釣下價野都爭

16-9-2012  (農曆八月初一)
今日18:00落到去釣魚，我睇都係釣得果兩個鐘度，因為睇過天聞台話21:30Ｄ水會漲到兩米，米八都濕腳喇，仲話兩米添。
捐咗入去橋底，啱啱擺好個陣，Uncle就到喇，開頭大家落竿嘅位置都有兩三呎距離，點知我果邊開始有魚訊，跟住仲起咗條小烏添，當我再落餌，又有魚食餌，而佢果枝竿郁都未郁過，佢即刻收起枝竿，走埋過黎用手繩拍住我釣，點知Ｄ魚都係冇食佢嘅餌，但係我枝竿就好明顯食過不停，當我中第二條小烏嘅時候，佢又換番枝竿黎釣喇，今次唔止拍住釣，跟本兩條魚線距離唔夠三寸，點釣呀！跟住我又中第三條小烏喇，兩條魚線拍咁埋，一中咗魚緊係〝Q〞埋一齊喇，收到上黎，我都費事解勾，用較剪剪鬼斷條魚線，即刻收埋Ｄ架生，我話:「我唔釣喇，比你釣埋佢喇」！跟住捐番上橋面，掟浮波出去，睇有冇大海烏釣吓，一路都冇魚訊；過咗一陣Ｄ水都漲到浸腳喇，呢個時候見〝茅王Uncle〞上番黎喇，仲笑笑口抽住兩條烏頭，我心諗，唔係識你咁奈，真係一腳伸你落海；跟住我冇彩佢，執埋架生走人去宵夜喇！

烏頭仔都有幾條釣吓 ，不過釣得谷鬼氣囉！

細細地，用黎蒸蒜頭豆鼓都幾好味架。

勾都拉直

14-9-2012  (農曆七月廿九)
今日攞埋幾條魚去Ｄ公主度，一番屋企，即刻執架生落主場，落到去以經見Ｄ隱膽釣腳係度釣緊，佢地以經有魚中咗，咁我都唔好執輸，速速開竿，點知可能我黑仔，落咗餌之後，兩三個鐘，幾枝竿郁都未郁過；九點幾Uncle走先，剩得我同師傅偉喺度吹水，踎到十點，Ｄ流開始慢咗Ｄ，我枝竿頭就輕輕比魚拉咗幾吓，黎料喇！當佢再較為大力Ｄ拉嘅時候，我就快速抽竿，中咗~嘩!!好猛嘅拉力，攪咗兩吓以經再攪唔郁，唯有屎頂，磅頂又發出叮叮聲，頂咗四五秒諗住再收，噢~輕哂＃開頭以為比佢飛埋樁Hi斷繩，點知收番上黎睇，原來隻勾比條魚拉直咗；等咗幾個鐘先有魚中，可惜又走魚，嬲到手都震埋，震都要挷過隻勾落去架，今次換隻大少少嘅勾落去，睇佢點拉得直；呢個時候，師傅偉又中魚喇！上黎係條磅頭金古，即刻比捧場客打劫；過咗十零分鐘，我又有魚食餌喇，今次食得仲細力，師傅偉就話梳羅仔啫，但係我就唔敢大意，對眼望實竿頭，特然枝竿頭彈起咗，我就一抽即中，又係好重手，頂吓收吓幾個回合，見魚喇，睇住條魚高速喺水中打轉，你個心都米話唔十五十六，收到埋黎好彩有師傅偉幫拖，撈箕上水，條魚睇落都過斤；走咗一條，好彩又中番條，師傅偉就話:「你今晚唔洗瞓唔著喇」！
跟住再釣多陣就執埋Ｄ架生，有魚留番聽日釣，兩個傻佬就一齊去宵夜喇！

呢輪中親Ｄ金古都係斤頭 ，力水猛都不得了。

今季Ｄ金古同上季嘅釣法又唔同咗，唔通Ｄ魚都會進化嘅！

獨孤一味

13-9-2012  (農曆七月廿八)
釣魚虫咬，今晚食咗飯先落主場，落到去Uncle同大師傅以經喺度釣緊，我準備落竿，大師傅就中魚，同佢撈埋條魚上黎，都有斤頭；攪掂哂我就落餌喇，一落就有魚食餌，抽咗兩竿都唔中，跟住Ｄ流就行急咗，Ｄ魚就收哂口；都要釣架，餌落餌上，原封不動。
過咗個幾鐘，Ｄ流開始慢番，即刻就有番Ｄ輕微魚訊，Ｄ魚食得好精，食一口就要等十幾秒先番再食一口，冇話連食嘅動作；我即刻改變戰畧，勾粒細Ｄ嘅餌落去，當佢食得較為大力果吓就抽竿，一抽即中，上黎係條幾両金古，須然細咗Ｄ，不過戰畧成功，落餌繼續；又過咗一陣，Ｄ魚又係咁食餌，我又用番剛才咁嘅戰術，果然又中，今次呢條就有Ｄ力喇，我攪咗幾吓，條魚就扯到行，磅頂即時又叮叮聲，頂咗三四秒，即刻再收，今次就好順收到上水面，睇落好大餅，唔敢直上，大師傅就同我撈魚，中咗條大野，個人即刻精神哂！將條魚落埋生籠，下餌繼續；呢個時候，大師傅同Uncle都各中一條，我亦都唔弱，一抽又中，上黎都係斤頭金古，跟住Uncle再中多條Ｄ魚就收哂口喇！望吓個錶，原來咁快又成十一點嗱，今次就齊齊執野，鬆人去宵夜喇！

又中斤幾嘅金古 。

換個角度都係咁大餅 。

兩條都係差唔多咁大條 。

金古越釣越大 。

唔聲唔聲嚇你一驚

10-9-2012  (農曆七月廿五)
今日打開個雪柜，發覺冇哂貨，咁就梗係要落主場攞番Ｄ貨喇；到咁上吓就執起架生，落商場買半磅麵包，直跴主場。
落到去以經見師傅偉、Uncle、大師傅三個喺度釣緊烏頭，仲釣咗幾碌添，我就嗱嗱聲揾個位開竿，一落餌即刻有魚食，發覺唔係烏頭果種食法，我靜靜雞收番舊餌上黎，換過金古釣組落去，唔夠半分鐘，見竿頭一彎，我就抽竿，好大嘅拉力，快手收幾吓，磅頂又發出叮叮聲，再追番幾手以經見魚，嘩!!一大餅野喺水面度片水，片到啪啪聲，佢地即刻望哂過黎，金古一離水就唔郁，我就好小心用撈箕由條〝喇〞果度攞條魚上黎，條金古喺今季都算大野，望落去都有斤頭過外，解勾落生籠，即刻落餌繼續；呢個時候，各人都換哂釣組，跟住幾枝竿好似彈鋼琴咁，又彈下上又拉吓落，中完又中，各人都中幾條，有Ｄ仲爆咀、斷勾，總之未得閒過，仲有一兩吓係中老烏，將幾條魚線炒埋一碟，媽媽之聲四起，卒之釣足兩個鐘先至停口，一冇魚訊就攞Ｄ水出黎飲吓，大家正在有講有笑之祭，特然大師傅大聲叫:「你枝竿呀」！我以經見之竿頭即時飲水，即刻快手抽竿，都唔係好勁啫，幾吓就收條魚上黎，原來係條大眼倉喺度攪攪震，解勾即入冰箱；見佢地仲喺度釣緊，我就執埋Ｄ架生，同佢地講拜拜喇！

呢條算係近期最大架喇，都係斤鬆Ｄ ！

詁唔到斤頭金古依家先至出現 。

豐收嘅一晚 ，四條金古，加一條大眼倉！

失魂魚

8-9-2012  (農曆七月廿三)
今日星期六，早半個鐘落主場喂泥鯭；天未黑，Ｄ泥鯭多度舊餌未到釣層就以經比佢地化咗，係咁落餌，都唔知換過幾多口餌喇，我諗冇五十都有四十口！
收太陽喇，早幾晚都係喺呢個時候，Ｄ烏頭大軍就會出現，我就打雀咁眼睇住竿頭，有冇烏頭嘅魚訊，過咗一陣，師傅偉又到咗，佢開好竿坐定定，兩個儍佬喺度等運到，我地兩枝竿都有輕微嘅魚訊，較為大力Ｄ嘅我地就抽竿，只係釣上黎嘅唔係泥鯭就係梳蘿，仲釣到條雞泡添；天都黑齊都未有一咀似樣Ｄ嘅魚訊，我地就喺度天南地北咁吹水，特然間師傅偉之竿比魚拉到幾乎跌落水，佢好快手一抽，中咗魚，跟住我枝竿又比魚拉到彎哂，我一攞起枝竿都唔使抽，以經知道中咗喇！佢又攪，我又攪，好彩兩條魚分開走，好快大家都由條〝喇〞度收咗兩條魚上黎，兩條都係大眼倉，放入生籠，落餌繼續，一路釣到水漲到腳先至娟番上橋面，見時間尚早，就用浮波掟出去睇有冇烏頭玩，點知都係得過等字，釣到十一點，兩個浮波都未郁過，都係執埋Ｄ架生，齊齊去宵夜好過喇！

又有大眼倉，都幾大條吓 。

麵鼓醬蒸黎食~正 

樣樣有

6-9-2012  (農曆七月廿一)

今日同大人約埋大姨，落筲箕灣「東盛」飲下午茶，三個人都係食咗百零蚊，仲好飽飽添，大人就話今晚都唔駛食飯囉，我即刻打蛇隨棍上，咁我去釣魚喇，佢就話你米去囉！哈哈~得咗。
番屋企執埋架生直跴主場，落到去居然冇人係度喎，咁我就開好竿，落餌喂泥鯭，喂咗十幾口餌，終於比我釣條金古，解勾落生籠一腳踢！落餌繼續；天開始黑，泥鯭收口，又冇金古魚訊，正想攞枝水飲吓，見到枝竿比魚拉住落，好彩仲有隻手，一手拿起枝竿，往上一抽，連攪七八吓，見魚喇，原來係大眼倉，跟手入埋生籠，再落餌又中，都係大眼倉；心諗唔通有成基大眼倉喺度，嗱嗱聲再落餌！過咗一陣，又有魚食餌喇，震震吓咁我就以為係金古，一抽竿我就知賴野喇，好重手，連攪四五吓，磅頂又響，叮叮叮叮...，一路收一路響，再睇佢標水嘅速度，唔使問梗係烏頭喇，上到水面想話攞撈箕，攞得黎條魚又爆咀！收番條魚線上黎，見到隻勾直咗，而家知點解我話賴野喇，因為釣開金古，隻勾丁屎咁細，鐘條大烏頭埋黎，你話點頂！嘅然有烏頭，我就即刻換釣組，勾過舊餌落去，呢次我落一噚水，過咗半分鐘度就有魚埋黎食喇，食到咁上吓我就將枝竿輕輕一提，即刻就有鼓拉力往下沉，順勢一抽即中，又係好重，雖然磅頂都有響，不過我一手都唔放比佢，連攪咗十幾吓就將條魚收到上水面，我先將條烏頭抽離水一半，以免佢有機會鐘頭，再小心由條〝喇〞果度伸枝撈箕落去，呢次佢冇得走喇，喺條〝喇〞度抽上黎，條魚機乎都唔夠過，呢條烏頭足足有三斤，解勾即入冰箱，落餌繼續；又釣咗陣，Ｄ流開始急，冇魚開口喇，跟住執好架生，收埋Ｄ魚穫，跟住去宵夜喇！

今季第一條過三斤嘅烏頭 。

又係食麵包孖寶 。

仲釣多兩條大眼倉添 。

今晚樣樣有 。

「同場加影」5-9-2012  (農曆七月二十)

噚晚釣嘅兩條金古仔，見冇勿驚喜，所以冇寫Blog。

下價野黎喇

4-9-2012  (農曆七月十九)
今日倍大人食埋晚飯先至去釣魚，所以落到主場都好晏，所謂晏其實都係六點鐘度；一落到去以經見Ｄ鐵腳喺度釣緊，嗱嗱聲開好竿，一落餌就有魚訊喇，梗唔係金古喇，邊有咁好魚吖，都仲係Ｄ泥鯭喺度化餌啫；喂咗一陣泥鯭，開始感覺有金古食埋黎喇，首先見Uncle枝竿頭彈起，佢好快一抽，中咗，快手攪咗條魚上黎，生籠都唔落，就咁用個桶載住就算，因為佢知道釣金古要掌握黃金半小時，所以解魚後要盡快落餌，當佢攪緊嘅時候，我枝竿頭以經震震吓咁比魚拉落去喇，我順勢一抽！即中~上黎都係半斤十両金古，我就一定用生籠架，將條魚養住，番到屋企都仲生；釣完呢兩條又靜哂！又過咗一陣，開始有番Ｄ魚食餌喇，似乎係烏頭喎~各人立即換釣組，當時Ｄ流水都幾急吓，而我落果粒鉛就比佢地嘅鉛較大，所以會定Ｄ冇咁漂；條魚食咗我舊餌幾吓，我就輕輕往上一提，立即感到有鼓沉重嘅聚力，說時遲，那時快！咁我就使勁一抽，再連攪幾吓，一路頂一路攪，原全唔比條魚有机會開尾，因為釣兩潯水，所以好快就將條魚收到上水面，今次Uncle同我撈魚，我就連聲唔該哂！將條烏頭入埋生籠，落餌繼續，一落即有魚接餌，呢次食得好狼屎，成枝竿拉到彎哂，一抽即中，又係好容易收到上黎，入埋生籠；呢個時候，望望師傅偉，佢呢幾晚，揸咗枝善良之竿，未發過市；我再落餌，但呢個時候，真係三枝竿都冇郁過，跟住大家又有時間吹水喇！再釣多陣諗住走人，早Ｄ番屋企，點知落大雨，一落就落咗成九個字，我地等到停雨先捐番上橋面，執埋Ｄ架生，番到屋企都十一點幾喇！

今晚又中食麵包孖寶。

今次Ｄ烏頭大條夾肥美，成兩斤幾一條。

金古我睇都釣得七七八八喇，接住落黎就係玩烏頭喇！

有講有笑又一晚

3-9-2012  (農曆七月十八)

今日嘅釣手又係我、師傅偉、Uncle；落餌即比泥鯭化餌，三條友仔一味勾餌、落餌、收繩，成大半個鐘都係做同一動作，過咗一陣，今次我第一個有金古魚訊，而Uncle亦冇打茅波，條魚食到震震咁吓拉落去，抽竿即中，跟住就到Uncle有魚食餌，佢既然唔打茅波，我亦無謂攪破壞，佢又好順利咁中魚，跟住再比佢釣多條添，不過好細條，即捕即解；我心諗...大家咁釣魚你話幾好呢！至於師傅偉呢，仲未開齋喎~話口未完，只見佢一抽竿就成枝竿彎哂，見佢咬實牙關係咁頂係咁收，條魚走嘅速度好快，唔駛問又係大老烏喇，我同Uncle就嗱嗱聲收起Ｄ繩，費事炒哂粉，幾個回合條魚上到水面喇，仲喺度〝噼叻啪咧〞！好大條喎~我就即刻攞撈箕由條〝喇〞果度伸落去撈魚，點知都未到水，己經聽到師傅偉「噢」一聲，即刻靜哂！又比條魚KO~我地一見有烏頭出現，即刻換釣組，不過Ｄ烏頭唔多，相信都係得幾條路過，只有Uncle釣到條唔夠一斤嘅烏頭仔，佢就用個桶裝Ｄ水養住先，點知佢一行開，條烏頭就跳咗出黎，仲由鐵絲網Ｄ窿跌番落海，條魚真係夠運，番去要還神，我就同師傅偉笑到收唔到聲。又釣咗一陣，Ｄ流又大咗，粒餌落咗去成五分鐘都冇魚食，我睇都係咁先喇，大家執埋架生去宵夜好過囉！今次須然我中得一口，但係大家公平釣魚，嬴番友誼，所以今晚釣得特別開心呢。

今次享受完「過程」，好早就番到屋企喇。

得條半斤十両嘅金古都好過冇。

麵包孖寶

1-9-2012   (農曆七月十六)
今日落咗幾場大雨，諗住唔去釣魚，但係當師傅偉來電問落唔落去釣番轉，我條釣魚虫即刻活躍起黎，即答跟住到，跟手執埋Ｄ架生就飛車落主場。
落到去原來我最早到，開好竿釣金古，師傅偉又到埋，一路都有魚訊，不過好怪，我地抽極都唔中，跟住教我地釣金古果個大師傅都黎埋，佢一睇就話呢Ｄ唔係金古魚訊，有可能係烏頭，我同師傅偉就話:「Ｄ烏頭點會食得咁細力架，你釣條上黎我地就寫個服字比你」！話口未完，大師就話中魚，上到水面原來真係烏頭，可惜撈箕都未放到落去就斷魚收場，我地速速換過釣組，一放落去就有魚接餌，果頭大師又上魚，我都唔弱都中番條，跟住我地三個人夾埋都斷咗四五口，地方淺窄，條魚大Ｄ都好難上，連斷幾條，Ｄ魚就嚇到走鬼哂！
又釣咗一陣，魚訊又開始有番喇，但係食得好精，食極都唔到釣，呢次我就首先換番金古釣組，落第二口餌就中條磅頭金古，跟住佢地都換埋釣組，之後佢地都中魚，我就再中多條，一連釣咗幾條又靜哂；望吓Ｄ水，差唔多漲到上黎喇，今晚大潮，會漲到1.8米，既然大家都有魚中，都係執埋Ｄ架生，有魚留番聽日釣，齊齊去宵夜好過喇！

番到屋企，大人未瞓，同我影幅相先。

呢對就係食麵包嘅孖寶咧！

烏頭斤頭，金古磅頭＆十両。