希臘-雅典，愛琴海遊輪，沉船灣十一天(第一、二日)

前言：希臘呢個歐洲國家我想去好奈架喇，因總總原因，到幾乎歐洲所有國家都去過，到最後先至選擇去希臘玩吓，走訪扎金索斯島人氣韓劇「太陽的後裔」拍攝場地(沉船灣)、藍洞，遊覽雅典、邁鍚尼、奥林匹亞，又會乘愛琴海遊輪Celestyal Cruise暢遊愛琴海悠閒恬靜嘅渡假天堂米可諾斯島、(土耳其)古薩達斯嘅以弗所古城、帕特莫斯島、羅德島、克里特島、聖淘維尼島！

13-5-2017  (第一日)
我地會喺22:45，乘搭土耳其航空往伊斯坦堡，所以喺17:30就由屋企出發往赤鱲角机場。

 晚上八點就到咗机場。

 揾咗今次嘅領隊Richard Chan，攪好哂出境手續就到210號閘口準備登机。

航班準時起飛。

 今次航机上嘅餐單。

呢份晚餐好難食，我只係食咗個包。

 連大人都話哽唔落。

 早餐嘅牛肉粥都只係食咗Ｄ粥同包。

 14-5-2017  (第二日)
經十一個多嘅航程就到咗土耳其嘅伊斯坦堡机場。

當地嘅時間係比香港時間慢五個鐘，所以到達時係早上六點。

 轉机好彩唔駛等，喺伊斯坦堡机場即刻辦理好轉机手續就立刻上机喇！

 落咗机場巴士，喺接載我地往「希臘雅典」嘅飛机旁邊影番幅相先。

 上咗机好快就起飛喇，今次航机上嘅早餐只係一個熱騰騰嘅芝士素包，出奇地超好食，加埋杯香濃架啡，飽飽，固住食，唔記得同大家分享添。

 個半鐘度就到咗希臘雅典机場，入咗境就上旅行社安排好嘅旅遊巴往第一個景點「巴特濃神殿」。

 途中見嘅無軌電車。

 好快就到咗目的地「巴特濃神殿」。

 主殿正在維修緊。

 希臘Ｄ狗都幾大隻吓喎！

 「巴特濃神殿」建於西元前447到432年之間，為咗喺希臘神話中嘅勝利女神「雅典娜」而建，座落於衛城Acropolis山上係雅典嘅像徵。

 外牆維修緊，好彩內部都可以參觀，行到攰仲可以喺石階上坐低休息吓。

  

 鳥瞰衛城區。

  希臘國旗。

 我地都坐低抖抖先喇！

 參觀完巴特濃神殿就上車去參觀奥林匹克運動會場，果屆(唔記得邊屆)喺希臘雅典舉辦嘅奧運場地。

 跟住去埋宙斯神殿參觀，呢度係古希臘衆神之首「宙斯」掌管嘅地區。

 參觀完宙斯神殿，就去食午餐喇！

 途經憲法廣場。

 國會大樓。

 無名英雄紀念碑。

 喺市中心大街落車，步行入去餐廳。

 街上有好多售賣土特產嘅商店。

 行咗一陣到咗餐廳。

 揾好位坐定定等食。

 硬到可以掟死狗嘅麵包。

 難飲嘅湯。

鞋熠熠嘅雞扒，西方人可能話呢Ｄ餐好正，但係我就真係食唔黎，呢餐只係食咗Ｄ薯條咋！

 食咗午餐就喺布拉卡舊城區逛逛。

 舊城區內都係Ｄ旅遊紀念品，土特產，餐廳等等。

 行到攰揾個地方抖抖先。

 領隊Richard話晏晝果餐食唔飽，提早去食晚餐，早Ｄ番酒店比我地休息。
呢間係「米芝蓮推介餐廳」KUZINA，又睇吓點！

 果然係威係勢喎！

 厨房清潔整齊。

 同老友影相先。

 Ｄ麵包都係硬邦邦。

 飲杯先，祝今次嘅旅程順利。

 橄欖，橄欖油。

 唔知係米肚餓，平時好少食沙律菜嘅我，今次居然食咗一大碟，仲覺得好好味添。

 頭盤炸物。

 切開內裏有芝士蔬菜，麻麻地唧，食咗兩啖就放棄。

 主菜又係雞，西方煮法，係都要將Ｄ雞肉整到鞋熠熠先至比客人食嘅！

 甜品係杏仁碎朱古力雪糕。

 食咗晚餐就上車番酒店。

 好快就番到酒店。

 等攞房間。

 攞咗房間番房第一時間冲涼，上陣網，嘆埋杯奶茶就覺覺豬喇！

聽日我地會登上愛琴海遊輪，連續四晚住宿於遊輪上，首先到「米可諾斯島」遊覽，自由閒逛，感受小島風情。