27-8-2012 (農曆七月十一)
今日我早Ｄ落主場，坐番個得食位，呢頭開好竿，果頭Uncle同師傅偉都落到黎，Uncle即落竿離我唔夠兩呎作釣，師傅偉就去咗另一井度開竿，佢話費事中魚時Ｄ魚線打哂交！
釣咗一陣，我枝竿有魚訊喇，而Uncle呢條友仔又重施故技，佢輕輕一揚竿，我嘅魚訊就消失喇，原來條魚又過咗佢果度食餌，咁我就學足佢嘅招數，又攞起支竿係咁抽，卒知Ｄ魚比我呢個動作嚇到走鬼哂，我眼尾見佢望實我，又唔敢出聲，我就由心笑出黎；又釣咗一陣，佢枝竿首先有魚訊，我就等條魚就到釣嘅時候，又將我枝竿連抽幾吓，即時停哂口，佢又望一望我，跟住我就話:「Ｄ魚咁精嘅，抽幾次都抽唔中」！卒之佢知道我喺度發爛渣，屎屎氣搬過去我噚晚中牛屎果個位度落餌，而師傅偉就只係喺道冷眼旁觀，特然氣氛沉哂，跟住大家都冇出過聲。
又過咗一陣，我枝竿有魚食餌喇，冇條友仔喺度攪攪震，條魚食餌就好正常，感覺到釣我就抽竿，中咗!!收上黎係條半斤十両嘅金古，即入冰箱；跟手執埋Ｄ架生同佢地講拜拜喇！本來平時都冇咁快走嘅，時間都係九點幾，不過再釣落去都冇引，唯有走人去宵夜好過~
須然得一條，但係都總算係條爭氣魚。
條金古都有半斤十両。
釣完呢條魚，希望條友仔以後改吓Ｄ釣品喇！
25-8-2012 (農曆七月初九)
今晚食過番尋味，18:10就落到主場，諗往釣番噚日果個得食位，點知去到就見Uncle一早就落到黎，仲比佢坐咗果個位，冇計喇~鬼叫自己黎得晏咩，咁我唯有喺佢側邊釣喇！
喺我未黎嘅時候，佢以經釣咗一條幾両嘅小金古喇，我都速速落竿至得；落餌冇奈，我枝竿有魚試餌喎，想話等條魚食深Ｄ，點知Uncle呢個茅王即刻喺側邊拉竿，佢口餌一郁，食緊我口餌果條魚即刻停口，轉而過去食佢口餌，咁就比佢偷咗條魚喇，上水都有十両。
又過咗一陣，同一件事又發生多次喇，佢又再中多條，有冇攪錯呀，以前Ｄ釣友話佢釣魚專打茅波我都唔信，呢次信到十足十呀，咁我又唔會話佢嘅，咁就咋帝話呢度唔老利，等我擺過Ｄ睇有冇運行至得！
過到另一位置，落餌冇奈，枝竿頭郁咗一吓，跟住就成枝竿彎哂，我好快咁抽竿，中咗!!好強嘅拉力，唔似係金古，莫非係烏頭，喺呢一兩秒我個腦以經閃出幾個答案，都係集中精神對付條魚先，磅頂喺呢個時候又發出刺耳嘅叮叮聲，Ｄ聲一停落黎我就快攪幾吓，跟住條魚再發力想往樁柱衝，我就拑實個線杯，頂佢一陣唔比佢再出線，再追返幾手以經上到水面，見魚喇！原來係牛屎立，唔怪之得咁好力水喇；條魚見大勢已去，即刻就反肚投降，大戰結速，我就好小心咁由條〝喇〞度抽佢上黎，望吓Uncle，原來佢喺度睇到眼金金；我就將條魚解勾入埋生籠，落餌繼續，之後再釣多條大眼倉添，而Uncle果邊就再冇進賬。
一心想用麵包釣金古，點知反而釣到牛屎立，真係詁佢唔到；我再釣多一陣又到收工時間，跟手執埋Ｄ架生去宵夜喇！
牛屎唔食膠粒走黎食麵包。
釣唔到金古，反而中大眼倉同斤幾牛屎 。
聽日去探二公主同乖孫，順便攞埋呢兩條魚比佢食。
24-8-2012 (農曆七月初八)
癲人台話過幾日可能打風，咁我就要去主場入定Ｄ貨，
唔係打風就冇魚食喇！
今日早咗少少落去，點知以經見到師傅偉同Uncle兩條友仔，靜靜雞喺度釣緊，我就嗱嗱聲揾個靚位開竿，大家釣咗半個鐘都未有斬穫，當流水開始行番些少嘅時候，就開始有魚訊喇，首先Uncle中條小金古，即刻媽媽聲話Ｄ大野去X晒邊呀！跟住我枝竿又有魚食餌喇，一抽就中！上黎係條磅頭金古，我就話唔好鬧先得加嘛，師傅偉係度笑，Uncle就~~
釣咗一陣三人都各有魚中，我就再中條斤頭，跟住落黎Ｄ流水行急咗，Ｄ魚都收哂口，我同師傅偉就收埋Ｄ野上番橋面釣烏頭，釣咗一個鐘度，粒浮波郁都未郁過，Uncle都捐番上黎劏魚，望吓個錶都成十點幾，都係執野走人去宵夜好過喇！
Ｄ大金古開始埋位。
今季最大呢條囉，得斤頭咋。
今晚嘅收穫都幾好，夾埋都有兩斤幾。
21-8-2012 (農曆七月初五)
今日先得閒Ｄ，執起Ｄ架生就落主場過引吓；落到去開好竿釣金古，釣咗一陣都係Ｄ泥鯭化餌，點知見有箕烏頭喺度示威巡遊，大約都有三二十條，我即刻換釣組，落潯半水，一落餌即時有魚咬，但係因未天黑，Ｄ魚比較精口，一食就走，抽過幾次都唔中，咁我就等佢食深Ｄ先抽，果然有較，輕輕一提就感到有魚拉落去，順勢一抽，中咗!!收到上水面，諗吓點攞條魚上黎，因為呢個位係釣開金古嘅，得條〝喇〞位，但係都要上架!!咁我就好小心咁將條烏頭由條〝喇〞果度慢慢抽上黎，好彩又上到，即落生籠；再落餌即有魚接，又中!!呢條就大Ｄ喇，都有兩三斤，今次冇咁好彩喇，離水一半即爆咀，剩係釣到條烏頭副假牙上黎，唔係喇，開番枝撈箕先，上車度攞出撈箕再捐番落去釣過，好彩基烏頭未走，呢個時候釣友Uncle又到場加入戰圈；我就一連再起多兩條，Uncle就中三斷三，大戰咗一個鐘度，基烏頭就消失得無影無蹤，開始行大流，我地又轉釣金古，跟住落黎梗係魚訊全無喇，釣到21:00都係冇魚食餌，咁我見Uncle冇魚中，就比咗一條烏頭佢，等佢番去有得交差，我就執埋Ｄ架生，去食晚飯好過囉！
專登釣佢就冇，失驚無神又蹤埋黎！
喺果個位，釣到都未必上到，有幾條釣得到上黎都算好彩囉！
Ｄ海烏頭仲未夠肥大。
7-8-2012 (農曆六月二十)
噚晚釣得四條金古，驚聽日唔夠食，今晚再落主場，釣多幾條隱陣Ｄ！
06:00一落到去見仲未起流，即刻嗱嗱聲開竿，第一口餌放落去即刻就有魚食喇，但係食得好精，落咗四五口餌都比佢化咗，我即刻改變釣層，由兩潯改為三潯，呢次嘅改變係有較嘅，即中一條，跟住再中多兩條，心諗冇喇掛!!大約過咗半個鐘，我又改釣番兩潯，哈~又掂喎，連起兩條；喺度掛住釣魚，原來Ｄ水漲到上黎都唔知，好彩冇Ｄ政府船經過，唔係就實聽濕腳，既然目的以達，都係上番橋面，執埋Ｄ架生去宵夜喇！
Ｄ金古越釣越有 。
今季釣金古條數最多嘅一次 。
6-8-2012 (農曆六月十九)
大人話星期三大公主番黎食飯，叫我今晚釣多Ｄ魚番黎，佢以為好易釣到魚咁，你詁去街市買咩！
落到主場開好竿，今次真係有Ｄ壓力喎！好彩落餌冇奈，巳經有金古魚訊，一抽即中，快手上魚落埋生籠，把握黃金一小時 ，再落餌又有魚接住，我好留心咁睇住Ｄ魚訊，睇住佢震震吓咁拉落去，一抽又中，跟住再中多兩條，有四條魚喺手，定當喇；跟住又同往日一樣，停哂口，毫無魚訊，呢個時候我就執番Ｄ野上橋面，攞盒千年蝦仁出黎，轉釣沉底搏符碌，卒之梗係冇符碌喇，釣到22:00都係得條手板細鱗，都好!!今季又係第一條，攞番過頭彩囉；目標以達，唔好磨喇，都係執野鬆人去宵夜好過！
金古又多番囉喎 ！
Ｄ魚須然唔大，但係夾埋都有斤幾兩斤架！
5-8-2012 (農曆六月十八)
晚晚都係釣兩條金古，釣完就所有魚都收哂口，想釣多條都冇，真係【奈人尋味】！
金古族羣奉上嘅兩條。
兩條夾埋都有一市斤嘅(內地砰)，即係得十二両囉！
3-8-2012 (農曆六月十六)
跟番近排嘅時間，喺18:30就落到主場，開竿釣金古，第一口餌一落就有魚訊，拉咗幾吓就停咗，收番上黎口餌仲未食哂，即換新餌，呢次將塊麵包撕細Ｄ先勾落去，今次食得大力Ｄ喇，一食就成枝竿頭彈起，我就順勢一抽，中咗!!好快就收佢上黎，十両金古即落生籠，落餌又中，呢條仲細，落埋生籠之後再釣就冇哂魚訊喇，上番橋面轉釣烏頭，原來師傅偉都黎咗，一齊釣到十點幾，口餌都冇魚咬過，唔通個海冇哂烏頭!!下次都要轉吓牌頭，釣番其他魚先得；跟住執埋架生去宵夜喇喂。
聽日又有飯開喇 。
1-8-2012 (農曆六月十四)
呢排顧住睇奧運冇去釣魚，一於今晚早Ｄ落主場釣番轉；釣咗兩三晚烏頭都冇條，今次唔釣佢喇！
18:00落到去即刻捐入橋底專攻金古，落餌冇奈就有魚訊，好明顯係金古，第一口餌唔到釣，落第二口餌就見竿頭震震吓咁拉落去，我就將筏竿一揮，磅頭金古手到拿來，將條魚落埋生籠，即刻勾過口餌繼續；一落就有魚食餌，不過今次食得好精，拉幾吓就停咗，我仲以為比佢偷食哂，收上黎睇吓粒餌仲喺度，我再落呢口餌就由得佢食，食咗幾吓又停咗喎，呢次我唔收上黎睇喇，耐心咁等佢食餌，過咗半分鐘，條魚忍唔住又埋黎食餌喇，今次就食得好狼添，我睇準來勢，往上一抽，哈哈!!中咗~好容易就收埋上黎，落埋生籠。
呢個時候師傅偉剛黎到，佢就釣烏頭，我見都冇乜魚訊，咁就上番橋面同佢一齊癲喇，釣到22:00，舊餌此終都係冇魚咬，都係執埋Ｄ架生，走人去宵夜好過喇！
原來都仲有Ｄ金古釣吓嘅！
兩條夾埋都有一斤。
