都係果Ｄ囉

28-12-2012  (農曆十一月十六)
今晚落主場釣鱸魚，走咗六七個位，此終都係釣得一條，想釣多條都冇，釣沉底就更加唔使講，連續釣咗十幾次，比條魚黎咬吓都冇，隻蝦都係比Ｄ蟹化咗，今晚釣呢條鱸就肥Ｄ，好過噚晚果條奀之之，番到屋企，嘈醒咗大人，佢問我釣到Ｄ乜野，咁我就應佢話：「仲有乜吖，都係剩係釣到果Ｄ囉」！

今晚條花鱸肥Ｄ有兩斤幾 。

花鱸每晚都係釣得一條！

27-12-12 (農曆十一月十五) 

條鱸奀之之都唔夠兩斤 。

花鱸續條釣。

易如反掌

25-12-2012  (農曆十一月十三)
今日聖誕假期都冇街去，喺屋企昂居居，都係去街市執Ｄ蝦去釣魚好過喇。
落到主場已經見釣友Uncle喺度，好似驚屎執輸咁，開枝長竿係咁四圍拖，個個位都比佢拖埋，有魚就釣咗你先；我就唔理佢，自己慢慢開好竿，坐定定唔同佢爭，佢唔好拖埋黎就得喇！
釣咗個零鐘，我枝竿頭點咗兩吓，黎料喇!!執起枝竿準備搏鬥，當條魚一搶餌就順勢一抽，中咗~快攪幾吓，條魚跟本都冇机會開尾，一路比我攪上黎，見有兩斤幾，揾陣Ｄ落撈箕上水，詁唔到過程十分之順利，釣呢條花鱸簡直係「易如反掌」，都唔使半分鐘就上水，落好生扣，勾番隻蝦就繼續。
呢個時候，噚晚講咗唔黎嘅師傅偉又出現，佢話啱啱上深圳番黎，知道我地釣緊魚，黎痴隻蝦玩吓；梗係冇所謂喇，大把蝦，Ｄ蝦邊度釣得哂吖，一晚至多米釣五六隻~當佢落餌唔夠廿分鐘就見佢中魚喇，我同佢撈魚，條花鱸都有斤幾，一上水就即場比捧場客打劫。
過咗一陣師傅偉話頂咗引喇，收野開車走人，我見自已都釣到魚，跟住都執埋Ｄ架生同魚穫鬆人喇，留番Ｄ魚比Uncle一個人釣哂佢囉~

呢條花鱸都唔錯，有兩斤幾。

今晚唔使龜都算偷笑喇！

咁早中魚都係一條到尾。

釣完魚有Ｄ餓，見今日Ｄ虾咁大隻，魚唔食就人食，用黎整碗麵宵夜！

再加兩隻旦、半罐午餐肉，食完飽飽暖笠笠。

同場加影 ....24-12-12 (農曆十一月十二)
丁屎咁細條，兩斤都唔夠 ！

咁細條，都係用黎清蒸喇 。

一條到尾

22-12-2012  (農曆十一月初十)
晏晝師傅偉來電，佢話啱啱去簡咗Ｄ蝦，隻隻都好生猛，叫我經過攞埋，佢就遲Ｄ先到，咁我就執埋架生，先去攞蝦就直跴主場。
落到去見冇乜流水，慢慢開好竿，釣咗幾個位都冇料到，七點幾師傅偉先黎到，佢就喺番橋面開竿，因為都幾大風，所以坐番喺車入面睇住兩枝竿，一有乜動靜先出去；我見咁奈自己兩枝竿都冇動靜，就由橋躉行番出去同佢吹吓水，傾左唔夠幾句，離遠見我枝竿頭點咗兩吓，「所以話Ｄ魚睇唔見你就假喇，成晚坐定定喺度，枝竿郁都未郁過，一行開陣條魚就黎食餌喇」；我就用九秒九嘅速度，標番落躉頭度，一攞起枝竿，條魚啱啱搶餌，跟手一抽，快攪幾吓，條魚向外飛出，更加無驚無險，一頂一收，唔使廿秒就收到水面，睇落都有三斤，撈箕上水，解勾再將條魚扣好，落餌繼續。
喺七點幾中咗條鱸之後，幾枝竿一路都冇魚訊，兩條友喺又凍又大風嘅環境，都釣到成十一點，仲成四個幾鐘未有魚咬過果隻喎，人地見到真係以為我地係儍架！都係一條到尾，好過冇，跟住就執野走人去宵夜喇。

真好彩，點都有一條比我釣到！

都係花鱸夠老友！

花鱸三斤幾，又要開幾舊放入冰柜喇。

個海好彩仲有鱸魚

19-12-2012  (農曆十一月初七)

今日吹大東北風，仲落住毛毛細雨添，師傅偉晏晝打電話黎，問我夠唔夠膽去釣魚，去米去使驚你牙！佢話去街市執定Ｄ蝦先，等我去攞，佢就晏Ｄ到。
六點幾去攞埋Ｄ蝦就直跴主場，一到就喺上幾晚嘅鱸魚得食位果度擺陣，落餌大約廿分鐘，竿頭跳咗幾吓，呢Ｄ係鱸魚食餌嘅動作，我即刻拎起枝竿準備，等咗七八秒，開始拉竿，不過唔大力，我就收緊Ｄ繩，一收就黎料喇，一野重重咁拉落去，我快速抽竿，連攪六七吓，發覺條魚喺樁柱外喎，一Ｄ危險都冇嘅情況底下，三斤鱸魚順利上水，落好生扣，勾過隻蝦繼續。
今晚Ｄ流水好慢，如果唔係大風，我實出橋外搏殺；呢個時侯師傅偉黎到，佢開頭打泡釣，後尾都係擺番枝竿喺腳邊釣，佢黎咗個幾鐘枝竿都未郁過，而我果枝就有一吓明顯嘅魚訊，不過就放咗口，呢Ｄ梗係鱸Ｂ喺度攪攪震喇！到咗十點就一齊執野，準備走人，我先收釣沉底果枝竿，隻蝦原封不動，水底唔通冇生物？跟住想收埋枝釣鱸竿，啱啱行到埋去，枝竿特然彎哂落去，我即刻拎起枝竿，嗯!!輕哂冇動靜嘅！既然冇動靜就收線喇，收收吓覺得有魚拉住喎，跟住條魚就想一野鐘番落去，我就提竿一頂，成條魚比我抽到飛出水面，原來條魚一路升水，到水面就想發難；見得斤頭，成條扯佢上黎，食到入哂扣，剪線直入冰箱，跟住執埋Ｄ架生同魚穫去宵夜喇！

又嘈醒大人，佢話次次都喺廚房影，換吓個背景得唔得呀！咁我米出廳影囉。

花鱸魚三斤同斤頭。

又為食又要釣魚

18-12-2012  (農曆十一月初六)
話說早兩日，姨甥女送咗ＤX記嘅貴價腊鴨肶同鮮膶腸比我，今晚諗住煮飯食，不過噚晚有兩條鱸釣吓，而今日嘅天氣都唔錯，一於乘勝追擊，去釣咗魚先。
擸埋架生落街市執廿零隻蝦，喺街市門口撞見個舊同事民少，傾左幾句就拜拜直跴主場。
落到去見流水未起，咁就喺橋外搏陣先！可能附近有挖泥工程，又嘈喧巴閉，所以呢排喺橋外位未中過魚，我一見起流就即刻搬野入躉位，擺好個陣就等運到；過咗差唔多個幾鐘，沉底同半水兩枝竿郁都未郁過，想話拉番釣鱸果隻蝦上黎，睇洗唔洗換過隻生Ｄ嘅落去，點知一攞起枝竿就有魚食餌，督督!!扯咗兩吓，黎料喇~呢個時候，連呼吸都唔敢大力，驚嚇走條魚吖嘛，我集中精神，靜觀其變！條魚又扯咗兩吓，第三吓大力搶餌喇，我一抽竿就快攪咗六七吓，感覺呢條魚都唔細，立刻駛出【凌波微步】，向後行兩三步，枝竿頂到行，將條魚由樁柱間拖出黎，條魚出咗黎喇，佢一見光就發力開尾，你知鱸魚嘅爆發力有幾大架喇，呢個動作隨時炸你竿呀！所以我就鬆一鬆手指，比番幾呎佢走吓，如是者上落兩三次，過程都總算順暢，最後上到水面就乖乖咁入我個撈箕度上水喇，條魚睇落起碼三斤喎！扣好魚就換過花咗嘅魚線，挷好勾就落餌繼續。
又過咗一陣，腦海特然程現Ｄ香噴噴嘅腊味喎！個肚即刻〝咕咕〞聲，唔係喇，橫掂釣到魚，不如早Ｄ走，番屋企煮個腊味飯食吓囉！咁就嗱嗱聲執埋Ｄ架生同魚穫，番屋企吔飯喇~

咁早番到屋企，大人仲未瞓，同我影張相先。

依家Ｄ鱸魚係好野黎架(我話)！

過磅係三斤十。

劏埋魚，攪掂哂Ｄ釣具就開始煮飯喇，洗落米煲落飯，攞定Ｄ腊鴨肶同鮮膶腸出黎，跟住煲杯奶茶，飯差唔多收水就落埋Ｄ腊味，跟住就去洗白白，洗完白白啱啱好，攞Ｄ喺飯面熟咗嘅腊味出黎，一打開個飯煲蓋，嘩!!Ｄ香味直灌神經中樞，嗱嗱聲切好Ｄ腊味，筆碗香噴噴嘅腊味飯，仲未食得住，影埋相同大家分享先！

臘鴨肶一隻(左肶)、鮮鴨膶腸一條。

我問大人係米好香呢，食唔食呀！佢就話彩我都傻~咁我就自己開飯食喇！

花鱸起雙飛

17-12-2012  (農曆十一月初五)
今日本來要同大人去工展會買番Ｄ野，後尾佢有個太極友話同佢去，咁就叫我唔洗倍佢，自己去釣魚喇。
喺街市執二三十隻蝦就直跴主場，今晚須然唔凍，不過都幾大風吓，釣友Uncle早一步到，佢喺第一躉度釣，咁我就去第二躉度開竿；但係佢點會坐定定吖，釣咗一陣冇動靜佢就開始鬧咧！「Ｄ魚死Q哂去邊呀」~跟住就開始攞枝竿四圍拖喇；又比佢拖到條鱸B喎，我睇半斤都唔夠，咁細條好心就放番佢喇，但係佢照落生扣。
又過咗陣，見枝竿比魚拉咗兩吓，我飛身埋去執起枝竿，呢個時候條魚已經搶餌，我順勢一抽，往後行咗幾步，將條魚帶離樁柱位，跟住連攪七八吓，再頂佢一陣，見佢冇乜力就一路收到上水面，見條鱸都有兩斤，頭威頭勢，都係唔好大意，用撈箕上水，將條魚落埋生扣，挷勾落餌繼續。
又過咗一陣，枝竿又有魚食餌，仲重拉咗一吓添，執起枝竿，又冇哂動靜，收番隻蝦上黎，隻蝦比條魚咬到扁咗，我即刻再勾隻極之生猛嘅蝦乸落去，一落就接餌，「督督」！食咗兩吓，唔郁喎，好我就同你鬥耐性，正所謂【敵不動我不動，敵一動我先動】，大家薑持咗四五秒，條魚開始唔耐煩有所行動喇，當佢一拉竿我就狠狠咁一抽，跟住快速連攪五六吓，向後行兩步，將條魚拖離險境，頂佢一陣，見佢開始冇力就好順咁一路收條魚上黎，一上到水面，條鱸例牌會飛出水面洗鰓，邊度有用架，趁佢一飛出黎，我就拉緊條繩，仲要一左一右咁撻佢兩野，見條鱸仲未就範，再拉行少少，等佢飲幾啖水先，呢次立即反肚投降，我就將佢撈箕上水，大戰又結速，落好生扣，再落餌繼續。
呢個時候Uncle見我個位連起兩條魚，Ｄ茅王衰格又出黎喇，佢將隻蝦拖黎我釣緊個位果度~有冇攪錯，唔駛咁係嘩！我即刻話：「喂~又過黎偷魚」！佢就騎騎笑，釣咗一陣就拖開咗喇。
望吓個錶已經十點幾，都係唔同佢癲，執埋Ｄ架生同魚穫，走人去宵夜喇喂。

番到屋企，嘈醒大人，順便同我影相。

花鱸一雙，兩斤同兩斤幾。

同場加影
15-12-12(農曆十一月初三)
釣得幾條魚仔。

11-12-12(農曆十月廿八)
係得呢Ｄ咋。

失而復得

10-12-2012  (農曆十月廿七）
落咗幾日雨，今日叫做好天Ｄ，去街市執廿零隻蝦，攞埋釣魚架生就直跴主場；落到去已經落緊流，咁我又喺釣大細鱗個位度開竿，一枝釣鱸，一枝沉底，枝磯竿仔就梗係勾蝦肉掟出去搏符碌喇！
釣咗個幾兩個鐘，一Ｄ動靜都冇，只有幾條魚仔釣吓，掟出去果口餌見冇魚咬，我就慢慢拖繩，引魚埋黎，一路拖一路拖，特然有魚搶咗一吓，我梗係抽竿喇，一抽之下，魚就唔中喎，而係勾咗垃圾，好在拉得郁，我唔想又挷勾，所以好小心咁續Ｄ續Ｄ咁拉上黎，一路拉到上水面喇，開頭見係一枝樹枝咁，再拉高Ｄ，今次睇得清楚喇~吓!!係魚竿，仲係我十幾日前比魚扯咗落海果枝竿，我一手揸實佢，驚佢跌番落海，開著頭燈，子細睇清楚Ｄ，個攪都仲喺度，只係包哂坭，我即刻攞枝竿同攪去水喉用清水沖洗一番，跟住放番上車，等番屋企先至慢慢攪！

呢!!就係呢套架生喇！

比魚攞咗去玩十幾日，攪到污糟哂，番黎有排攪。

失而復得嘅感覺真係開心，仲開心過釣條大野，即刻精神為之一震，跟住仲中條花鱸斤幾，再中多條兩斤細鱗添，今晚咁好運氣，執埋Ｄ野就鬆人去宵夜喇。

今日執番枝竿同鉸，仲釣到兩條魚添，真係行運行到落腳趾尾！

即刻呢Ｄ魚穫都係做咗佩角咋！

釣成晚都係等果十幾廿分鐘

4-12-2012  (農曆十月廿一)
經過兩晚做咗濕身龜，諗住今晚唔去釣魚，點知師傅偉來電放毒，話咁凍實有鱸釣，仲去簡定蝦等我去攞，咁比佢一挑，條釣魚根即刻彈起，執起架生就出發。去魚檔攞咗Ｄ蝦就直跴主場，天氣一路都唔係咁好，又大風，仲落住毛毛雨添，落到去見冇乜流，就喺橋外面搏殺，釣咗個幾鐘，三枝竿，一咀都未食過，Ｄ雨就越落越大，唔係喇！都係縮番入埋便橋底釣吓就算。
又過咗成個鐘，師傅偉黎到，佢就開咗枝竿，跟住跳番上車，隔住玻璃窗恰實枝竿，等有魚食餌先至出去，佢話呢種釣法係叫做睡夢羅漢喎！真係比佢笑屎。
由冇流釣到行流，再由行流釣到慢流，幾知竿郁都未郁過；呢個時候卒之停雨喇，師傅偉冇哂引走先，我見又開始慢流又冇雨落，梗係磨多陣喇！嗱嗱聲搬番Ｄ野出去，擺番好個陣，過咗冇奈，釣沉底枝筏仔特然響鉸，條魚起碼走咗十呎八呎，我一手執起枝竿，都費事抽喇，即刻搏命係咁收繩，連攪咗十幾吓就開始有反應，條魚一野就想衝返轉頭，佢太天真喇，我扲實個鉸枝竿向上一頂，兩三秒條魚就冇力，趁機連頂帶攪，中途有輕微頑抗都一一比我化解，上到水面梗係細鱗喇走得咁快，跟住撈箕上水，落好生扣，準備放落水，點知釣鱸枝竿又響鉸，呢個時候乜都唔理，飛身埋去執起枝竿，條鱸以經發力開尾，局住比佢走幾呎，佢一慢就輪到我發圍喇，一手頂起佢，再不停咁收，唔同佢玩，速戰速決，一到水面就撈箕上水，跟住連埋條細鱗一齊入冰箱，因為時間都唔早喇，見好就收，有魚留番聽日釣，執埋Ｄ架生，鬆人去宵夜喇！

等成晚都冇一咀，到尾釣呢兩條魚都係廿零分鐘內。

有時釣魚真係要磨爛蓆架！

扯我枝竿落海嘅下場

28-11-2012  (農曆十月十五
噚晚比魚扯咗枝竿落海，今日走去置番Ｄ新架生，買番同一牌子。
呢枝竿就比之前果枝長咗3cm，個攪就細500號。

呢枝係〝赤狐姬〞360，落海果枝係330，米睇佢竿仔細細，頂起魚黎好輕鬆架！

佩埋個史文勞 SHIMANO 2000。

加埋三號全炭線，今晚仲唔做佢世界!!

上行架生，攞埋盒千年蝦仁，唔買生蝦，直跴主場；落到去己經開始轉流，喺Ｄ得食位釣咗一陣冇料到，搬番Ｄ架生過去噚晚飛竿嘅位置釣吓劃仔，因附近有挖泥工程，嘈喧巴幣，連劃仔都好疏口，一路釣到成十一點，架挖泥船拖離現場，個海先至靜番哂，喺呢個時候，我新買果枝磯竿仔一吓就彎哂落去，黎料喇！呢次我坐定定恰到實，所以就好快速咁抽竿，跟住連攪七八吓，條魚扯到行，人魚角力即時爆發!!磅頂又發出刺耳嘅叮叮聲，頂咗四五秒，見條魚收力，我即刻又追返七八吓，條魚又發力向右飛，果度係喺海中心，冇樁冇柱，唔怕同佢玩一陣，又頂咗四五秒，將條魚控制返左邊，開始過黎喇，今次可以攪成十吓八吓，埋到黎離腳邊仲有8米左右，呢個時候最危險，一不留神就會比佢標入樁底，到時就惡攪喇，所以我要駛出〝左右野馬分鬆〞一左一右咁又收又頂，駛到條魚冇哂方向感，收到見魚喇，嘩!!好大餅嘅細鱗，就係呢條魚扯咗我枝竿落海架喇；條魚反抗咗一陣，卒知升水反肚，我就好快咁落撈箕，條魚入咗撈箕就定好多喇；大戰結速，人類勝！將條魚落好生扣，再落餌繼續，一路釣到十二點，再冇魚訊，跟住執埋Ｄ架生，走人去宵夜喇喂！

拖我枝竿落海嘅下場就係咁喇。

呢條細鱗足三斤幾。

今晚瞓得著喇。

今季釣嘅細鱗，呢條算最大喇。

由冇變番有

23-11-2012  (農曆十月初十)
前日釣完魚番屋企，照例影吓收穫，點知部影魚相机神咗，影出黎嘅較果唔掂，開頭唔知架，等我攪掂哂Ｄ野，想話上載Ｄ照片上相簿度，點知插張咭落電腦開出黎睇，噢~咁花嘅!!魚又劏埋，冇得保飛添。

你地睇，部相机夠期喇，影到好似畫出黎咁！

仲衰過以前Ｄ手机影嘅！

講番今日嘅戰況先，今日我又係早過師傅偉到主場，開好竿就等運到；過咗大約一個鐘度，沉底果枝筏仔響攪喎，我啱啱坐正喺枝竿側邊，所以好快就一手執起枝竿，條魚以經發力，我跟手一抽，快攪幾吓，條魚搏命想開尾，咁唯有頂佢一陣喇，再黎收線，開頭都收得好順吓，點知仲有十呎八呎就感到條魚線Hi住樁柱，跟住仲收唔郁添，我即刻放鬆個攪比佢走番出黎先，一鬆之下，條魚真係走番出黎，機不可失，心諗~你仲唔屎!!一提竿跟手攪咗幾吓，特然〝啪〞一聲條魚線輕哂，收番上黎係斷咗帶腳，真係谷鬼氣，仲爭幾呎就上到黎架喇咁都比Ｄ木樁Hi斷！落筆頭就打三更，冇計，釣魚就係咁喇，屎屎氣挷過勾繼續。
師傅偉又黎到，佢話Ｄ流咁急，釣陣劃仔先喇，都好喎！橫掂都毫冇魚訊，轉吓釣魚仔冇咁悶；開頭釣腳邊，比Ｄ魚仔化餌，跟住掟遠Ｄ，粒餌一沉到落底唔夠幾秒，一吓好大嘅拉力，自然嘅反應梗係抽竿喇，中咗呀!!攪咗幾吓，條魚又黎一吓標水，磅頂即時叮叮作響，頂咗幾秒就繼續收線，今次因為係掟出去釣，所以唔怕條魚埋樁，飛來飛去，頂吓放吓，玩咗一兩分鐘，上到水面喇，原來係兩斤嘅細鱗，唔怪之得咁好飛喇，想話攞撈箕，幣傢伙~諗住釣魚仔，枝撈箕冇攞過黎添，仲放喺正話果邊！好彩師傅偉喺度，同我過去攞，仲幫我撈埋魚添，真係唔該哂佢。
一路釣到11點幾，連蝦肉都冇魚食，梗係執野鬆人，去宵夜好過喇喂。
今次用大人部相机影架，色彩真係靚過我果部好多喎。
第一條斷咗，諗住實聽龜喇，點知轉釣魚仔，失驚無神反而中番條。

兩樣魚都九唔答八 。

釣夠食就算 。

耐力賽

19-11-2012  (農曆十月初六)
今日師傅偉喺街市留咗Ｄ虾，我就落去攞，攪掂就直跴主場，落到去都未夠六點，開好竿，一路都冇魚訊，剩係釣條蛇；七點幾Uncle又到，嘩!!佢今次好似至在必得咁樣，出動十呎船竿，大直攪，八號布線，唔知幾多號嘅大鉛鉈，咁大陣象原來係釣鱸，我都冇佢咁好氣，呢個時候師傅偉都黎埋，見UncleＤ重型架生，問我佢係米釣魚釣到儍咗，我就只有一笑。
一路釣到十點幾，三條友都係龜氣冲天，佢兩個就走先，我就繼續磨爛蓆，卒知磨到成點鐘轉流，先至比我中番條兩斤細鱗，過程一Ｄ都唔精彩，一路收上黎仲以為又條泥婆，就快到水面先有Ｄ反抗，撈箕上水，直入冰箱，再釣多陣都冇魚訊，跟住都係執野走人去宵夜喇。

呢條細鱗好肥美喎！

呢條細鱗冇兩斤都有斤十五。

好彩中番條細鱗啫 。

易如反掌

17-11-2012  (農曆十月初四)
噚晚釣得條爛鬼星鱸，連劃仔都冇，今晚再落去睇有冇運行至得！
六點幾落到主場，見釣友章哥喺度收緊魚準備走，嘩!!又比佢扯條花尾躉，上次係月全蝕果晚，今次係第二條喇，我都攞黎影幅相，旺一旺佢先！

呢條花尾躉足足九斤。

影完相，見Ｄ流水都好急吓，我就揾個靚位開好竿，坐定定等運到；過咗一陣，勾粒吓仁落去，枝璣竿仔好大力比魚拉到彎哂，我坐喺側邊就好快嗱起枝竿，以經冇得抽，只有頂，感到條魚線以經Hi住樁，唔夠兩秒就應聲而斷！噢~走埋X＋Y，屎屎氣挷勾落餌繼續。
呢個時候師傅偉同Uncle都黎到，各人分別都揾位落釣；到九點幾，放喺離我大約廿呎枝釣鱸竿郁咗幾吓，我即刻執起撈箕，九秒九飛埋去，再執起枝竿，呢個時候條魚啱啱搶餌，枝竿一拉落去我就往上一抽，連攪六七吓，條魚想發力開尾，我就頂佢一陣，見條魚冇乜力就再攪幾吓，好順利一路收到上水面，我想話攞撈箕，原來Uncle一早揸定撈箕等我，有人幫手咁就更加輕鬆，三斤鱸魚好容易就上水，簡直就【易如反掌】。
又釣咗一陣流水都轉埋，都係轉釣吓劃仔玩吓好過，一路釣到成十一點幾，劃仔唔多，好疏口，大家都再冇進賬，跟住執埋Ｄ野，齊齊去宵夜喇。

我睇今季Ｄ花鱸有排釣 。

呢輪釣親Ｄ花鱸，都係三斤左右。

須然疏口Ｄ，不過都有番Ｄ劃仔釣吓 。

同場加影 :

16-11-2012  (農曆十月初三)

剩係釣得條爛鬼星鱸 。

呢Ｄ魚送比人都冇人要，但係大人話都幾好食喎 。