起碼有兩條掛」
！咁就坐定定，牛咁眼啤實幾枝竿，但係一
路都冇魚訊！好~再冇魚食餌就十點鐘走人！
又到咗十點，好~再冇魚食餌就十點半走人，
反反覆覆，卒之磨爛磨到成十二點，都係冇
魚咬，唉！算吧喇，都係得一條。跟住收架生
走人，去宵夜囉喂！
番到屋企梗係要自拍喇，大人覺覺豬，冇我
咁好氣！
25-10-2010 (農曆九月十八) 東北風
打完風，喺主場釣咗幾次都未見鱸魚嘅踪影
，得Ｄ魚仔玩吓，所以今日特登約埋老友仔
「高橋」，往南丫煤橋釣番轉，睇有冇意外
驚喜先。
果日19:00我買好餌，就到北角接埋「高橋」
，直往鴨脷洲嘅洪勝碼頭進發，碼頭果度啱啱
有個停車場，夜泊35蚊，又平又方便。知道
今晚吹東北風，所以約咗個艇家係「楊金」
，佢架艇大Ｄ、定Ｄ，同埋帶多件風褸檔風。
19:45泊好架車，落艇就向目的地進發喇！
經過45分鐘嘅船程就到咗目的地，我今次上
最近岸邊果枝樁(係第一次)，聽講呢度有怪
獸，而「高橋」例牌上五樁。
20:30我一上到去就嗱嗱聲開咗四枝竿，兩枝
筏仔蝦肉沉底，一枝筏仔生蝦到底，最後果
枝梗係路亞竿半水生蝦釣鱸魚喇！
22:45過咗兩個幾鐘，都係落緊流，我帶黎
宵夜嘅牛什粉都食埋喇，四枝竿郁都未郁過
，只有Ｄ蟹係度化餌。無無寮寮收番釣半水
果隻蝦上黎睇吓先，見佢仲生猛過我，就換
個位再放落去。
我好例牌式咁用手放十幾呎深，點知放放吓
就見竿頭有極為沉重嘅拉力，嗯~有料到！我
呢頭隻手揸番隱枝竿，果頭條魚以經發難喇
！我知係大野，梗係用盡全身力去頂喇，跟
住唔理三七廿一，搏命收絲，一呎都唔比佢
，感覺到佢Hi住條樁邊，條絲洌洌聲，聽到
我心都寒埋，冇計喇都要收架，卒知收到條魚
出喇，咁就有得玩同我都要回吓氣，放番Ｄ絲
比佢走吓，跟住又頂番起佢，玩咗一兩轉，
佢就使出絕招「飛出水面洗鰓」，我就梗係
拉番直條線，順勢將佢抽埋腳邊，落撈箕上
水喇，嘩有五六斤喎，落好生扣，人魚大戰
結速！繼續釣。
呢個時候「高橋」打電話過尼報捷，話中咗條
兩斤牛屎，互相道賀一番。跟住轉埋流，一路
都冇魚訊！到咗03:00艇家黎接我地番鴨脷洲攞
車，再落香港仔食宵夜，再車返「高橋」番北
角。我番到屋企劏埋魚、冲埋涼都成五點幾喇
，Ｄ架生留番聽日先至洗，跟住去覺覺豬喇！
今季第一條鱸，又係玩自拍。
條鱸成兩呎幾長，過磅得六斤四咋！
22-10-2010
早前釣嘅絲立仔同藍花蟹。
隻蟹大人用尼煲粥，食到佢嗒嗒聲。
18-10-2010 (農曆九月十一)
乘勝追擊，今晚又落主場，我就用千年虾釣沉
底，師傅偉都係用千年虾，不过佢用三磅手繩
釣立仔。
21:15左右，我就中魚喇，師傅睇住，梗係唔
衰得喇，佢一食落去，我就抽竿，用標準手勢
，一帶一攪，佢發力我就比幾呎佢走吓，姿勢
仲要正確，好似考試咁。師傅偉話:「釣就釣喇
，唔好扮野，走埋條魚你又瞓唔著覺喇」！我
又點會比佢走吖，三兩吓就將佢收咗上岸，係
斤零重細鱗，落好生扣繼續釣。
过咗一陣，輪到師傅偉中魚喇！只見佢一路
放絲，條魚將條絲帶咗起碼廿呎，跟住埋樁
，即斷！毫無還擊嘅能力！鬼咩~~三磅絲。
佢話條魚起碼三斤以上，爭Ｄ燒手添呀！
再釣多一陣，見冇乜魚訊，齊齊執野走人喇！
再中細鱗，個人影幅相都酷Ｄ嘅！
17-10-2010 (農曆九月初十)
今日食咗晚飯，三公主話去銅鑼灣，咁我就
話:「等我車你落去吖」！趁大人飯氣攻心，
入房瞓覺，我就嗱嗱聲執埋Ｄ架生，喺雪柜
冰隔囉埋盒千年蝦，就出發喇
。
喺時代廣場放低咗三公主，就即刻掉頭跴落
主場喇！21:30到咗主場，快手快腳開好兩
枝竿，都係用千年虾肉打沉底，一路都係比
Ｄ蟹仔化餌，大約過咗半個鐘度，有枝竿頭
拉咗一野，黎料喇！當佢大力搶餌果吓我就
抽竿，中咗！有Ｄ力，我好快咁就將佢升水
上埋岸，斤頭細鱗，落好生扣繼續釣！又過
咗大半個鐘都係同蟹有約會，望吓個錶，都
成十一點幾嗱，都係執野走人，去宵夜好過
囉！
今晚速戰速决，執番條。
斤頭細鱗都好吖。
影埋張昇盤相就劏得。
