28-12-2014 (農曆十一月初七)
幾日都吹大東風，又落雨，困係屋企百無聊賴，今日吹番北風，天氣較為好Ｄ，釣魚虫又共共吓，即刻執埋架生，去買廿零隻蝦，落主塲過吓引至得！
18:00落到去，水流仲未轉，可以慢慢開好竿，兩枝半水釣鱸，一枝筏仔釣腳邊，跟住就坐定定等運到；一路到轉埋流，三枝竿都係郁都未郁過，冇魚中就零舍凍，縮吓縮吓到咗十點，個心諗住再釣半個鐘就走人，到咗十點半見Ｄ流水咁靚，又唔願走住，好！再釣多半粒鐘先走，又去換番Ｄ生猛嘅蝦落去先，點知一落隻蝦就係咁跳，我即刻準備，等咗一陣又停咗，咁我唯有放番低枝竿，過咗分幾鐘，竿頭又跳咗幾吓，係佢喇，執番起枝竿，又唔郁喎，我就慢慢收幾吓，呢次有反應喇，竿頭一沉我就順勢一抽，中咗！仲有Ｄ斤両添喎，快攪幾吓，條魚就發力往樁柱位衝，枝竿頂到烈烈聲，焗住比少少佢走吓，佢一慢我就頂，連消帶打，狂收八九吓，條魚出番黎，咁就好玩喇！一放一收五六轉，條魚仲想飛出水面洗鰓，喺水面打水打到拍拍聲，冇用嘅，點走得甩吖，最後乖乖投降比我收埋黎，撈箕上水，條鱸都有三四斤，落好生扣再落餌繼續，呢次一落就接餌，仲打橫走添，梗係鱸仔嘅所為喇，唔理咁多就抽竿，中咗！收幾吓就知條魚包咗樁，咁我就唔郁住，等咗一陣，條魚就游番出黎，都費事同佢玩，幾吓手勢就收到上水面，都係撈箕上水，解鈎即時入冰箱，望吓個錶都十一點幾，見好就收，有魚留番聽日釣，執埋Ｄ架生，走人去宵夜喇～
要磨爛蓆仲要凍到飛起先有兩條花鱸比我。
好彩個海仲有花鱸，唔係又要「享受過程」喇！
呢條花鱸都有三四斤。
釣番兩絛花鱸壓冰箱。
18-12-2014 (農曆十月廿七)
噚晚固住釣石狗冇釣鱸魚，今晚一於買廿隻生蝦去做Ｄ大花鱸世界；18:00落到主場，見Ｄ流開始慢，嗱嗱聲開好兩枝釣鱸竿，想話開埋釣沉底枝筏仔，特然聽到鎯鎯響，其中一枝竿有魚食餌，我即刻攞埋撈箕飛撲埋去，跟住又冇哂動靜，點知隔離果枝竿又響喎，竿頭仲拉緊落去添，我一手執起枝竿，連攪幾吓，再一抽，大野！條魚開始發力，頂咗一陣都係要比番Ｄ佢走吓，當佢一慢落黎我就再頂，跟手快攪六七吓，只見水中銀光一閃，又比佢發力標番落去，局住又比番幾呎佢，如果唔係炸竿都有之，今次佢冇乜力喇，咁我就快速收佢上水面，跟手落撈箕上埋水，條鱸都有三四斤，解鈎落生扣，換餌繼續；過去睇吓第一次響鎯鎯果枝竿隻蝦有冇事先，想話收番上黎睇吓，點知一收就有魚埋黎搶餌，食咗兩吓，我一抽又中，跟住一路頂一路攪，好快又收到上水面，呢條細Ｄ，兩斤幾三斤唔夠，安全起見都係撈箕上水，解鈎落埋生扣，換餌繼續；連起兩條索哂氣，坐低抖順條氣先，跟住開埋正話開咗一半釣沉底果枝筏仔；呢個時候已經轉哂流，三枝竿一路擺到十點幾都未郁過，都係時間執埋Ｄ架生，走人去宵夜好過喇！
又中大花鱸。
今次呢兩條花鱸有Ｄ份量喇。
花鱸三斤幾同兩斤幾各一條。
17-12-2014 (農曆十月廿六)
今晚Ｄ流水唔啱釣鱸，所以冇買生蝦，喺雪柜摷番盒千年蝦仁出黎，落主場過吓引先。
18:00落到去，開好兩枝竿，都係釣沉底，筏仔就釣腳邊，小磯竿就掟出去搏符碌，一路釣到成九點幾，除咗幾條坑簾，兩枝竿郁都冇郁過，唔係喇，收番腳邊枝筏仔，去釣番幾條石狗交差至得，釣咗一陣都有六七條，仲幾大吓添，到十點幾都仲係冇乜起色，都係執野走人去宵夜好過喇！
冇大野，釣住幾條石狗先。%E5%86%87%E5%A4%A7%E9%87%8E%E9%87%A3%E4%BD%8F%E5%B9%BE%E6%A2%9D%E7%9F%B3%E7%8B%97%E5%85%88.JPG)
10-12-2014 (農曆十月十九)
噚晚中咗大花鱸，今晚梗係要乘勝追擊喇；去釣魚店執十幾隻蝦就直跴主場，18:00落到去，照舊開兩枝竿釣鱸，再開多枝竿沉底釣腳邊；一路釣到21:00，只有兩次小鱸黎偷蝦，沉底果枝就更加唔駛理，坐低想話飲啖水，咧........響鉸！沉底果枝竿比魚狂拉咗五六呎，我即刻執起枝竿順勢一抽就快收幾吓，感覺到條魚線 Hi 住樁，原來條魚一扯餌就標番埋樁，我即刻唔敢大力拉，慢慢收線，一路輕輕拉，到收唔郁為止，呢個時候全世界都靜咗落黎，下面冇哂扯力，而我又收唔到線，唔通條魚以經爆咀走咗！等咗分幾鍾都係冇郁過，咁我就先收緊小小線，再放低枝竿睇有咩動靜；過咗十分鐘，咧～個鉸微微響咗一吓！嗯，証明條魚仲喺度，咁就有心机同你玩喇！過咗一分鐘，我輕輕拉吓魚線，條魚又郁一郁，拉吓扯吓又過咗幾分鍾，今次我放鬆多少少比佢，果然中計，條魚斯斯然咁游番出黎，今次你仲唔屎～順勢一拉，仲要行幾步，再快收幾吓，再頂再收，條魚軟哂，毫無抵抗能力，好快就將條魚收到上水面，嘩正呀！三斤嘅青班，即落撈箕上水，原來中咗魚都要有耐性先至上到黎嘅！ 跟住解鈎落兩個生扣，換過 Hi 花咗Ｄ魚線，落餌繼續；一路到轉埋流都冇動靜，望吓個錶又到十點，都係執野走人去宵夜好過喇！
沉底中三斤青班。
又有得向大人耀武揚威。
中三斤青班又有飯開喇！
9-12-2014 (農曆十月十八)
去完旅行番黎，休息咗一日，今晚又去主場過吓引至得；先去買幾両蝦，18:00落到去，先開兩枝竿釣鱸，再開多枝竿打沉底搏符碌；開好哂當想話坐低飲啖水，見枝鱸竿比魚拉咗野，執起枝竿又冇咗動靜，慢慢收幾吓，Ｄ魚線虛哂嘅！梗係Ｄ鱸仔担餌升水喇，我即刻收番Ｄ虛線，直至感覺有魚拉嘅時候就一抽，中咗！連攪幾吓就見魚喇，係條兩斤都唔夠嘅鱸仔，一野掟佢上黎，解鈎落生扣，換餌繼續；一路釣到21:15Ｄ流開始慢落黎，望過去遠Ｄ果枝鱸竿嘅竿頭比魚拉咗一吓，我嗱嗱聲走埋去執起枝竿，呢個時候條魚就開始爆喇，嗯！大野～，唔想炸竿，鬆兩手比佢先，跟住快收番佢幾手，頂一陣又比番Ｄ佢走吓，如是者頂吓收吓，鬆吓收吓，唔駛一分鐘就收到上水面，唔怪得咁好力喇，條鱸有三四斤，今次要用撈箕上水喇，上咗黎解鈎落兩個生扣，，換餌繼續；22:00Ｄ流都轉埋，跟住再冇魚訊，沉底果枝竿成晚都未郁過，都係有魚留番聽日釣，執埋Ｄ架生，走人去宵夜喇喂～
呢Ｄ先至係鱋魚吖嘛。
Ｄ大鱸開始埋黎喇。
今晚中四斤同斤半花鱸。
2-12-2014 (農曆十月初十)
今日都係天陰陰，仲凍咗Ｄ添，都係釣鱸嘅好天氣，去執十零隻蝦就直跴主場，去到見有Ｄ釣友喺度就傾咗一陣，18:15Ｄ流水開始轉，嗱嗱聲開枝小磯竿順流掟出去搏符碌，跟住再開多兩枝竿釣鱸，落餌唔夠五分鐘釣鱸枝竿頭郁咗一吓，即刻執起枝竿，慢收兩三吓，條魚就慢慢拉落去，我都唔等佢拉竿，一抽就中，冇乜力，好容易收上黎，成條飛上岸，係條兩斤鱸仔，即入冰箱，落餌繼續，一落就有魚接，過程同先前一樣，上黎條鱸又係唔夠兩斤，再落餌就靜哂，呢個時候開始落雨添，過咗個零鍾，望過去小磯竿果邊，見枝小磯竿彎哂，跟住連個冰箱都拉咩（我個冰箱係裝咗個竿架嘅，枝竿係放喺竿架度），心諗唔通中大野，我九秒九飛撲埋去想執起枝竿，都未埋到去，成枝竿就喺竿架度飛咗出去，好彩有失手蠅，嗱嗱聲扯番枝竿上黎，但都係扯到行，跟住＂啪＂一聲，魚線斷咗，再望清楚，原來有架PK亷艇，鈎咗我條魚線，係咁扯米斷囉～即時火都黎埋，大大聲媽差佢祖宗十八代！屎屎氣睇吓枝竿，魚線清杯冇哂，枝竿頭佳斷埋，谷氣都冇計架，為有收番好枝竿，聽日去比人修理喇！
咁樣一攪，乜野引都冇哂喇，跟手執埋Ｄ架生，走人去宵夜喇～
風大雨大好彩都仲有兩條釣吓。
Ｄ花鱸都係唔夠兩斤。
比架PK簾艇扯斷咗枝竿頭，魚線清杯，頭佳冇咗，我睇頭蕊都要換過，肉都赤埋～
29-11-2014 (農曆十月初八)
見噚晚都有兩條鱸仔玩吓，今晚又落主塲睇有冇運行先；去釣魚店執十零隻蝦，18:00落到主場，開好兩枝釣鱸竿，再開多枝笩仔釣腳邊沉底；全晚三枝竿都未郁過，到十點半就投降，倒蝦執野走人， 執執吓見最後未收果枝竿頭點咗一吓，Ｄ衰鱸仔呢個時候先至黎開口，即刻放低Ｄ野，行埋去執番起枝竿，見條魚線斜到机乎升到上水面，呢Ｄ一定係鱸仔嘅所為喇，我一抽就收，輕飄飄，唔慌大，收到埋黎順勢一掟，成條鱸仔掟上黎，條鱸真係好細，一斤都冇，解鈎即入冰箱，Ｄ蝦又倒哂，冇得繼續添，叠埋心水走人去宵夜喇！
今次條鱸細到唔比手指尾都唔得喇！
磅頭小鱸。
28-11-2014 (農曆十月初七)
去完旅行番黎都未釣過魚，唔係落雨就係吹大東風，今日天氣較為好Ｄ，嗱嗱聲去執十零隻虾，去主場踎番陣先。
18:00落到主場，今次目標魚係花鱸，所以開兩枝竿，剩係釣半水；一路釣到轉埋流，兩枝竿郁都未郁過，到九點幾，發覺擺定喺度釣都唔係辨法，谷鬼氣攞起枝竿四圍拖吓，隻蝦拖到接近水面即見有條鱸跟住上黎，即刻放番落去，唔食，仲走埋添，又放深Ｄ，拖上拖落，拖吓左拖吓右，見冇乜動靜就停低，唔夠幾秒竿頭比魚拉咗一吓，跟住見條魚線慢慢打横走，我驚比條魚帶埋樁柱度，即刻輕輕收兩吓，條魚又停低，跟住又拉咗一吓，我就一路慢慢提起枝竿，呢吓動作就引到條鱸搶餌喇，一吓將竿頭拉落去，我順勢一抽，中咗，冇乜力，好容易收到水面，見條鱸唔係大，兩斤都唔夠，費事洗撈箕，我就成條飛佢上黎，解鈎直入冰箱，換餌繼續去番果個位放落去，一落又係咁食餌，再釣多條上黎，都係同一大細，入埋冰箱再繼續，不過再冇魚食餌，拖多大半個鐘，都係水靜河飛，釣到十幾就執埋Ｄ架生，走人去宵夜喇喂～
捉到兩條鬼鼠花鱸仔。
兩條唔夠兩斤嘅花鱸仔。
20-11-2014 (農曆閠九月廿八)
釣咗咁多晚沈底有Ｄ悶，今晚買十零隻沙蝦，去主場釣吓花鱸至得。
06:30落到去，開咗枝竿釣鱸，正想開多枝竿，望望釣緊果枝竿，見到竿頭微微郁郁吓，即時放低手上嘅野，走過去執起枝竿，感到有野好細力咁拉拉吓，跟住睇到條魚線打橫走，呢Ｄ現像一定係花鱸仔先係咁食餌，我慢慢收咗幾吓，條鱸魚又拉幾拉，谷鬼氣一抽，中咗，毫無反抗，一路上水面，係條唔夠兩斤嘅花鱸仔，本來想一野飛佢上黎，不過頭威頭勢，為安全起見，都係落撈箕上水，解鈎即落冰箱，換餌繼續；咁早中魚，心諗梗係好多鱸喺度定喇！嗱嗱聲開埋另外枝竿，金晴火眼望到實，點知都係一條到尾，釣到十點幾，兩枝竿郁都未郁過，算把喇，須然得一條，但係都係目標魚吖，都係留力下次再釣過，跟手執埋Ｄ架生，走人去宵夜喇！
今季第一條鱸。
季初鱸兩斤都唔夠！
18-11-2014 (農曆閠九月廿六)
今晚見得閒，又落主塲踎吓，18:00落到去開好竿，一枝筏仔釣腳邊，一枝小磯竿掟出去釣魚仔，釣到19:30轉流，Ｄ流水好靚，諗住實有細鱗埋黎咬，點知釣到起哂流，剩係Ｄ坑簾喺度攪攪震，轉個位置，用枝小磯竿順流掟出去，睇有冇運行，再攞住枝筏仔週圍釣吓石狗，點知今晚連石狗都唔開口，反而離遠見到枝小磯竿比魚扯咗兩吓，我即刻跑番過去，執起枝竿，慢慢收兩吓就即刻有反應，竿頭一拉我就順势一抽，中咗，不過冇乜掙扎力，心諗唔通係泥婆！一路收到見魚，原來係條斤頭黃釘，撈箕都費事落，成條抽佢上水，解鈎即入冰箱，換餌掟番出去繼續；過咗一陣，小磯竿頭又係拉咗兩吓，呢次成枝竿彎哂，條魚中咗喇！我一執起枝竿以經感到有魚拉住，一頂起就追番幾手，頂吓收吓，中途都有Ｄ掙扎，但係都屬於輕微，好容易又收到見魚，又係黃釘，不過呢條大Ｄ，接近兩斤，今次要用撈箕上水喇，將條魚解鈎入埋冰箱，換餌再掟出去，今次過咗半個鐘都冇動靜，望吓個錶都十點幾喇，既然有收獲就費事磨爛蓆，執埋Ｄ架生走人去宵夜喇喂～
嘈醒咗大人同我影相，我話今晚黃斑起雙飛。
斤零兩斤呢Ｄ哂士清蒸就至正。
中兩條班，聽日有飯開喇！
17-11-2014 (農曆閠九月廿五)
細鱗食餌原來同坑簾差唔多嘅；前日番主場起咗條紅鮋，今晚又落去睇有冇運行。
18:00落到主場，開好竿，一路釣到十點幾，都係得幾條石狗仔，其間都係Ｄ坑簾喺度攪攪震，谷鬼氣係咁釣佢，足足釣咗十一條，一上黎就撻生魚咁撻C佢先至解鈎，再落餌，即刻有魚接，起初以為又係坑簾，扯咗幾吓，我就輕輕帶起枝竿，一拉落去我就抽竿，又中！順勢攪咗幾吓，但係呢次重重地嘅，話口未完條魚以經發力想開尾，嘩！大野～仲好似係細鱗添喎！我本來坐喺度嘅，即刻企番起身頂陣先，追番幾手線再頂，一頂一收，睇住仲有十呎八呎就上到黎，但係條魚仲係向脚底嘅樁柱位衝，再想話帶佢出黎以經遲咗，又痴咗樁，我梗係唔敢夾硬扯佢喇，只有放鬆少少等佢游出黎，等咗十幾秒，果然條魚以為走得甩，施施然咁慢慢游出黎，見机不可失，一帶起枝竿就一路收條魚上到水面，果然係係兩斤細鱗，即落撈箕上水，直入冰箱；落餌繼續釣咗陣，都係坑簾，望吓個錶又成十一點嗱，時間過得真係快，又係時候講拜拜，執埋Ｄ架生，走人去食宵夜喇。
係要番主場先至有細鱗嘅。
中佢嘅過程十分精彩。
中番條細鱗兩斤幾，都算係咁喇！
15-11-2014 (農曆九月廿三)
因時勢風烟四起，成個幾月冇落主場玩，須然喺呢段時間踎泊邊都有中魚，收獲仲幾豐富吓添，但係都冇喺主塲釣得咁舒服同自在，望住個海，一個人靜靜地又好，有時同釣友吹吓水又好，無拘無束，釣魚真係講享受過程架！
今晚趁風烟降温，的起心干喺雪柜摷番盒千年虾仁，一於落主場踎番晚～
六點落到主場，釣友章哥啱啱准備執野走，咁奈冇見，大家不免傾多幾句，之後問佢依輪有冇黎，佢話都係最近先黎番釣一兩次，佢仲話個海水靜河飛，乜都冇；佢走咗我就出去開竿，一枝筏仔釣腳邊，一枝小磯掟出去釣魚仔，開好竿就坐定定等運到；一路都係坑簾喺度攪攪震，一連釣咗十幾條，全部就地正法，到八點左右，脚邊枝筏仔特然響鉸，啫!!!!一聲，比條魚扯咗三四呎，我即刻執起枝筏仔，收番鬆咗嘅線，說時遲，那時快，條線一緊條魚就發力搶餌，我順勢一抽，中咗！連攪六七吓，感覺係大野，頂咗兩三秒想話再收，條魚再發力往樁柱間衝，我想禁實個鉸頂一陣，不過枝筏仔以經超負荷，再頂實炸竿，一猶豫條魚再發力，呢個時候我焗住比幾呎佢走吓，咁樣一走就埋咗樁，我唔敢大力拉，只有輕輕放鬆Ｄ魚線，等條魚離樁，好彩唔夠十秒條魚就游番出黎，我即刻把握呢個機會快速收線，一路收一路將條魚帶離險境，頂吓收吓好快就上到水面，見魚喇，唔怪得咁好力喇，原來係紅鮋，即落撈箕上水，望真Ｄ條魚都好靚仔，都有兩斤，將佢即落生扣，換餌繼續。
又過咗兩個鐘，依然係坑簾，坑簾，都係坑簾，係枝磯竿仔中條紅衫仔咁大把，望吓個錶又到離場時間，執埋Ｄ架生去宵夜喇～
番主場即中兩斤紅鮋。
條紅鮋紅卜卜，大人都話正。
呢條紅鮋應該係野生喇掛！
紅鮋紅衫雙紅會。
之前喺泊邊釣收獲都唔錯，趁寫開野，順便同大家分享吓！
喺泊邊一中魚就好多人圍埋黎，又影相又成日揪起條魚睇，咁我都冇乜所謂，只係喺主塲靜慣，喺呢度熱鬧就有Ｄ唔慣囉！
10-11-2014 (農曆閠九月十八)
中番條放生躉。
呢條躉足五斤。
仲有條青班仔。
釣泊邊都咁好魚。
13-11-2014 (農曆閠九月廿一)
黃腳仔都唔放過。
釣番幾條黃腳仔食吓。
14-11-2014 (農曆閠九月廿二)
得兩條黃腳仔，好彩有隻斤幾嘅大墨同隻QQ蟹蹬場嘖！
釣友話係麵包蟹喎。
我就話係雷公蟹喇。
第一次釣到呢種蟹咋～
大人食過話好味，不過冇羔冇肉，得蟹蚶有兩舊肉咋，蟹身都有少少肉嘅，壳裏面空空如也，得個樣靚囉，放水族箱養就啱！！
隻墨魚煮熟咗慢慢嘆。
4-11-2014 (農曆閠九月十二)
去完旅行番黎，都未去過釣魚，今晚一於釣番轉，喺雪柜摷番盒千年虾仁，飛車落副主場，泊好車，嗱嗱聲揾個位開竿，唔知係米轉天氣關係，連立仔都冇條，一路都係比Ｄ蟹係度攪攪震，加上坑簾都喺度攪埋一份，越釣越冇引；釣到22:00點幾，口餌又係比蟹拉吓拉吓，我谷鬼氣等佢大力拉果吓就發力一抽，中咗喎，當然冇中魚咁過引喇，不過Ｄ蟹煩咗我成晚，釣到佢當報仇；收到上水面一睇，嗯！藍花蟹喎，成七八両重添，一手拉佢上黎，隻鈎原來鈎住隻蟹個咀，解鈎即入冰箱，落餌繼續，磨爛蓆釣到24:00除咗坑簾，始終都係冇魚食餌，都係留力第日玩過喇，跟住執埋Ｄ架生，去宵夜好過囉！
洗乾剩將佢成隻清蒸，原汁原味。
大人食到嗒嗒聲，佢仲話唔夠喉，叫我去釣多幾隻喎～
14-10-2014 (農曆九月廿一)
見天氣咁好，喺雪柜摷番盒千年虾仁，今晚又再去泊邊玩吓，睇有冇運行至得！
18:15落到去，泊好架車就嗱嗱聲開竿，流水剛起，照平時咁，一枝筏仔釣脚邊，一枝小磯掟出Ｄ釣魚仔；一路釣到成十點幾，由起流釣到開始轉落流，脚邊枝筏仔郁都未郁過，而小磯竿都有Ｄ魚仔扯吓，成晚好彩有位新釣友「輝哥」喺度同我吹水，傾傾下特然聽到枝筏仔響鉸，即刻執起枝竿，先慢慢收番多少線，再輕輕一帶條魚就發力搶餌，順勢一抽，中咗！釣場水淺，連攪七八吓以經見魚，條魚見光就發茅，再發力向下衝，我冇放綫，只係就一就佢再攪幾吓，條魚好乖咁上到水面，嘩！斤幾龍虎斑，都唔知幾奈未釣過喇，個心即刻諗點食佢好呢，哈哈～都係撈箕上水先喇，又引來幾位觀衆圍觀，食到入哂扣，唯有剪綫即入冰箱，挷過鈎落餌繼續。
卒之釣到十二點，都係一條到尾，執好Ｄ架生，再同輝哥講拜拜去宵夜喇！
又比我喺泊邊中番條龍虎斑！
龍虎斑做晚餐。
%E9%87%A3%E7%95%AA%E5%85%A9%E7%B5%9B%E8%8A%B1%E9%B1%B8%E5%A3%93%E5%86%B0%E7%AE%B1.JPG)
%E8%8A%B1%E9%B1%B8%E4%B8%89%E6%96%A4%E5%B9%BE%E5%90%8C%E5%85%A9%E6%96%A4%E5%B9%BE%E5%90%84%E4%B8%80%E6%A2%9D.JPG)
%E4%B8%AD%E4%B8%89%E6%96%A4%E9%9D%92%E7%8F%AD%E5%8F%88%E6%9C%89%E9%A3%AF%E9%96%8B%E5%96%87.JPG)
%E4%BB%8A%E6%99%9A%E4%B8%AD%E5%9B%9B%E6%96%A4%E5%90%8C%E6%96%A4%E5%8D%8A%E8%8A%B1%E9%B1%B8.JPG)
%EF%BC%A4%E8%8A%B1%E9%B1%B8%E9%83%BD%E4%BF%82%E5%94%94%E5%A4%A0%E5%85%A9%E6%96%A4.JPG)
%E7%A3%85%E9%A0%AD%E5%B0%8F%E9%B1%B8.JPG)
%E5%85%A9%E6%A2%9D%E5%94%94%E5%A4%A0%E5%85%A9%E6%96%A4%E5%98%85%E8%8A%B1%E9%B1%B8%E4%BB%94.JPG)
%E5%AD%A3%E5%88%9D%E9%B1%B8%E5%85%A9%E6%96%A4%E9%83%BD%E5%94%94%E5%A4%A0.JPG)
%E4%B8%AD%E5%85%A9%E6%A2%9D%E7%8F%AD%E8%81%BD%E6%97%A5%E6%9C%89%E9%A3%AF%E9%96%8B%E5%96%87.JPG)
%E7%B4%B0%E9%B1%97%E5%85%A9%E6%96%A4%E5%B9%BE%E7%AE%97%E4%BF%82%E5%92%81%E5%96%87.JPG)
%E7%B4%85%E9%AE%8B%E7%B4%85%E8%A1%AB%E9%9B%99%E7%B4%85%E6%9C%83.JPG)
%E9%87%A3%E6%B3%8A%E9%82%8A%E9%83%BD%E5%92%81%E5%A5%BD%E9%AD%9A.JPG)
%E9%87%A3%E7%95%AA%E5%B9%BE%E6%A2%9D%E9%BB%83%E8%85%B3%E4%BB%94%E9%A3%9F%E5%90%93.JPG)
%E5%A5%BD%E5%BD%A9%E6%9C%89%E9%9A%BB%E6%96%A4%E5%B9%BE%E5%98%85%E5%A4%A7%E5%A2%A8%E8%B9%AC%E5%A0%B4.JPG)
%E9%9A%BB%E8%9F%B9%E9%83%BD%E6%9C%89%E4%B8%83%E5%85%AB%E4%B8%A1%E5%A4%A7%E4%BA%BA%E9%A3%9F%E5%88%B0%E5%97%92%E5%97%92%E8%81%B2.JPG)
%E8%80%81%E8%99%8E%E6%96%91%E5%81%9A%E6%99%9A%E9%A4%90.JPG)
