16-4-2012 (農曆三月廿六)
兩日都落雨，今日較為好天，即刻走去買十零廿隻蝦，18:30落到主場，見以經有三四個釣友喺度釣緊，咁我就揾個靚位開好竿，呢個時候Ｄ流開始慢落黎，過咗一陣，見枝竿頭拉咗一吓，我一執起枝竿就抽，中咗，好細條，幾吓手腳就將條鱸仔上水，費事洗撈箕，一野就掟佢上黎，半斤鱸仔，落好生扣，落餌繼續。
又過咗一陣，行過去睇吓枝沉底隻蝦有冇比蟹化餌先，當我攪緊上黎嘅時候，聽到剛才中魚果枝竿響哂鉸，我就立即放低枝沉底竿，飛埋去執起響鉸果枝竿，點知條魚好快咁包咗樁，開頭仲感覺到佢喺度，三四秒之後就郁都唔郁，噢!!〝斷咗〞唯有屎屎氣收番Ｄ線上黎，手震震咁挷過勾再釣過。
落咗餌唔夠五分鐘，竿頭又拉咗吓，我執番起枝竿先，再慢慢收線，一緊條魚就發力喇，順勢一抽，中咗！呢條都有Ｄ力喎，攪咗幾吓，就就佢又攪幾吓，唔使一分鐘，條魚就比我拉到上水面，我見條花鱸都有兩斤幾，都係落撈箕揾陣Ｄ，上咗水落好生扣，落餌繼續。
跟住落黎就到「蛇仔明」中斤頭細鱗，「呀廖」又中條斤幾花鱸，跟住落黎流水已轉，Ｄ魚又收哂口，兩個鐘郁都未郁過，我釣到22:30就執野走人去宵夜喇。
Ｄ爛鬼鱸魚(大人話)係食轉流果吓。
花鱸X3，(兩斤半、斤半、半斤)
13-4-2012 (農曆三月廿三)
噚晚咁早走，今日一於約埋師傅偉去釣過，佢就去簡蝦先，跟住我去攞，今次佢買咗50蚊蝦，都唔知買咁多黎做乜，實釣唔哂，霖走實倒落海餵魚，嘥哂Ｄ野！
我就18:30到主場，Ｄ流水好慢，開好竿，坐定吹吓海風真係舒服；等到20:00師傅偉都黎埋，我三枝竿郁都未郁過，過咗一陣，Ｄ流停哂，咁我就將Ｄ架生搬入去躉頭位，即係噚晚中八斤花鱸果度，睇有冇運行先。
過咗一陣就開始行流喇，我就金睛火眼咁恰到實幾枝竿，其中一枝好快咁比魚拉咗一吓，我即刻執起枝竿，條魚想發力，我比佢更快，一抽就即攪咗五六吓，好順喎！再一頂就直收上水面，跟住撈箕上水，係兩斤嘅花鱸仔，落埋生扣，再落餌繼續；喺呢個時候，師傅偉又中條兩斤嘅花鱸仔，靜咗一陣，我枝竿又有魚訊喇，拉咗兩吓，我執起枝竿條魚已經發力，順勢一抽，中咗!!但係感覺又Hi住樁，唔怕~頂陣先，跟住鬆一鬆繩，條魚就出番黎，我就把握呢個机會，個人向後行咗幾步，將條魚由樁柱位拉出黎，再收繩，嘩!!好重嘅拉力，机乎攪唔郁，〝大野〞！我只好再靠邊住後行，好彩枝竿夠力，卒之比我拖咗出黎，見魚喇，好巨型嘅魚影，即刻叫師傅偉過黎幫拖，條魚一見光就想開尾，我唯一可以做嘅就係放繩，放咗七八呎，又收番佢上黎，佢又標番落去，如是者都有三四個回合，最後佢知走唔甩喇，反肚投降，今次好彩有師傅偉幫手撈魚，上咗水睇清楚，條魚又肥又大，起碼十斤，我同佢落兩個生扣。
時間過得真快，咁快就23:00點嗱，我地都有中魚，咁就執埋Ｄ架生，一齊去宵夜喇。
番到屋企專登大大聲嘈醒大人，等佢同我影相。
抽高Ｄ唔會摭住塊面。
越拎越攰，要兩隻手抽住先至得。
哈哈!!仲有兩條兩斤小鱸。
今晚嘅收穫都唔錯，尤其是條十一斤嘅花鱸，因為係破咗我自己喺主場嘅記錄，真開心。
長度係 88Cm
12-4-2012 (農曆三月廿二)
今晚食過番尋味，買咗蝦就直跴主場，師傅偉唔得閒，所以今次我要單打獨鬥！
19:00落到去見係流尾，嗱嗱聲開好竿，諗住Ｄ魚會開口，點知等到轉哂流，三枝竿原封不動；見Ｄ流水開始大咗，咁就唯有將架生搬番去入面Ｄ躉頭度釣；今日天氣開始熱，攪惦哂都成身汗，坐低想話飲啖水，特然聽到鉸響，我就用九秒九嘅速度標埋去執起枝竿，呢個時候枝竿以經比條魚拉到彎哂，我就即刻往上一抽，諗住先攪幾吓，但感覺到條魚線Hi住樁，咁我就唔敢收繩，唯有頂陣先喇，頂咗四五秒，咁都唔係辨法過喎，跟住改變戰畧，鬆番Ｄ比佢，一鬆之下，果然條魚就轉頭游番出黎，咁我就順勢快速攪咗十幾吓，條魚亦不甘示弱，又發力向Ｄ樁柱間標埋去；我開頭以為條魚都係兩三斤啫，但係條魚喺呢一衝，我就知係大野喇，即時打醒十二分精神，同一時間就鬆番幾呎佢走吓，跟手就連頂帶攪，又將條魚帶番出黎，出咗黎我就定喇，一路上上落落幾回合，卒之見魚喇，〝幣加伙〞...枝撈箕唔喺旁邊添，點樣上魚呢，慢一慢又比條魚鐘番落去，又要費一輪功夫先至將條魚再拉番上水面，〝唔怕！有辨法〞我即刻將條魚，沿住個躉邊，一路帶過去，途中條魚都有兩三次嘅反抗，我好小心咁帶到埋放撈箕果度，仲要伸長隻手先至〝O〞到，一落撈箕就上水，嘩!!睇落都有七八斤喎！將條魚落好生扣，我就坐低抖順條氣飲番啖水先，跟住剪去Hi花咗果Ｄ魚線，挷過勾，再落餌繼續。
望吓個錶已經21:00，番到屋企呢條魚都有排攪，都係早Ｄ執野走人去宵夜好過囉！
咁早番到去，大人仲未瞓，仲同我影埋相添。
咁大條花鱸，好野呀呢！
過磅八斤四、80Cm
10-4-2012 (農曆三月二十)
幾日冇釣魚，手都痕埋，約咗師傅偉，跟住就落街市買蝦。
19:15到主場，流水剛起，嗱嗱聲開好竿，坐定定等運到；一路Ｄ流水都好急吓，過咗兩個鐘，三枝竿郁都冇郁過，呢個時候師傅偉黎到喇，佢就開一枝竿釣鱸，仲要喺車上面恰眼瞓，特然見佢由車度跳出黎，執起枝竿，一抽跟住就中魚，好順咁攪到上黎，斤零花鱸，我同佢撈魚，當我將條魚落緊生扣果時，佢又話中魚喎，我又要同佢撈魚；攪掂哂想話坐低抖抖，呢次輪到我枝竿郁喇，我快手執起枝竿，條魚以經發力，我順勢往上一頂，跟住快速攪咗四五吓，條魚有番Ｄ力水，一慢落黎就比佢鐘頭落番去，咁我梗係放番多少比佢走吓，點知好好彩，條魚係咁向外標，我就住再放多野繩比佢，跟手開始收繩喇，收吓放吓條魚都係喺出面飛，足足玩咗成分幾鐘，師傅偉已經揸定個撈箕喺度等，仲話快Ｄ收佢上黎喇，玩爆咀今晚又瞓唔著喇，我唯有收佢埋黎，上咗水，落埋生扣，望吓個錶，我地中三條魚都係廿分鐘度咋，跟住落黎又靜哂；22:00見大家都有魚中，咁就齊齊執埋Ｄ架生走人去食宵夜喇。
開始有回頭花鱸釣喇！
其實成晚都係釣果廿分鐘。
呢兩條鱸仔都有斤幾重架。
廿分鐘嘅收穫:大鱸X1四斤半。
鱸仔X2斤幾。
2-4-2012 (農曆三月十二)
今日師傅偉來電，話佢去炳記簡定蝦先，叫我到時到候去攞，咁我就唔使咁趕，食埋飯，它它條條去攞埋Ｄ蝦，直跴主場。
落到去啱啱轉流，都係照舊兩枝釣鱸，一枝沉底有乜就
釣乜；釣咗個半鐘度，以經釣咗兩條磅頭鱸仔喇，呢個時侯師傅偉先至黎到，我就比個靚位佢，而佢都係剩釣鱸；同佢喺度吹緊水，特然佢個鉸響，咁佢就飛撲埋去，執起枝竿，我見佢枝竿頭只係輕微咁點點吓，佢就話條鱸好細喎，唔拉竿嘅！我就叫佢唔好抽竿，等佢拉竿先至好抽，呢頭講完，果頭佢就抽竿喇，見佢頭幾吓都收得好順，跟住見條魚一發力，另到師傅偉要鬆繩比佢走，嗯!!原來係大野喎，佢就話唔係好大啫！不過我都去攞定撈箕先，一路攪到上水面一睇，原來係條牛屎，咁我就將條魚撈咗上黎，入埋生籠。
又到10:00點喇，兩個人都有魚中，都係執野走人囉。
到依家先知，原來個海係得呢兩種魚~
師傅偉釣鱸釣到嘅牛屎，益埋我喇！
牛屎兩斤X1
花鱸磅頭X2
29-3-2012 (農曆三月初八)
晏晝打電話落渣華道街市柄記諚虾，咁就可以晏少少先出發，攞咗蝦就落主場，19:15落到去就開竿，今次就冇乜驚喜，中三口就上得兩條，因為有一條懶落撈箕，上到一半爆咀跌番落去，沉底果枝竿郁都未郁過，釣到22:30就執野走人。
有兩條鱸釣吓都算唔錯喇。
斤零重嘅鱸好煮又好食。
24-3-2012 (農曆三月初三)
半斤十両都釣埋佢。
又係得一條花鱸。
都好中番條兩斤花鱸。
19-3-2012 (農曆二月廿七)
今日喺山西搭早机回港，番到屋企都係中午十二點幾，放低Ｄ行理就去同兩位公主飲下午茶，三公主話我去咗咁多日都未食過魚，咁我就話等我今晚去釣番幾條你食喇！
飲完茶就番屋企執架生，去電器道街市買蝦，落到主場以經係18:30，見Ｄ流啱啱想轉，就嗱嗱聲開好竿，照例係兩枝半水釣鱸，一枝沉底搏符碌。
一路到19:30，Ｄ流以經轉咗，我就金精火眼咁昅到幾枝竿實一實，特然見沉底果枝竿有幾吓強烈嘅魚訊，我就即刻攞埋枝撈箕過去，一手執起枝竿，當我執起枝竿就見枝竿頭輕哂，嗯!!條魚食咗餌仲升緊水添喎！咁我為有快速收繩，當我收到緊手果時，條魚就想發惡，我就順勢往上一抽，跟住頂到行，感到佢嘅力度減弱嘅時候，即刻就使出「左右野馬分鬃」，一路想收佢上黎，點知條魚明白果度地勢險要，一發力就往樁柱間衝埋去，呢Ｄ動作梗係牛屎喇，我唯有再頂一陣囉；呢次佢就冇咁好力喇，頂唔夠三四秒我就可以繼續收繩，收多十幾吓就以經收到佢上水面，銀光一閃，果然係牛屎立，即落撈箕上水，剪鈎落埋生扣一氣呵成，再挷好鈎落餌繼續。
20:00師傅偉先至黎到，剩係開一枝竿釣鱸，佢話今日冇打算釣魚，只係落黎吹吹水喎！
20:30我就再中多條斤頭小鱸，之後就靜哂，釣多一陣仲起埋風添，都係見好就收；22:00就執埋Ｄ野，去買宵夜番屋企好過喇。
番到屋企大人未瞓，同我影埋相添。
旅行番黎，都係呢兩個最老友，即刻就黎探我。
牛屎重兩斤十三 長40Cm。
花鱸斤頭。
