又為食又要釣魚

18-12-2012  (農曆十一月初六)
話說早兩日，姨甥女送咗ＤX記嘅貴價腊鴨肶同鮮膶腸比我，今晚諗住煮飯食，不過噚晚有兩條鱸釣吓，而今日嘅天氣都唔錯，一於乘勝追擊，去釣咗魚先。
擸埋架生落街市執廿零隻蝦，喺街市門口撞見個舊同事民少，傾左幾句就拜拜直跴主場。
落到去見流水未起，咁就喺橋外搏陣先！可能附近有挖泥工程，又嘈喧巴閉，所以呢排喺橋外位未中過魚，我一見起流就即刻搬野入躉位，擺好個陣就等運到；過咗差唔多個幾鐘，沉底同半水兩枝竿郁都未郁過，想話拉番釣鱸果隻蝦上黎，睇洗唔洗換過隻生Ｄ嘅落去，點知一攞起枝竿就有魚食餌，督督!!扯咗兩吓，黎料喇~呢個時候，連呼吸都唔敢大力，驚嚇走條魚吖嘛，我集中精神，靜觀其變！條魚又扯咗兩吓，第三吓大力搶餌喇，我一抽竿就快攪咗六七吓，感覺呢條魚都唔細，立刻駛出【凌波微步】，向後行兩三步，枝竿頂到行，將條魚由樁柱間拖出黎，條魚出咗黎喇，佢一見光就發力開尾，你知鱸魚嘅爆發力有幾大架喇，呢個動作隨時炸你竿呀！所以我就鬆一鬆手指，比番幾呎佢走吓，如是者上落兩三次，過程都總算順暢，最後上到水面就乖乖咁入我個撈箕度上水喇，條魚睇落起碼三斤喎！扣好魚就換過花咗嘅魚線，挷好勾就落餌繼續。
又過咗一陣，腦海特然程現Ｄ香噴噴嘅腊味喎！個肚即刻〝咕咕〞聲，唔係喇，橫掂釣到魚，不如早Ｄ走，番屋企煮個腊味飯食吓囉！咁就嗱嗱聲執埋Ｄ架生同魚穫，番屋企吔飯喇~

咁早番到屋企，大人仲未瞓，同我影張相先。

依家Ｄ鱸魚係好野黎架(我話)！

過磅係三斤十。

劏埋魚，攪掂哂Ｄ釣具就開始煮飯喇，洗落米煲落飯，攞定Ｄ腊鴨肶同鮮膶腸出黎，跟住煲杯奶茶，飯差唔多收水就落埋Ｄ腊味，跟住就去洗白白，洗完白白啱啱好，攞Ｄ喺飯面熟咗嘅腊味出黎，一打開個飯煲蓋，嘩!!Ｄ香味直灌神經中樞，嗱嗱聲切好Ｄ腊味，筆碗香噴噴嘅腊味飯，仲未食得住，影埋相同大家分享先！

臘鴨肶一隻(左肶)、鮮鴨膶腸一條。

我問大人係米好香呢，食唔食呀！佢就話彩我都傻~咁我就自己開飯食喇！