26-4-2012 (農曆四月初六) 大東南風
今晚我嘅釣友師傅偉有飯局，咁我就單拖落主場；去街市執廿隻生蝦，落到去都未夠18:30。
啱啱起流，出面又大風，咁我就喺躉頭擺陣，落餌冇奈釣鱸枝竿比魚拉咗一吓，我即刻攞埋撈箕過去，一執起枝竿條魚以經中咗，順勢攪幾吓，唔係大野，好快就撈箕上水喇，係斤幾嘅小鱸，解勾落埋生扣，一腳踢，勾隻生蝦再釣過。
20:40見Ｄ流慢咗Ｄ，咁我就放番枝沉底竿搏吓符碌先；坐低唔夠三分鐘，釣沉底果枝竿個鉸〝烈烈〞響咗一吓，我坐喺則邊，好快就拎起枝竿，說時遲那時快，條魚拖咗兩吓就發力搶餌喇，我就狠狠咁往上一抽，中咗！慣性動作連攪七八吓，嘩!!有Ｄ斤両喎~條魚想標番落底，我就頂到行，一路頂一路往上提竿，發覺條魚冇乜力果吓，又快速收佢十吓八吓，仲要將條魚帶離樁柱位，一出咗黎條魚見光就發哂茅，開尾向外面衝，喺呢個位置我就定當喇，唔再夾硬頂，咁就放番幾呎繩佢走吓，當佢一慢落黎果吓，我就左頂左收，右頂又收，幾招就將條魚拉到上水面，嗯!!紅鮋黎喎，都有兩三斤，速落撈箕上水，落埋生扣，即刻落餌睇仲有冇先！
一路釣到21:30，Ｄ風好似越吹越勁咁，海面都起哂湧，既然都以經有收穫喇，咁見好就收，執齊架生同魚獲，早Ｄ去宵夜喇喂！
番到屋企又向大人耀武揚威一番。
而花鱸係每次嘅釣胆黎架！
又準備劏魚~紅鮋兩斤十三X1
花鱸斤幾X1
24-4-2012 (農曆四月初四)
今日臨去釣魚果時，烏天黑地，好似想落雨咁，不過未落出，唔理三七廿一喇，有理冇理，執埋架生，落渣華道街市攞蝦，跟住就直跴主場。
一到主場，流水剛起，即刻喺躉頭開竿，19:10先中一條四斤花鱸，過咗冇奈再中條斤零嘅；呢個時候，師傅偉又到咗，佢開好竿就行過黎同我吹水，佢話依家咁行流，唔方有魚開口喇，話口未完，佢枝竿就響鉸喇，佢三步夾埋兩步過番去執起技竿，一抽就中，上黎係唔夠半斤嘅花鱸，解勾揼番落海，等養大Ｄ先再釣番佢。
又過咗一陣，我就悶到行行企企，望過去師傅偉度，見佢喺度搏緊命，嗯!!中大野喎~咁我就攞埋撈箕過去幫拖，行到過去見佢停哂手嘅，但係見枝竿仲係彎哂喎，哈哈!!條魚包咗樁，佢就鬆吓收吓，條魚此終都唔肯番出黎，我就梗係比Ｄ鼓勵性嘅說話佢喇~比Ｄ耐性，條魚一日唔走，實會比你拉番出黎嘅，講完我就行番去自已果邊；大約過咗十幾分鐘，見佢企番起身頂魚喎！卒知比佢拉番出黎，我做魚僮，撈箕上水又係四斤花鱸，落好生扣攪掂哂，又回復番平靜。
一路釣到轉埋流，幾枝竿都冇再郁過，22:15執野走人，早Ｄ去宵夜好過喇。
番到屋企兩隻貓咪咪咁叫，嘈醒咗大人，咁就順便同我影幾幅相先喇。
兩條都差唔多大喎！
呢條就細咗ＤＤ。
又有排劏喇。
23-4-2012 (農曆四月初三)
今日心大心細，去唔去釣魚呢！卒支師傅偉來電，問今晚制唔制，比佢一問，我嘅答案當然係制喇；一手攞起Ｄ釣魚架生，跟住去街市攞埋蝦就直跴主場喇。
19:10落到去，流水都幾急吓，咁我就喺躉頭開竿，過咗冇奈師傅偉都到咗，佢就例牌喺橋面釣鱸，擺好個陣就喺度吹水，特然我沉底枝竿響鉸，我即刻執起枝竿，等佢再食深Ｄ果吓就抽竿，中咗！我就快速攪咗五六吓，嗯！有Ｄ力喎，唔似牛屎，咁我就唯有頂幾秒先喇，跟住再攪幾野，又頂一陣，條魚想向樁柱衝，我就邊頂邊拉，追返幾手，一見條魚出番黎就唔客氣喇，又使出絕招「無敵風火輪」，一路將條魚攪上水面，唔怪得片得咁犀利喇，原來係斤幾重嘅牙點，師傅偉己經落咗撈箕一野就上水喇，將條魚落好生扣就繼續。
一路釣到21:20，師傅偉連起兩條鱸，我見橋面咁好魚，速速轉陣上埋橋面搏殺，搬咗上去冇幾奈又比我中多條鱸喎，呢次即入冰箱，因為時間都差唔多喇，見好就收，有魚留番聽日釣，執埋Ｄ架生就去宵夜囉！
番到屋企，三公主啱啱去完台灣番黎，咁就揾佢同我影將相。
今晚釣沉底中獎，牙點斤幾。
大人話:「係囉，釣多Ｄ呢Ｄ魚吖嘛」！
佢以為釣魚可以簡黎釣喎，真係比佢笑鬼屎。
又牙點又花鱸今晚都算大豐收。
日日有咁好魚就正喇~ 牙點斤幾X1
花鱸斤幾X3
21-4-2012 (農曆四月初一)
登埋前晚中果兩條爛鬼鱸魚(大人話)先。
17-4-2012 (農曆三月廿七)
今日師傅偉來電，問我去唔去釣魚，呢輪咁旺，梗係應承佢喇，咁就等佢去簡定蝦先，我就煮埋飯，嗱嗱聲執架生落渣華街市攞蝦，19:15就落到主場。
Ｄ流仲係好急吓，慢慢開好竿，坐定定等運到，點知一坐就坐咗個幾鐘，流都轉埋，三枝竿郁都未郁過，呢個時候，師傅偉就到咗喇，佢就開好兩枝竿，跟手上番車做其〝睡夢羅漢〞；過咗一陣，我枝竿郁攞喎，竿頭彎哂落去，我一抽就中，好快上到水面，喺斤零兩斤嘅花鱸，頭威頭勢實落撈箕嘅，落埋生扣一腳踢。
21:10望吓師傅偉，佢仲喺車度瞓到流哂口水，而我就悶到擔天望海，呢個時候，特然佢由車度跳出黎，一手就執起枝竿，跟住就係咁攪，好快就將條魚收埋上黎，磅頭花鱸，都唔使我攞撈箕過去幫拖，佢自己解咗魚，我就攞住條魚準備落生扣，又聽見響鉸喎，佢都未放低中魚果枝竿，第二枝竿又有魚食餌喇，三步夾埋兩步就標咗埋去，執起枝竿一抽就中，呢次我唔理佢喇，攪掂扣埋條魚先去攞撈箕，佢就〝鄧〞住條魚喺度等我，最後都係撈箕上水，又係斤零兩斤嘅花鱸，今次直入冰箱喇，因為都成十點喇，比佢連起兩條，過足引，好彩我都有一條中吓，冇咁瘀，跟住我地執埋Ｄ架生，走人番屋企食飯喇。
今晚冇大野，費事嘈醒大人，靜靜雞玩自拍。
今晚又有三碌， 好彩雪柜個冰箱夠大啫，唔係就擺唔落Ｄ魚穫架喇。
16-4-2012 (農曆三月廿六)
兩日都落雨，今日較為好天，即刻走去買十零廿隻蝦，18:30落到主場，見以經有三四個釣友喺度釣緊，咁我就揾個靚位開好竿，呢個時候Ｄ流開始慢落黎，過咗一陣，見枝竿頭拉咗一吓，我一執起枝竿就抽，中咗，好細條，幾吓手腳就將條鱸仔上水，費事洗撈箕，一野就掟佢上黎，半斤鱸仔，落好生扣，落餌繼續。
又過咗一陣，行過去睇吓枝沉底隻蝦有冇比蟹化餌先，當我攪緊上黎嘅時候，聽到剛才中魚果枝竿響哂鉸，我就立即放低枝沉底竿，飛埋去執起響鉸果枝竿，點知條魚好快咁包咗樁，開頭仲感覺到佢喺度，三四秒之後就郁都唔郁，噢!!〝斷咗〞唯有屎屎氣收番Ｄ線上黎，手震震咁挷過勾再釣過。
落咗餌唔夠五分鐘，竿頭又拉咗吓，我執番起枝竿先，再慢慢收線，一緊條魚就發力喇，順勢一抽，中咗！呢條都有Ｄ力喎，攪咗幾吓，就就佢又攪幾吓，唔使一分鐘，條魚就比我拉到上水面，我見條花鱸都有兩斤幾，都係落撈箕揾陣Ｄ，上咗水落好生扣，落餌繼續。
跟住落黎就到「蛇仔明」中斤頭細鱗，「呀廖」又中條斤幾花鱸，跟住落黎流水已轉，Ｄ魚又收哂口，兩個鐘郁都未郁過，我釣到22:30就執野走人去宵夜喇。
Ｄ爛鬼鱸魚(大人話)係食轉流果吓。
花鱸X3，(兩斤半、斤半、半斤)
13-4-2012 (農曆三月廿三)
噚晚咁早走，今日一於約埋師傅偉去釣過，佢就去簡蝦先，跟住我去攞，今次佢買咗50蚊蝦，都唔知買咁多黎做乜，實釣唔哂，霖走實倒落海餵魚，嘥哂Ｄ野！
我就18:30到主場，Ｄ流水好慢，開好竿，坐定吹吓海風真係舒服；等到20:00師傅偉都黎埋，我三枝竿郁都未郁過，過咗一陣，Ｄ流停哂，咁我就將Ｄ架生搬入去躉頭位，即係噚晚中八斤花鱸果度，睇有冇運行先。
過咗一陣就開始行流喇，我就金睛火眼咁恰到實幾枝竿，其中一枝好快咁比魚拉咗一吓，我即刻執起枝竿，條魚想發力，我比佢更快，一抽就即攪咗五六吓，好順喎！再一頂就直收上水面，跟住撈箕上水，係兩斤嘅花鱸仔，落埋生扣，再落餌繼續；喺呢個時候，師傅偉又中條兩斤嘅花鱸仔，靜咗一陣，我枝竿又有魚訊喇，拉咗兩吓，我執起枝竿條魚已經發力，順勢一抽，中咗!!但係感覺又Hi住樁，唔怕~頂陣先，跟住鬆一鬆繩，條魚就出番黎，我就把握呢個机會，個人向後行咗幾步，將條魚由樁柱位拉出黎，再收繩，嘩!!好重嘅拉力，机乎攪唔郁，〝大野〞！我只好再靠邊住後行，好彩枝竿夠力，卒之比我拖咗出黎，見魚喇，好巨型嘅魚影，即刻叫師傅偉過黎幫拖，條魚一見光就想開尾，我唯一可以做嘅就係放繩，放咗七八呎，又收番佢上黎，佢又標番落去，如是者都有三四個回合，最後佢知走唔甩喇，反肚投降，今次好彩有師傅偉幫手撈魚，上咗水睇清楚，條魚又肥又大，起碼十斤，我同佢落兩個生扣。
時間過得真快，咁快就23:00點嗱，我地都有中魚，咁就執埋Ｄ架生，一齊去宵夜喇。
番到屋企專登大大聲嘈醒大人，等佢同我影相。
抽高Ｄ唔會摭住塊面。
越拎越攰，要兩隻手抽住先至得。
哈哈!!仲有兩條兩斤小鱸。
今晚嘅收穫都唔錯，尤其是條十一斤嘅花鱸，因為係破咗我自己喺主場嘅記錄，真開心。
長度係 88Cm
12-4-2012 (農曆三月廿二)
今晚食過番尋味，買咗蝦就直跴主場，師傅偉唔得閒，所以今次我要單打獨鬥！
19:00落到去見係流尾，嗱嗱聲開好竿，諗住Ｄ魚會開口，點知等到轉哂流，三枝竿原封不動；見Ｄ流水開始大咗，咁就唯有將架生搬番去入面Ｄ躉頭度釣；今日天氣開始熱，攪惦哂都成身汗，坐低想話飲啖水，特然聽到鉸響，我就用九秒九嘅速度標埋去執起枝竿，呢個時候枝竿以經比條魚拉到彎哂，我就即刻往上一抽，諗住先攪幾吓，但感覺到條魚線Hi住樁，咁我就唔敢收繩，唯有頂陣先喇，頂咗四五秒，咁都唔係辨法過喎，跟住改變戰畧，鬆番Ｄ比佢，一鬆之下，果然條魚就轉頭游番出黎，咁我就順勢快速攪咗十幾吓，條魚亦不甘示弱，又發力向Ｄ樁柱間標埋去；我開頭以為條魚都係兩三斤啫，但係條魚喺呢一衝，我就知係大野喇，即時打醒十二分精神，同一時間就鬆番幾呎佢走吓，跟手就連頂帶攪，又將條魚帶番出黎，出咗黎我就定喇，一路上上落落幾回合，卒之見魚喇，〝幣加伙〞...枝撈箕唔喺旁邊添，點樣上魚呢，慢一慢又比條魚鐘番落去，又要費一輪功夫先至將條魚再拉番上水面，〝唔怕！有辨法〞我即刻將條魚，沿住個躉邊，一路帶過去，途中條魚都有兩三次嘅反抗，我好小心咁帶到埋放撈箕果度，仲要伸長隻手先至〝O〞到，一落撈箕就上水，嘩!!睇落都有七八斤喎！將條魚落好生扣，我就坐低抖順條氣飲番啖水先，跟住剪去Hi花咗果Ｄ魚線，挷過勾，再落餌繼續。
望吓個錶已經21:00，番到屋企呢條魚都有排攪，都係早Ｄ執野走人去宵夜好過囉！
咁早番到去，大人仲未瞓，仲同我影埋相添。
咁大條花鱸，好野呀呢！
過磅八斤四、80Cm
10-4-2012 (農曆三月二十)
幾日冇釣魚，手都痕埋，約咗師傅偉，跟住就落街市買蝦。
19:15到主場，流水剛起，嗱嗱聲開好竿，坐定定等運到；一路Ｄ流水都好急吓，過咗兩個鐘，三枝竿郁都冇郁過，呢個時候師傅偉黎到喇，佢就開一枝竿釣鱸，仲要喺車上面恰眼瞓，特然見佢由車度跳出黎，執起枝竿，一抽跟住就中魚，好順咁攪到上黎，斤零花鱸，我同佢撈魚，當我將條魚落緊生扣果時，佢又話中魚喎，我又要同佢撈魚；攪掂哂想話坐低抖抖，呢次輪到我枝竿郁喇，我快手執起枝竿，條魚以經發力，我順勢往上一頂，跟住快速攪咗四五吓，條魚有番Ｄ力水，一慢落黎就比佢鐘頭落番去，咁我梗係放番多少比佢走吓，點知好好彩，條魚係咁向外標，我就住再放多野繩比佢，跟手開始收繩喇，收吓放吓條魚都係喺出面飛，足足玩咗成分幾鐘，師傅偉已經揸定個撈箕喺度等，仲話快Ｄ收佢上黎喇，玩爆咀今晚又瞓唔著喇，我唯有收佢埋黎，上咗水，落埋生扣，望吓個錶，我地中三條魚都係廿分鐘度咋，跟住落黎又靜哂；22:00見大家都有魚中，咁就齊齊執埋Ｄ架生走人去食宵夜喇。
開始有回頭花鱸釣喇！
其實成晚都係釣果廿分鐘。
呢兩條鱸仔都有斤幾重架。
廿分鐘嘅收穫:大鱸X1四斤半。
鱸仔X2斤幾。
2-4-2012 (農曆三月十二)
今日師傅偉來電，話佢去炳記簡定蝦先，叫我到時到候去攞，咁我就唔使咁趕，食埋飯，它它條條去攞埋Ｄ蝦，直跴主場。
落到去啱啱轉流，都係照舊兩枝釣鱸，一枝沉底有乜就
釣乜；釣咗個半鐘度，以經釣咗兩條磅頭鱸仔喇，呢個時侯師傅偉先至黎到，我就比個靚位佢，而佢都係剩釣鱸；同佢喺度吹緊水，特然佢個鉸響，咁佢就飛撲埋去，執起枝竿，我見佢枝竿頭只係輕微咁點點吓，佢就話條鱸好細喎，唔拉竿嘅！我就叫佢唔好抽竿，等佢拉竿先至好抽，呢頭講完，果頭佢就抽竿喇，見佢頭幾吓都收得好順，跟住見條魚一發力，另到師傅偉要鬆繩比佢走，嗯!!原來係大野喎，佢就話唔係好大啫！不過我都去攞定撈箕先，一路攪到上水面一睇，原來係條牛屎，咁我就將條魚撈咗上黎，入埋生籠。
又到10:00點喇，兩個人都有魚中，都係執野走人囉。
到依家先知，原來個海係得呢兩種魚~
師傅偉釣鱸釣到嘅牛屎，益埋我喇！
牛屎兩斤X1
花鱸磅頭X2
