30-6-2012 (農曆五月十二)
打風喺屋企屈咗兩日，今晚老虎蟹都要去釣番轉架喇！約咗師傅偉，咁就喺19:30落到主場，今晚冇乜流，開好竿坐定定等運到，20:15師傅偉都黎到，我枝竿只係一味比魚仔化餌，佢一黎到落餌冇奈已經起條金古，我都唔弱，跟住都起番條，將Ｄ金古落好生籠，再落餌繼續；一路釣到22:00，我同佢枝竿特然一齊比魚拉到彎哂，之前亳無魚訊，一抽就中，唔使問咁食法梗係牛屎喇！我地一齊收兩條魚上黎，兩條都唔過斤，跟手入埋生籠，再落餌之後就又靜哂，今晚我地都算超額完成，22:45就執埋架生去宵夜喇！
用麵包又中牛屎，以後仲使唔使買虾呢！
Ｄ金古須然唔係大，好彩都有兩條。
今晚嘅收穫都唔錯，都算係有Ｄ驚喜。
26-6-2012 (農曆五月初八)
今晚有飯開喇，因為有魚吖嘛，三公主晏Ｄ番
，咁我就同大人食先，留番飯餸比佢番黎食。
用十三年嘅陳皮蒸金古就最正喇。
蒸九分鐘，葱花放面，再贊頭抽、滾油，嘩!!真
係正到痺。
整多味雲耳北菰火蒜照燒雞。
加埋個凉瓜排骨老火湯。
食飽飯冇乜世藝，見噚晚Ｄ金古肯開口，今晚又
蒸咗兩條食咗，雪柜要補番Ｄ貨加嘛，所以喺
19:30執埋架生，飛車落主場揾貨。一落到去開
好竿，放頭一口餌，詁唔到好快就拉落去喇，食
法唔似金古，我一抽跟住就收繩，只有輕微嘅反
抗，好快上水，原來係大眼倉；落好生籠就繼續
，過咗半個鐘度，開始行流喇，竿頭即時有金古
嘅魚訊，當佢震震吓咁拉落去嘅時候我就抽竿，
中咗，收上水係磅頭金古，落埋生籠就再釣過，
唔夠半分鐘，又有魚訊喇，呢次震震吓咁托起枝
竿頭黎食添喎！大野~我快手一抽，以經感到好
聚手，攪咗兩吓，佢就鐘頭向下衝，磅頂即時發
出叮叮聲，頂咗幾秒，又收幾吓，一頂一收幾回
合，卒之上到水喇，Ｄ金古一離水佢就唔郁架喇
，睇落都有斤幾兩斤，果度又落唔到撈箕，唯有
搏一搏，用手將條魚收上黎喇，點知一搏就衰咗
，啪一聲！條魚爆咀跌番落海~當時我嬲到手都
震埋，震都要再落餌架。飲啖水定定神，將餌落
番正話嘅釣層；過咗大半個鐘先至再中條七八両
嘅細野，都好過冇喇，望吓個錶，嘩!!成十一點
拿，咁快嘅？都係執野走人嘅時候喇！拜拜~
25-6-2012 (農曆五月初七)
噚日有約冇去釣魚，今日一夠鐘就約埋師傅偉去釣番轉，執好架生就飛車落主場喇。
18:30落到主場，流水剛停，開好竿坐定定等運到，一路釣到起流，師傅偉都黎埋，兩兜友都係喺度呆等！到咗21:00師傅偉喺兩潯水先中條磅頭，咁我梗係唔執輸喇，嗱嗱聲轉釣兩潯，即刻又比我中番條半斤十両嘅；釣完兩條又靜哂，22:10師傅偉要走先，我見咁好流水，缺定磨多陣，真係喺佢走咗冇奈，比我起多條磅頭嘅金古，既然目的以達，見好就收，執埋Ｄ架生同魚穫，鬆人去宵夜喇！
今季Ｄ金古大條Ｄ，中親都磅頭 ！
磨爛蓆都有價值，兩條磅頭一條六兩都唔錯喇！
23-6-2012 (農曆五月初五)
今晚冇約，咁就梗係去釣魚喇，本來約埋師傅偉嘅，點知佢落到黎話Ｄ流大過頭，Ｄ金古實唔開口喎！跟住就走埋添，咁我就唯有一個人釣喇！
前晚中兩條烏頭，今次我除咗釣金古，仲開多枝竿釣烏頭，Ｄ流真係幾急吓，一口金古魚訊都冇，剩係Ｄ池仔喺度化餌，間中都釣到佢，見咁細條冇肉食，即釣即放；21:00Ｄ流一慢，即刻就有魚開口喇，輕輕食咗幾吓就拉竿喇，一抽即中，上水係六七両金古，再落餌又中，以為金古大咬，嗱嗱聲趁未停流釣多幾條都好吖，跟住第三口餌又係池仔化餌；而釣烏頭枝竿郁都未郁過，望吓個錶又十點幾喇，流都轉埋，都係執野走人囉！
今次Ｄ金古就細咗Ｄ，好彩又有兩條喎。
喺金古後面果條，就係成晚比佢攪攪震嘅池仔喇！
21-6-2012 (農曆五月初三)
早幾日連龜兩次，條氣唔順，今晚又立架生落主場做Ｄ金古世界；19:15落到去Ｄ流仲喺澎澎聲，慢慢開好竿，落餌等運到；粒餌比流水冲到好似放飛机咁，又係好似前兩晚咁毫無魚訊，一路釣到21:30Ｄ流開始減慢，竿頭亦都感到有魚訊喇，開頭拉咗幾吓，跟住一吓就成枝竿彎哂，我手起竿抽，磅頂即時發出悲嗚，好大嘅拉力呀，Ｄ聲一慢我就連攪五六吓，佢又搏命衝，經過三四個回合，見魚喇，一條長形嘅魚，唔使問呀貴，梗係老烏喇，果度落唔到撈箕，只有快手小心將條魚抽上黎，都有斤幾重，嗱嗱聲落生籠，勾過餌繼續釣，一放落去即刻有魚接餌，睇住佢震震吓咁食，我就輕輕向上一帶，又中!!!又係咁玩咗幾個回合，見魚喇，嘩起碼三斤~點好呢！又落唔到撈箕，唯有搏一搏啦，用手一抽，想話喺條唔夠四寸嘅〝喇〞果度拉佢上黎，一離水就啪一聲，斷勾收場！
吸幾啖氣，再挷過勾落餌繼續，過咗冇奈，清脆嘅金古魚訊出現喇，食咗兩吓就開始震震吓咁拉落去，我跟手一抽，中咗!!!明知係金古就唔使點就佢，好快就收咗佢上黎落埋生籠，再落餌繼續，但係一路都再冇魚訊喇！望吓個錶，咁快就十點幾架嗱，都係執野走人，去宵夜喇喂~
兩種食麵包嘅魚都比我釣埋。
磅頭金古加條斤半烏頭 。
14-6-2012 (農曆閏四月廿五)
今日食咗噚晚釣果條金古，大人〝超讚〞，所以一食完晚飯就即刻再去釣喇！
19:30到釣場，開好竿就坐定定等運到，今晚都有Ｄ零星嘅泥鯭魚訊，到咗21:15有一吓金古試餌嘅動作，我即刻牛咁眼啤實枝竿頭，佢試咗兩吓，第三吓就震震吓咁拉落去，机不可失，我快速往上一抽，有Ｄ重量，一手頂住，一手慢速攪咗幾吓，磅頂又發出刺耳嘅叮叮聲，條魚開始冇力，我就好輕鬆咁收佢上黎，須然條魚搏命片水，不過都難逃比我拉上水嘅命運；上黎係磅頭金古，剪勾落生籠一腳踢！
嗱嗱聲落餌繼續，都係得Ｄ零星泥鯭化餌，望吓個錶又到22:00點喇，算數喇，至多每晚續條咁釣佢，跟住執埋架生同魚穫，早Ｄ番屋企喇。
Ｄ金古比我續條釣。
又係磅頭金古。
13-6-2012 (農曆閠四月廿四)
今日18:30已經落到主場釣金古，一路釣到22:00，唔好講話中魚，就連似樣Ｄ嘅魚訊都冇，通常我放兩三潯水釣嘅，見冇勿聲氣，就再勾過舊餌，試吓放四潯喇，咁樣一改，即刻就有金古食餌，佢試咗兩吓，第三野就拉竿喇，我順勢一抽，中咗！佢就搏命衝，我個磅頂就搏命響，我就佢一陣即刻攪咗幾吓，見佢開始冇力，我就好順咁收到條魚上水，剪勾即入冰箱，落餌繼續，點知釣多成粒鐘都係冇料到，都係鬆人去宵夜好過咯！
好彩中番條磅頭金古嘖。
聽日用陳皮蒸黎食。
唔通成個海都係得一條金古？
12-6-2012 (農曆閠四月廿三)
今日又落主場釣金古，開好竿天就快黑，竿頭一吓強烈嘅魚訊，唔通係大野!!!快手一抽，有少少力，收到上黎原來係大眼倉；落餌繼續，再中!!!噢~又係大眼倉！跟住落黎就冇哂魚訊，釣到轉流都冇一咀，跟手執野走人，去宵夜好過喇。
釣金古中大眼倉！
8-6-2012 (農曆閠四月十九)
今日本來冇諗住去釣魚，點知師傅偉來電，話想釣番轉，我就梗係奉倍到底喇；落到主場大家開好竿釣金古，Ｄ流水仲係好急，我地都係放咗餌落去等運到，志在喺度吹吓水，過咗大半粒鐘，我枝竿特然比魚拉到彎哂，心諗係大金古！我順勢一抽，嘩!!好垂手喎~條魚發力向下衝，磅頂立時叮叮響，Ｄ聲一停，即刻連攪四五吓，因為落餌都係放得兩噚水，所以巳經見魚，條魚一離水，我就即刻用手將條魚抽上黎，點知條魚上到黎仲搏命跳，通常金古一上水就唔郁加嘛，睇清楚原來係條牛屎立，你都算低C囉！麵包都食，跟住將佢解鈎落生籠，再鈎過粒麵包繼續釣。
一路釣到轉埋流，都只係有Ｄ零星嘅魚訊，跟住Ｄ流一急，連些少嘅魚訊都冇埋，都係執野走人仲好過，跟住就同師傅偉去宵夜喇。
想話釣金古，點知中牛屎。
詁唔到牛屎連麵包都食。
磅頭牛屎夠哂嫩滑，清蒸就最正。
6-6-2012 (農曆閏四月十七)
旅行番黎，抖咗一日，釣魚蟲〝共共〞吓，唔理咁多三七廿一，即刻去釣番轉魚先。
今次都係釣金古，由18:30釣到22:00一咀都未食過，可能Ｄ流急喇，一慢流就開口，連起兩條，Ｄ流好快又轉咗，跟住又收哂口；唔同佢癲，執埋架生去宵夜好過喇！
中番兩條又有飯開喇！
Ｄ魚轉流先肯開口。
