大花鱸難釣，細花鱸精過鬼。

30-4-2010  (農曆三月十七)  生流  温暖 

經過前晚中魚之後，今晚食過番尋味，再落主場搏殺。睇過癲人台嘅流水表，全晚都係起大流，所以慢慢都未遲，落到去已經19:30，開好竿師傅偉又來到，我就喺橋面，佢就落橋底，佢落咗去唔夠一分鐘，就見佢上番尼，氣喘如牛，完來又比魚KO咗，佢就手震震咁再挷過釣組，再落過去釣，我就依然喺番橋面呆等。

到咗成22:00見我枝竿頭輕輕點咗幾吓，我就即刻攞起枝竿，點知條魚唔拉落去，反而升水打橫飛埋樁，我比佢特如其來嘅動作嚇一跳，慢一慢就包咗樁，仲貼住樁與樁中間嘅一個千鞦架，見環境咁鬼復雜，咁我就緊係唔敢用力拉喇，放慢速度，一拉一放，佢都唔肯出番黎，大家薑持咗三四十秒，我心諗咁樣落去唔多樂觀，就即刻一手持竿，一手拉起個千鞦架，嘩！都幾重架，哈哈！個架一郁，條魚就嚇到標番出尼，離咗樁就易攪啦，佢只係離水面四五呎，見佢唔係好大，我幾吓手勢，就將佢升水，仲要成條飛佢上岸，生扣都費事落，即入冰箱。

又過咗一陣23:00見大家都冇魚訊，都係鬆人嘅時間喇，嗱嗱聲執埋Ｄ架生，清理好釣場，一齊去宵夜喇喂！

尼條就係精過冇尾蛇，斤零重嘅花鱸仔喇。

卒知比我起到喇！

28-4-2010  (農曆三月十五)  生流  暖

今日晏晝同大人過咗尖沙咀開茶會，準備下月四號出發日本北海道四天之旅。攪惦晒都成六點幾，見都仲有時間，嗱嗱聲攞起釣魚架生，就往主場再搏殺。

落到去都七點幾，見仲未轉流，就慢慢開好兩枝竿，一枝沉底博大霧，一枝十幾呎釣鱸。八點師傅偉又到咗，一路都冇魚訊，佢話今日多數都係龜架喇，到十點佢就執野走人，我就繼續磨爛蓆。

佢走咗冇幾奈，大約十點七左右，我都諗住走人，收起枝沉底竿先，點知特然間聽到一吓微弱嘅鉸響聲，我即刻放低手上枝沉底竿，走番過去攞起枝釣鱸竿，一攞起已感覺到有魚拉，仲係大野添呀，我都費事抽竿喇，即刻就快速攪咗六七野，但條魚就發力開尾，我就比番幾呎佢走吓，當我再用力拉嘅時候，見條鱸出現喺隔咗兩枝樁果度，飛出水面想洗鰓，我心寒一寒，屎喇又包樁，仲要包兩枝樁添，焗住立即放攪，比佢鐘番落去，我再用陰力一帶，順勢攪咗八九野，將條魚帶順番出黎，再攪幾野，條鱸比我收上水面喇，跟住用力張佢抽高少少，再一左一右咁帶咗三吓，佢就冇晒方向，反肚投降，我就速落撈箕將佢上水，即落冰箱，順手執埋Ｄ架生走人喇。

叫老友King Kong 仔同我影相。

好奈冇上過魚，所以特別開心。

番到屋企大人又瞓咗，唯有自拍喇。

都係咁樣有形Ｄ。

花鱸五斤四 73Cm

師傅出馬，【KO】七斤半大鱸。

26-4-2010  (農曆三月十三)  生流  微風細雨

今日唔知點解，好似好有信心釣到魚咁喎！18:30落到主場，師傅仲未到，我就開好竿，打雀咁眼，看住Ｄ竿，此時師傅偉又到咗，佢就開兩枝竿釣鱸，傾傾吓計，佢有枝筏仔響鉸，我就即刻跳開，睇師傅表演，佢一抽即中，仲話尼條鱸好大條，開頭見佢攪得好順，我就準備撈魚，點知條鱸見光就發力開尾往下衝，只見師傅不慌不忙，好鬼瀟灑咁鬆幾手比佢，帶順即攪七八吓，條魚再衝，佢又再比，如是者五六轉，經過成三四分鐘嘅人魚角力，勝方梗係師傅偉喇，我當然係做魚童撈魚上水，影相落生扣一腳踢。

條鱸上到水面冇晒力，仲反肚添。

我都攞黎沖喜吓。

過咗一陣尼次到我鉸響喇，我一埋去就抽竿，唔理三七廿一就先攪七八吓，嘩！以經見魚，又係大野，我就冇咁好彩喇，佢一開尾就打橫衝，我頂都頂唔住，又驚住炸竿，所以比幾尺佢走吓，點知就出事喇!!又包樁......，我想拉佢出黎，但比佢一發力就斷埋，噢！有冇攪錯，餐餐都係咁嘅，唔好嬲!!!收番上黎挷鈎再釣過。

又過咗半個鐘，師傅偉都斷咗條，我話:而家Ｄ鱸咁鬼難釣嘅！師傅話:Ｄ海水暖番，所以Ｄ魚活動力強咗，唔似得冬天咁順灘架喇！啊~~原來係咁。

21:30流水又轉急，仲落雨添，我睇Ｄ魚都唔開口架喇，都係唔磨爛蓆囉，執埋架生，一齊去宵夜好過。

番屋企過磅，條花鱸足七斤半。

花鱸七斤半78Cm。

重有隻石蟹孝敬吓大人，都成六七両架。

斷魚斷到服晒，求其寫番次

23-4-2010  (農曆四月初十)  生流  溫暖

我都好奈冇寫過卜喇，事關自從去完旅行番尼，都釣過十幾次魚，但係每次唔係打龜就斷魚，大大話話都斷咗十口八口，都唔知係米喺越南拜天后，以為會保佑我釣多幾條魚，誰不知天后娘娘大發遲悲，放生晒Ｄ魚，攪到我尼輪冇哂引。

講番今日嘎，又同師傅偉去釣番轉，18：30落到主場，開第一枝竿釣鱸，我都未曾開埋第二枝竿，已經響鉸囉，我都未攞得切枝竿，條魚好快就發力喇，到我攞起之後，佢再一沖，噢!!!!又輕哂，收番上黎睇吓，冇咗個鈎，又比佢洗鰓走咗，真係嬲到手都震埋，口中念念有詞~@＊＃~，跟住沉底嘅就中埋Ｄ泥婆坑簾，冇幾奈，師傅偉又斷一條，我地都係『同是天崖倫落人』囉。喺極度冇引底下，22:00執埋架生，去宵夜好過喇。拜拜！！ 

釣埋尼Ｄ野，真係失禮屎人。

要去主場醫番好失眠症

19-3-2010  (農曆二月初四)  生流  微寒

前晚走咗條沉底怪獸，兩晚都瞓唔著，要醫番好走魚失眠症，最好嘅方法就係去釣魚喇(借口黎嘅)！

今晚就單人匹馬到主場，落兩枝竿主打沉底，不過都放枝釣鱸嘅竿等運到。

我金睛火眼望住枝打沉底嘅筏仔，到咗19:30沉底枝竿開始有反應喇，條魚試咗三四吓餌就搶餌喇，我一手就將枝筏仔往上一抽，跟住一手都唔放，一頂一收，好容易就上水，係斤半左右牛屎，見咁細，一手就掟佢上岸，費事洗撈箕，落好生扣就繼續釣。

中咗條牛屎之後，一路都冇魚訊，又到咗21:00，旣然目的已達，都係唔磨爛蓆喇，於是執好架生，清理埋釣場，去宵夜好過囉！

斤半良型牛屎立，今晚應該好好瞓囉。

呢種哂士，要尼清蒸一流。

鱸魚橫行南丫島

17-3-2010  (農曆二月初二)  生流  和暖

今日高橋雪也約我今晚去南丫煤橋玩番轉，咁就執齊架生，落北角接埋佢，直去鴨脷洲洪勝碼頭，泊好架老爺車，於20:15上預約咗嘅艇，就直住目的地，點知經过榕樹灣，水警又查牌，左咗成六七分鐘。

唔知係米Ｄ水警專查女船家呢，坐佢兩次兩次都查牌，其他男船家一次都未試過喎！

21:10到咗釣點，就叫艇家車我地埋大樁，上到去嗱嗱聲開竿，高橋依然玩佢嘅磯釣，又計尼樣又計果樣，我就冇你咁好氣，開兩枝筏仔沉底，一枝半水。落咗餌半個鐘度，沉底枝竿郁咗幾吓，我就即刻攞起枝竿，輕輕收緊些少，此時魚訊越來越強烈喇，當佢一搶餌果吓，我就住上一抽，中呀！亦都感覺到係大野，我就快速攪咗五六吓，佢就開始發力喇，左標右標，攪咗幾野，又局住比番幾呎佢，如是者戰閗咗兩分幾鐘，條魚都係上到半水，跟住比佢一野向下衝，噢！輕晒....##收上尼睇，條魚絲冇花過，個鈎重喺度，咁積係爆咀囉！我抖番順條氣，落餌再釣。

22:05Ｄ鱸開口喇，我首先連中兩條小鱸，跟住陸續再中多幾條，有大有細，共七條，尼次爆扣喇。再睇高橋嘅釣况，佢都有四條。

呢次爆扣喇！

幾乎揪唔起。

到咗03:00艇家來接我地番鴨脷洲，高橋聽日要上班，所以唔去食宵夜喇，咁就送佢番北角先，自己番到屋企都四點喇，劏埋魚，洗埋架生又天光囉！

好彩聽BLOG友報料，帶個24L嘅大冰箱去載魚。

大中細碼都有。

極地先至可以破龜

16-3-2010  (農曆二月初一)  生流  大東風微凍今日本來唔打算釣魚，因為聽日出南丫釣晚水，但係釣魚蟲〝共共〞吓！都係去釣番幾粒鐘先。

買好餌，先打個電話比師傅偉，佢話喺度做緊占，我問佢釣唔釣魚，佢話你去我就去囉，咁我就叫佢唔使買餌，直接尼就得喇。

落到釣場都成19:20，仲係起緊流，開好竿，擺喺Ｄ流冇咁急嘅位，又喺度等運到，20:10師傅偉先至尼到，佢梗係將Ｄ竿，擺番喺上次中魚果個釣位度喇。

又過咗十幾分鐘，我見冇勿動靜，就將枝竿，轉去好奈冇人落竿嘅位度〝爬額水〞(兩年前試過喺尼個釣點，比條魚拉咗枝竿落海)，所以今次見冇勿好位，就試吓尼度喇。

搬好Ｄ野，就落餌喇，尼頭放低枝竿，果頭就見竿頭點咗一吓，嗯！唔係咁快尼料係嘛，我都未來得反應，個攪以經響喇，我連除攞起竿，條魚已經搶餌，我立即將竿住上一揮，連攪七八吓，條友仔已被我制服，好順咁一路上水面，因為第一條魚，所以冇同佢玩；哈哈！今次師傅偉做魚僮喇，撈箕上水，落埋生扣，鈎隻蝦，又繼續釣過。

我地磨到22:10，見轉流都冇魚訊，風又大咗，都係執野走人，去宵夜好過囉！

條花鱸魚唔係好大，兩斤零三斤倒喇，師傅偉話，尼個〝晒士〞最好食喎！

擺個Q版甫士比唯一睇吓，係米咁呀!!

好....準備劏魚。