旅行前一晚都要釣番轉

20-11-2009  (農曆十月初四)  生流

今日執好哂聽日去旅行嘅野，無所事事，都係要落主場止吓痕先至得，拿拿聲攞埋Ｄ架生，買好魚餌，就向主場進發喇！

19:15落到去，己經見到師傅偉喺度釣緊，同佢傾咗幾句就喺樁頭開竿，擺好個架步，就同Ｄ老友吹吓水，好快又到咗21:00，依然未有魚訊，Ｄ風吹埋黎都有Ｄ凍，過咗一陣，枝竿頭彎咗一吓，嗯！有料到，立即攞起枝筏仔，感覺到係有魚食餌，特然比佢拉咗一野，感到係大野黎，但係又唔係中喎~等咗一陣，又冇勿動靜，就收番上黎睇吓，噢！隻蝦比佢搶咗，連隨喺同一位置，再落過餌，唔到一分鐘條友仔又黎偷野食喇，竿頭又係輕輕一吓一吓咁彎，特然見條魚絲走向左面，我就向反方向輕輕一帶，佢就向番右面走番過黎，但呢次嘅速度比較快，我順勢提高之竿，條魚卒之知道賴野喇！想發力過石，我有準備，點會比佢得程，一揪竿跟住連攪七八吓，己經離開危險地帶，佢再向下衝，我就比兩三呎線佢囉，跟住輪到我發力喇，一頂幾收，唔使一分鐘就將條友仔拖上水面，只見漆黑嘅海中，銀光一閃，兩斤幾嘅大黑牛就好乖咁入咗撈箕喇！上咗水，嗱嗱聲叫老友呀海同我地影相，跟住落埋生扣。

再釣多一陣，偉哥話好凍，又冇魚訊，22:15拾埋架生，清理好釣場，一齊揸車去宵夜喇喂！

睇吓幾大餅牛屎，中咗魚個人即刻唔覺凍。

番到屋企，三公主未瞓，就同我地影番張合照先！

肥美大黑牛兩斤六。

天寒地凍中細鱗

13-11-2009  (農曆九月廿七)  東北風  生流

今日食咗晚飯，成七點幾先到主場，都幾大風吓，好彩著咗件比較厚嘅風褸，所以唔覺凍，開好竿，坐定定等運到，須然有流，但係唔算急，諗住飲啖水，沉底枝竿頭特然一彎，又彈番起，唔似蟹喎！係有魚試餌我除即攞起枝竿，收緊多餘嘅絲，過咗成十秒，竿頭又傳來魚訊，呢次食得好密，感到一吓強而有力嘅拉竿，我就往上一揪，連攪七八野，覺得佢有Ｄ力水喎！咁就慢慢頂一陣，將條友仔帶離危險地帶先，跟住一頂一收，半分鐘就上水面，啊！又係細鱗，落撈箕上水，費事落生扣，直接入冰箱。

再釣咗個零鐘，都冇動靜，剩係喂蟹，Ｄ流又開始轉急，都係拾埋Ｄ架生，早Ｄ去潤記食宵夜好過喇！拜拜！

等叔叔抱抱。

佢有夜視眼架。

呢次我知尼條係叫大眼海鰱喇！

11-11-2009  (農曆九月廿五)  大東風

今日一早起身，同架老爺車去驗車，買保險，又去運輸處攞埋行車証，攪咗大半日，見晚上得閒，就落主場玩番轉！

19:20落到主場，嘩好大風喎，心諗今次多數都係龜啦。開好晒竿坐定定等運到，點知全程落流都冇魚訊，剩得Ｄ蟹喺度偷食。停咗流我就轉個位，又過咗幾刻鐘，釣半水果枝竿有幾吓輕微嘅魚訊，我就拎起之竿準備，佢好快就有反應，一吓強而有力嘅魚訊，我就往上一提，中呀！但感覺唔係咁重，條友仔飛快出海，初初我重以為係小鱸魚，同佢玩番兩轉先，但好快佢就冇勿力，咁我就收佢埋黎一睇，咦！唔係鱸魚喎，係大眼海鰱喎，一野就飛佢上岸，費事洗撈箕，影好相，放入冰箱，繼續釣。

23:30都好！有一咀過吓引，見再冇魚訊，就執埋架生，清理好釣場走人，去食埋宵夜就番屋企喇！

條海鰱斤零重，但冇勿力水。

同佢影番張合照先得。

昇盤比例照都唔少得。

清蒸大海鰱，須然多骨，肉質較淋，但勝在有魚嘅鮮香味，一個字~~正！！

中完牛屎再中馬屎

9-11-2009  (農曆九月廿三)  慢流

今日諗住喺屋企抖吓，點知中午時高橋雪也來電，想今晚去南丫玩轉，我立即就比佢挑起條釣魚根，一口就答應咗佢。

呢次我揸車接埋佢，17:30己經入到香港仔，買好魚餌，再過鴨脷洲泊好車見時間尚早，就喺附近食埋飯，大家傾吓釣魚計，19:15到咗約定艇家時間，就行開去碼頭上艇，向南丫島進發。

20:10到咗目的地煤橋，我簡咗上大樁，點解我鐘意上大樁釣呢？因為果度地方夠大，舒服Ｄ，高橋就鐘意上六樁。

上到去開好竿，照例兩枝筏仔沉底，一枝半水釣鱸。過咗差唔多兩個鐘，都係Ｄ零星小魚偷食，咁我就轉一轉位睇過點，見口渴就飲啖水先，呢頭放番低枝水，果頭就響鉸，呢次唔係一枝響，係兩枝一齊響，我一手攞起枝筏仔，另一枝就用腳踏實個鉸唔比佢出繩，手中枝竿就已成弓形，條魚已開始發力，我往上一提，跟住攪咗六七吓，條魚已受控制，再望吓腳下果枝筏仔，巳經比條魚拉到幾乎炸竿，為有將隻腳鬆一鬆佢，點知係咁出繩，我見佢慢番落黎，又踏番實佢喇，跟住嗱嗱聲顧番手中枝筏仔，將條魚狂收上水面，見都係斤頭牛屎，撈箕都費事用，成條飛佢上黎，都唔得閒攪佢喇，又攞起用腳踏實果枝竿，頂咗幾野，已經知佢包咗樁，唔敢太用力，但係我唔用力，條魚就發力想衝斷條繩，我只好放幾米繩比佢啦，希望條魚游番出黎，見佢停咗我又收番幾手，如是者來回四五次，跟住見佢冇晒動靜，我咕已經走魚喇，咁就放低枝竿，快手快腳，將之前上水嘅牛屎落生扣，攪惦晒再攞起枝竿，吓！條魚仲喺度喎；卒知攪咗半粒鐘，我宣報投降放棄喇！收緊條繩用手大力一拉，咁就結束咗一場大戰！(算佢好彩)

收拾好心情，再釣過，呢次輪到釣半水果枝竿郁啦。開頭以為有鱸食餌，但係點解食得咁細力嘅？我就輕輕一帶，中呀！條魚飛得好快，但感覺好輕身，兩三個回合，已經見魚，原來係一條磅頭嘅馬友，都好！係我第一次中嘅魚種，又係將佢飛上岸，呢次唔落生扣啦，而係放入冰箱。

00:40開始執埋Ｄ架生，清理好釣場，遠遠望到來接我地架艇嘅大光燈，佢好快埋到黎，我就攞埋Ｄ戰利品(魚)，過六樁接埋高橋，上艇踏上回程。01:45埋到鴨脷洲攞車，再落香港仔食宵夜，送埋高橋番屋企，自己番到屋企都成兩三點喇。

好奈冇中過嘅牛屎。

呢條牛屎都算靚仔喇！有Ｄ勁樣衰。

條馬友係我第一次釣到嘅魚種

全晚嘅魚穫:牛屎斤頭×1，馬友磅頭×1，芝麻仔幾両×2，石九×3。

先中牛廣再中大紅鮋

27-10-2009  (農曆九月初十)  慢流   東北風

今日約埋師傅偉到主場搏吓，好早食咗晚飯，就到街市拾廿蚊大虾仔，飛車落到主場，19:30我先到埗，師傳偉跟住到，大家開好竿，講吓笑，傾吓計，佢話希望今日有鱸魚玩吓。

20:00特然發覺釣半水果枝竿頭彎咗幾吓，我心諗唔通真係有鱸，即刻囉起枝竿，呢頭攞起枝竿，果頭己經響鉸出緊線喇，首先我拑實個鉸，條魚就發力向下衝，成枝竿即時彎哂，我頂一陣，佢就再向外海衝出，佢屎喇，冇樁冇柱有排玩，一收一放三四次，己經收到埋黎，嗯！唔係鱸喎，係牛廣黎喎，咁我就用撈箕上水，影埋相，即落生扣，再鈎隻蝦落去睇仲有冇先，因為牛廣係群体魚黎加嘛。

21:05師傅偉中咗條好似曹白嘅魚，落埋生扣；21:45我有之沉底筏仔微微響咗吓鉸，我就快手將枝筏竿揸上手，竿頭再點咗幾野，再黎一野，枝筏竿就一彎到腰，因為中魚嘅位置險要，條友仔又往樁位衝去，我成個人企起身，將枝竿往上頂，老虎都唔放，條線拉到裂裂聲，卒之條魚調頭出番尼，我嗱嗱聲收咗十幾吓，佢又發力向外衝，呢次可以比線佢走吓啦，一放一收，兩三個回合，見魚影喇，只見火紅嘅一條紅鮋，在水中爭扎，師傅偉同我用撈箕上水，條魚都有兩斤幾喎！又再影相，落埋生扣。

22:30大家再冇魚訊，只有Ｄ蟹喺度化餌。北風吹埋黎都有Ｄ凍凍地，好喇！今日到此為止，大家收好架生，清理好釣場，囉埋Ｄ戰利品，揸車番屋企喇。拜拜！！

好奈冇釣過嘅(牛廣)(大魚仔)(領航燈)(走排)(JET)唔知邊個啱？

再中條大紅鮋，開心到難以形容。

條牛廣斤七両，釣魚男話佢叫做領航燈。

條紅鮋靚到吖，紅卜卜過喎！

今晚嘅收穫唔錯。

有冇人知最頂果條叫勿野魚，有人話叫(哽死貓)喎！據卜友釣魚男話，呢條叫大眼海鰱或者大青鱗！

再同佢影幅單魚相先。

再戰流浮山蠔排

25-10-2009   (農曆九日初八)  慢流

吸取咗上次流浮山蠔排打龜嘅教訓，今次再去果度玩過，睇有冇進步先。

早上10:00約咗師傅偉，食埋早餐就向目的地進發喇，今次係揸我架老爺車入去，11:45到咗流浮山，見根本先生同良美小姐未到，我地就喺附近嘅士多，坐低飲杯嘢，順便等埋佢地，果間士多仲有Ｄ釣魚用品賣添，我見今日都幾猛太陽，所以買咗件釣魚衫＄150都幾低買，跟往佢地都入到尼，咁就馬上叫艇出排啦。

出到去，跟本先生再揾個遠少少嘅靚排，上咗排，我地分工合作，嗱嗱聲擺好個架步，就開竿作釣喇。我地呢次嘅釣餌係紅虫同青虫，我就帶咗合虾仁試吓，睇得唔得食。

大約過咗十零廿分鐘，我其中一枝竿有魚訊喇(我開咗三枝竿)，小心將枝竿攞起，條魚食得好精口，只感到竿頭有輕輕嘅魚訊，我好有耐性咁等，經過十幾廿秒，終於見竿頭向下彎喇，我就快速往上提竿，中咗啦，係條手板黃腳，好快就將佢收埋上水，落生籠。跟住良美小姐又中黃腳，師傅偉又中魚，佢話好大條喎，收咗兩野條魚就飛出水面，爛肉梭是也，師傅偉驚條魚標來標去，所以大力一拉，咁就將中魚嘅鈎拉斷，唔使比佢將水中Ｄ魚線攪亂曬，真係高手中嘅高手。

釣咗幾個鐘，大家都係間中有Ｄ立上吓，此時我枝竿響鉸喎，一提竿己見條魚高速潛行，跟住飛上水面，又係爛肉梭，我又學咗師傅偉咁樣，將條魚大力一拉，點知因為我用嘅係三號帶腳，所以拖唔斷，咁我將就玩咗一輪，卒知爆咀放魚，我仲開心過釣佢上黎。此時Ｄ爛肉梭空羣來攻，我地四人不停中佢，通通都拉斷絲或拉爆咀放魚，足足有十幾廿條，後尾心諗，Ｄ魚需然多骨，但都係好鮮甜嘅魚黎架，試吓用黎煲湯，我睇都幾好味掛，所以最後都留番幾條。

到咗19:30大家都有Ｄ收獲，開開心心就拾好架生，清理好釣場，20:00艇家埋尼接我地番埋岸。

埋到岸，根本先生話因上次攪出咗個大笑話，另到我地遲咗番屋企，所以今晚食飯佢請客，盛情難卻，我地就一齊去將軍澳食晚飯，可能開心同肚餓，Ｄ餸菜又美味，所以食咗兩碗飯，飽飽之後就別過跟本先生同良美小姐，揸車送埋師傅偉番屋企，我就懷著愉快嘅心情，回家去也。

最後，要多謝根本先生同良尾小姐，佢地安排咁好玩嘅釣行，仲請埋食飯添，真係要再三多謝！希望下次可以同佢地再玩過。

須然未爆箱，但魚獲都算唔錯喇。

Ｄ爛肉梭卒知用黎煲湯，仲加咗Ｄ蕃茄同豆腐落去添，果然冇錯，真係十分十分之好味嘅海鮮湯呀。

清蒸黃腳立，香煎黑沙＆劃，好味。

呀！唔記得講，我仲釣到兩隻瀨尿蝦喎，蒸咗比大人食，佢話麻麻地啫，冇膏又小肉。

落主場洗龜氣

24-10-2009  (農曆九月初七)  慢流

今日手痕，落主場攞番個彩先，19:30落到去照舊開兩枝竿沉底，一枝竿半水釣鱸，過咗半個鐘左右，釣半水枝竿頭郁咗一野，我就想攞起枝竿，點知特然條魚發力，我竿都未揸定就比佢拉到成枝竿彎哂，噢！立即輕哂，初初以為洗鰓斷線，收上黎睇個鈎重喺度，原來爆咀走魚，為有再鈎過隻虾落去喇！

又過咗半個鐘，沉底枝竿有料到，我就火速揸起枝筏仔，條魚繼續食餌，我就輕輕帶起舊餌，條魚就中招喇，一收一頂，條魚唔大，上到水係斤頭細鱗，師傅偉剛剛尼到，順便同我撈埋上黎，跟住影相落生扣。

用細鱗洗龜氣！

跟住冇幾奈，釣友海哥中咗條三斤牛屎，我就攞咗佢黎影吓相先。

番到屋企再影過。

準備劏魚。